ކުރިއަށް އޮތް ރިޔާސީ އިންތިހާބުގައި ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު އަށް 8 އިންސައްތަ ލިބުނަސް އެއީ ބޮޑު ކާމިޔާބީއެއްގެ ލިބުމާއި އެއްފަދަ ކަމެއްގެ ގޮތުގައި ކުރީގެ ކޮމިއުނިކޭޝަންސް މިނިސްޓަރު މުހައްމަދު މަލީހު ޖަމާލް ވިދާޅުވެއްޖެއެވެ.
ކުރިއަށް އޮތް ރިޔާސީ އިންތިހާބަށް ކެނޑިޑޭޓަކު ކަނޑައެޅުމަށް އެމްޑީޕީއިން ބޭއްވުމަށް ހަމެޖެހިފައިވާ ޕްރައިމަރީގައި ރައީސް ނަޝީދު ވާދަކުރައްވާނެކަމާއިމެދު ސުވާލު އުފެދިފައިވާ ދަނޑިވަޅެއްގައި އެމްޑީޕީ އަދި ރައީސް ސާލިހުގެ ސަރުކާރަށް ފާޑުކިޔުންތަކެއް އަމާޒުކުރައްވާ މަލީހުވަނީ މިހާރުގެ ވެރިކަން ވެގެންދާނީ އެމްޑީޕީއަށް އެންމެ ނާކާމިޔާބު 5 އަހަރު ގޮތުގައިކަމަށް ސިފަކުރައްވާފައެވެ.
މަލީހު ވިދާލުވީ، މިހާރު އެމްޑީޕީ އޮތީ “ގާހަކަ ޖަހާ” ފެހިކަހަން ޖެހޭ ހާލަތުގައިކަމަށެވެ. އަދި ރައީސް ނަޝީދު ކުރިއަށް އޮތް ރިޔާސީ އިންތިހާބުގެ ވޯޓު ކަރުދާހުގައި ރައީސް ނަޝީދުގެ ނަން އޮވެއްޖެ ނަމަ، ރައީސް ސާލިހު ބައިވެރި ނުވުމާއި އެއްފަދަ ވެގެންދާނެކަމަށް އިޝާރާތްކުރައްވާ އެނާ ވިދާޅުވީ، އެ ހާލަތުގައި ރައީސް ސާލިހަށް 8 އިންސައްތަ ވޯޓު ލިބުންވެސް ވެގެންދާނީ ކާމިޔާބީއެއް ލިބުމާއި އެއް ފަދަ ކަމެއްކަމަށެވެ.
އެމްޑީޕީގެ ތާރީޚުގައިވެސް އެންމެ ނުހިންގުނު 5 އަހަރު. ސިޔާސީ ގޮތުން ޕާޓީ އޮތީ ގާހަކަ ޖަހާ ފެހި ކަހަން ޖެހޭ ހާލަތުގައި. ރައީސް ނަޝީދުގެ ނަން ވޯޓް ކަރުދާސް ކޮޅުގައި އޮވެއްޖެ ނަމަ ރައީސް އިބޫ ވާނީ ނޮން ސްޓާޓަރ އަކަށް. ރިޔާސީ އިންތިޚާބުގައި %8 ލިބުނަސް އެއީ ބޮޑު އަދަދެއް. pic.twitter.com/px5mlc7snE
— Mohamed Maleeh Jamal (@maleehjamal) November 22, 2022
މަލީހުވަނީ ރައީސް ސާލިހުގެ ވެރިކަމަށް 4 އަހަރު ފުރުހުން ފާހަގަކުރުމުގެ ގޮތުންވެސް ޓްވީޓެއް ކުރައްވާފައެވެ. އެނާ ވިދާޅުވީ، އެމަނިކުފާނަކީ، ގައުމެއް ހިންގޭ ފެންވަރުގެ އިލްމެއް އަދި ތަޖުރިބާ އާއި އަހުލާގެއް ނެތް ބޭފުޅެއްކަމަށެވެ. އަދި ރައީސް ސާލިހަކީ ވިސްނުން ކޮށި، ކޮމިއުނިކޭޝަން ސްކިލް ދަށް ވެރިއެއްކަމަށްވެސް އެނާ ވަނީ ވިދާޅުވެފައެވެ.
މަލީހު ވިދާޅުވީ، 4 އަހަރުވެގެން ދިޔައިރު ރައީސް ސާލިހުއަށް ދައުލަތުގެ ވުޒާރާތައް ހުރި ތަންތަން އިނގިފައިނުވާކަމަށެވެ. އަދި އެމަނިކުފާނުވަނީ ވައުދުތަކެއް ވުމަށްފަހު ވައުދު ފޮތް ފޮރުވާފައިކަމަށާއި އެމަނިކުފާނުގެ އެންމެ ގާތް އެކުވެރިޔާ މިހާރު އެއީ އެމަނިކުފާނުގެ އެންމެ ބޮޑު ދުޝްމިންކަމަށް ސިފަކުރައްވާ މަލީހުވަނީ އެކަމުގެ ހުރިހާ ޝުކުރެއް އަދާކުރަންޖެހެނީ މެޑަމް ފަޒްނާގެ ބައްޕައަށްކަމަށް ވިދާޅުވެފައެވެ.
advertisment