2023 ވަނަ އަހަރުގެ ރިޔާސީ އިންތިހާބު ކާމިޔާބުކުރެއްވިޖެނަމަ، ރާއްޖޭގައި އިސްލާމީ ވެރިކަމެއް ގާއިމުކުރައްވާނެކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވި ވިދާޅުވުމަކީ ގަބޫލުކުރައްވަން ދަތި ވާހަކަައެއްކަމަށް އައްޑޫ މަަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވިއެވެ.
އެމްޑީޕީގެ ރިޔާސީ ޕްރައިމަރީގެ ވާދަވެރިކަން އިތުރުވެ، ދެ ފެކްޝަންގެ ދެމެދު ބަހުގެ ހަމަލާތަކެއް ބަދަލުވަމުންދާއިރު، އިބްރާހިމް ޝަރީފްވަނީ ރައީސް ނަޝީދު ދައްކަވަމުންދާ ވާހަކަތަކަކީ ގަބޫލުނުކުރެއްވޭ ވާހަކަތަކެއް ކަމަށް ފާހަގަކުރައްވާފައެވެ. އެނާ ވަނީ މީގެ އިތުރުންވެސް ރައީސް ނަޝީދަށް ފާޑުކިޔުންތަކެއް އަމާޒުކުރައްވާފައެވެ.
ޝަރީފް ވިދާޅުވީ، ރައީސް ނަޝީދަކީ ރާއްޖޭ ބަނގުރޫޓުވެދާނެކަމަށް ވިދާޅުވެ، ރައްޔިތުންގެ މެދުގައި އެކަމުގެ ބިރު ފަތުރުއްވަމުންދާ ސިޔާސީ ލީޑަރެއްކަމަށެވެ. އެހެންނަމަވެސް އެކަމަކީ ހަގީގަތެއް ނޫންކަމަށް ފާހަގަކުރައްވާ އެނާ ވިދާޅުވީ، ކޮވިޑްއަށް ފަހު ރާއްޖޭގެ ފަތުރުވެރިކަމުގެ ސިނާއަތު އަލުން އިއާދަވުމާއި އެކު އިގްތިސާދުވެސް ހުރީ ރަނގަޅު މަގެއްގައިކަމަށެވެ.
Very difficult to believe but ex-president @MohamedNasheed has promised to establish an Islamic Republic in 🇲🇻 if elected president in 23 .
— Ibrahim Shareef (@AdduShareef) December 30, 2022
އެނާ ވިދާޅުވީ، ސަރުކާރުންވަނީ ގައުމު އެކަށީގެންވާ ގޮތެއްގެ މަތިން މެނޭޖުކޮށްފައިކަމަށެވެ. އެގޮތުން ތަކެތީގެ އަގުތައް ހެފެހެއްޓީ ސަބްސީޑީ ދީގެންކަމަށާއި، އެކަންވެސް ކުރީ ބައިނަލްއަގުވާމީ މާކެޓުގައި ތަކެތީގެ އަގު އުފުލިދިއުމުގެ ޕްރެޝަރާއިވެސް އެކުކަމަށް އެނާ ފާހަގަކުރެއްވިއެވެ.
ބައެއް ފަރާތްތަކުން މަސައްކަތްކުރަމުންދަނީ ސިޔާސީ މަންފާއެއް ހާސިލު ކުރުމުގެ ބޭނުމުގައި ރާއްޖެ ބަނގުރޫޓު ކުރުމަށްކަމަށް އިޝާރާތްކުރައްވާ ޝަރީފް ވިދާޅުވީ، އިގްތިސާދީ ހާލަތު ރަނގަޅަށް ހުރިނަަމަވެސް، ރަނގަޅު ގޮތުގެ މަތީ ދެމެހެއްޓުމަށް ބުރަ މަސައްކަތްތަކެއް ކުރަންޖެހޭކަމަށެވެ. އެހެންކަމުން ގައުމުގެ ހާލަތު ގޯސް ފައްތަރަކަށް ގެންދިއުމަށް މަސައްކަތްކުރަމުންދާ ފަރާތްތަކަށް އެކަމަށް ޖާގަ ނުދިނުމަށް ސަމާލުވާންޖެހޭކަމަށް އެނާ ވިދާޅުވިއެވެ.
advertisment