ލިބުނު ބައެއް ޝަކުވާތަކަށް ފަހު ސިވިލް ކޯޓުގެ ގާޒީ ފައްޔާޒް ޝާތިރުގެ ސުލޫކީ މައްސަލައެއް ބެލުމަށް ނިންމާފައިވާކަމަށް ޖުޑިޝަލް ސާވިސް ކޮމިޝަނުން ބުނެފި އެވެ.
ފަނޑިޔާރުންނާއި ގުޅުން ހުރި ސުލޫކީ މައްސަލަތައް ބަލައި ފިޔަވަޅު އެޅުމުގެ ޒިންމާ އޮންނަ ޖުޑިޝަލް ސާވިސް ކޮމިޝަނުން މިއަދު ބުނީ ސިވިލް ކޯޓުގެ ގާޒީ ފައްޔާޒްގެ މައްސަލައެއް ބެލުމަށް ނިންމާފައި ވަނީ އޭނާގެ ފަރުވާ ކުޑަކަން ފާހަގަކުރެވިގެން ކަމަށެވެ.
ޖޭއެސްސީން ގާޒީ ފައްޔާޒްގެ މައްސަލަ ބަލަނީ ކޯޓުގައި ކުރިޔަށް ދިޔަ މައްސަލައެއްގެ އަޑުއެހުންތައް ނިންމާލިތާ އަހަރަކަށް ވުރެ ގިނަ ދުވަސް ފަހުން ވެސް ހުކުމްކޮށްފައި ނުވާތީ އެވެ.
News Briefing_30 January 2023: Civil Courtge Gazi Uz.Fayyaz Shathirge sulookee massalaeh belumah nimmun
Ithuru thafseel: https://t.co/R74WOvay4J
— Judicial Service Commission (@MaldivesJSC) January 30, 2023
ކޮމިޝަނަށް ލިބުނު ޝަކުވާތަކަކާއި ގުޅިގެން މައްސަލަ ބެލުމަށް ނިންމާފައި ވަނީ މި މަހުގެ 08 ގައި ބޭއްވި ޖަލްސާގަ އެވެ. ޖޭއެސްސީން މައުލޫމާތު ދޭ ގޮތުގައި، މައްސަލަ އިތުރަށް ކުރިޔަށް ގެންދިއުމަށް ސަބް ކޮމިޓީއެއް އެކުލަވާލައި ތަހުގީގު ވަނީ ފަށާފަ އެވެ.
މައްސަލަތައް ކޯޓުގައި ކުރިޔަށް ގެންދިއުމުގައި ފަރުވާކުޑަ ކުރުމާއި، ނުވަތަ ވަކި މީހެއްގެ މަސްލަތަހަށް ފައިދާ ވާ ގޮތަށް އަޑުއެހުންތައް ކުރިޔަށް ގެންދިއުން ނުވަތަ އެހެނިހެން ސުލޫކީ މައްސަލަތަކުގައި ޖޭއެސްސީން ގިނަ ފަނޑިޔާރުންގެ މައްސަލަތައް ބަލައި ތަހުގީގުކޮށްފައި ވެއެވެ. އަދި ބައެއް ފަނޑިޔާރުން މަގާމުން ވަކި ކުރުމަށް ނިންމާއިރު، ކޮމިޝަނުގެ ނިންމުން މަޖިލީހަށް ފޮނުވުމުގެ ކުރިން ބައެއް ބޭފުޅުން މަގާމުން އިސްތިއުފާ ދެއްވަ އެވެ.
advertisment