ކާށިދޫ ދާއިރާގެ މެމްބަރު އަބްދުﷲ ޖާބިރުގެ ގްރީން ޕާޓީ އޮފް މޯލްޑިވްސް އުފެއްދުމުގެ ހުއްދަ އިލެކްޝަންސް ކޮމިޝަން އިން ދީފިއެވެ.
އިލެކްޝަންސް ކޮމިޝަނުން ކޮށްފައިވާ ޓްވީޓެއްގައި ބުނެފައިވަނީ ގްރީން ޕާޓީ އޮފް މޯލްޑިވްސް ގެ ނަމުގައި ސިޔާސީ ޕާޓީއެއް އުފެއްދުމަށް ހ ތިމާވެށި އަބްދުﷲ ޖާބިރަށް ހުއްދަ ދިނުމަށް ރަސްމިއްޔާތެއް ބޭއްވި ކަމަށެވެ.
މި ރަސްމިއްޔާތުގައި ގްރީން ޕާޓީގެ ރަޖިސްޓްރީ، ޖާބިރު އާއި ހަވާލްކޮށްދެއްވީ އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބްއެވެ.
"ގްރީން ޕާޓީ އޮފް މޯލްޑިވްސް"ގެ ނަމުގައި ޕާޓީއެއް އުފެއްދުމަށް ހ.ތިމާވެށި އަބްދު ﷲ ޖާބިރަށް ހުއްދަދިނުމަށް ބޭއްވި ރަސްމިއްޔާތުގެ ތެރެއިން. @chairmanjabir @FuwadThowfeek @IsmailHabeeb @ANashath @Mohamed25588073 @HassanZakariyya pic.twitter.com/ATqi0mOdBM
— Elections Commission (@ElectionsMv) February 13, 2023
ޖާބިރު މީގެ ކުރިން ހުންނެވީ ދިވެހި ރައްޔިތުންގެ ޕާޓީ (ޑީއާރުޕީ) ގެ ލީޑަރު ކަމުގައެވެ. ނަމަވެސް ސިޔާސީ ޕާޓީ ތަކާއި ބެހޭ ގަވާއިދުގައިވާ އަދަދަށް މީހުން ހަމަނުވާތީ ޑީއާރުޕީ އުވާލުމަށް އިލެކްޝަންސް ކޮމިޝަންގެ ފަރާތުން ވަނީ ނިންމާފައެވެ.
ޑީއާރުޕީގައި 3000 މެމްބަރުން ހަމަނުވާތީ ސިޔާސީ އެއްވެސް ހަރަކާތެއް ނުހިންގުމަށް އިލެކްޝަންސް ކޮމިޝަނުން އޮތީ އެޕާޓީއަށް އަންގާފައެވެ.
ޖާބިރު ވަނީ އަމިއްލަ ޕާޓީއެއް އުފެއްދުމަށް ކުރިން ހުންނެވި ޑީއާރުޕީގެ ލީޑަރު ކަމުން އިސްތިއުފާ ދީފައިކަން ވެސް ފާހަގަކޮށްލެވެއެވެ.