ސޮވަރިން ޑިވެލޮޕްމަންޓް ފަންޑު (އެސްޑީއެފް) ގައި ހުރި ފައިސާ ހުސްކޮށްލީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބާރު ނުފޯރާ ގޮތަށް ގާނޫނަށް ބަދަލު ގެނެސްގެންކަމަށް ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ.
އެސްޑީއެފް ފަނޑުގައި ހުރި ފައިސާ ވަރަށް ބޮޑަށް ދަށްވެފައިވާތީ އެކަމާއިމެދު ކަންބޮޑުވުން ފާޅުކުރައްވާ ޕީޕީއެމްގެ ނައިބު ރައީސްކަންވެސް ކުރައްވަމުން ގެންދަވާ ޝިޔާމް ޓުވީޓެއް ކުރައްވާ ވިދާޅުވީ ވެރިކަމުގެ މާމުއި ހަނދުވަރު ދުވަސްވަރު ކާޑާއި ތެޔޮ ގަންނަން ޑޮލަރު ނެތިގެން ފަންޑުގައި ހުރި ޑޮލަރު ދިވެހި ރުފިޔާއަށް ބަދަލުކުރިކަމަށެވެ. އަދި އެއަށްފަހު އެމްއެމްއޭގެ ބާރު އެސްޑީއެފް ފަންޑަށް ނުފޯރާ ގޮތަށް ގާނޫނަށް ބަދަލު ގެނައީ މުސާރަދޭނެ ފައިސާ ނެތިގެންކަމަށް ޝިޔާމް ވަނީ ވިދާޅުވެފައެވެ.
އޭގެ އިތުރުން ޝިޔާމްގެ ޓުވީޓުގައި ވަނީ ޕެންޝަން ފަންޑުވެސް ހުސްވެފައިވާކަމަށްވެސް ފާހަގަކުރައްވާފައެވެ.
ވެރިކަމުގެ މާމުއި ހަނދުވަރު ދުވަސްވަރު ކާޑާއި ތެޔޮ ގަންނަން ޑޮލަރު ނެތިގެން ފަންޑުގައިހުރި ޑޮލަރު ބަދަލުކުރީ ދިވެހި ރުފިޔާއަށް. ފަހުން މުސާރަދޭނެ ފައިސާ ނެތިގެން ޤާނޫނަށް ބަދަލު ގެނެސް އެމް.އެމް.އޭގެ ބާރު ފަންޑަށް ނުފޯރާގޮތަށްހަދާ ފަންޑު ހުސްކޮށްލީ. ޕެންޝަން ފަންޑުވެސް ހުސްކޮށްފި https://t.co/k4QU3ItD8c
— Ahmed Shiyam (@Shiyamaldives) November 27, 2022
ކުރީގެ ރައީސް އަބްދުﷲ ޔާމީން އަބްދުލް ގައްޔޫމުގެ ވެރިކަމުގައި ގާއިމްކުރި މި ފަންޑުގައި ހުންނަ ފައިސާ ކޮންމެ ތިން އަހަރަކުން އިތުރުވެގެންދާނެކަމަށް ފަންޑު ގާއިމު ކުރެއްވި އިރު އިގްތިސާދީ ވަޒީރުގެ މަގާމުގައި ހުންނެވި މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދުވަނީ ފާހަގަކުރައްވާފައެވެ.
ރައީސް ސާލިހު ވެރިކަމަށް ވަޑައިގެންނެވި އިރު މި ފަންޑުގައި 200 މިލިއަން ޑޮލަރަށްވުރެ އިތުރަށް ހުރި ނަމަވެސް މިހާރު ފަންޑުގައި ހުރީ 6.4 މިލިއަން ޑޮލަރާއި ގާތް ކުރާ އަދަދެކެވެ.
ސައީދު ވިދާޅުވެފައިވާގޮތުން، ދިވެހިރާއްޖޭގެ ވެރިކަމާއި ހަވާލުވާ ކޮންމެ މީހެއްގެ މައްޗަށްވެސް މި ފަންޑު ރައްކައުތެރިކަމާއި އެކު ބެލެހެއްޓުން ލާޒިމުވެގެންވެއެވެ. އެހެން ނަމަވެސް ރައީސް ސާލިހުވަނީ މި ފަންޑުގައި ހުރި ފައިސާ ދިވެހިރާއްޖެއަށް މާލީ މަންފާތަކެއް ހާސިލުކޮށްދެއްވުމުގެ ނަމުގައި ބޭރުގައުމެއްގައި އިންވެސްޓުކޮށްފައިކަމަށް ސައީދު ވިދާޅުވިއެވެ.
މިކަމާއި ގުޅިގެން “ސަންގުން” ފިނޭންސް މިނިސްޓްރީއައި ސުވާލުކުރުމުން ބުނީ، ފަންޑުގެ ސައިޒަށް އެއްވެސް ބަދަލެއް އައިސްފައިނުވާނެކަމަށާއި، އަދި އެ ފަންޑުގެ ބެލެންސް ދަށްވެފައިވާ ސަބަބަކީ އިންވެސްޓުކުރެވިފައިވުންކަމަށް ފާހަގަކޮށް ފިނޭންސް އިން ބުނެފައިވާގޮތުން އެ ފަންޑުން އެއްވެސް ހަރަދެއް ކޮށްފައިވާނަމަ ދަށްވެގެންދާނީ ފަންޑުގެ ޖުމުލަ ސައިޒެވެ. އެހެން ނަމަވެސް އެފަދަ ހަރަދެއް ކޮށްފައިނުވާނެކަމަށް ބުންޏެވެ.