ކްރިމިނަލް ކޯޓް ހިންގަމުންދާ އިމާރާތް ބަދަލުކުރަން ނިންމައިފި

ކްރިމިނަލް ކޯޓް ހިންގަމުންދާ އިމާރާތް ބަދަލުކުރުމަށް ނިންމާފައިވާ ކަމަށް  ޖުޑީޝަލް ސާވިސް ކޮމިޝަން (ޖޭއެސްސީ) އިން ބުނެފިއެވެ.

ޖޭއެސްސީން ބުނީ ކްރިމިނަލް ކޯޓް ހިންގަމުންދާ ހަތަރުބުރީގެ އިމާރާތަކީ ވަރަށް ބޮޑަށް ބައުވެފައިވާ ތަނަކަށްވެ ވަރަށް ބޮޑަށް އެއިމާރާތް ހަލާކުވެފައިވާތީ ކަމާބެހޭ މާހިރުން ލައްވާ  އިންސްޕެކްޝަނެއް ހަދާފައި ކަމަށެވެ.

ކްރިމިނަލް ކޯޓް ހިންގާ އިމާރާތުގެ އިންސްޕެކްޝަނަށްފަހު، އެއިމާރާތް އިތުރަށް ބޭނުންކުރުމަކީ އެއްވެސް މިންވަރަކަށް ރައްކާތެރި ކަމެއް ނޫންކަމަށް ކަމާބެހޭ ފަންނީ މާހިރުން އިރުޝާދު ދެއްވާފައިވާ ކަމަށް ޖޭއެސްސީން ވަނީ ބުނެފައެވެ.

ކްރިމިނަލް ކޯޓް ވަގުތީ ގޮތުން އެހެން އިމާރާތަކަށް ބަދަލުކުރުމަށް ކުރަން ޖެހޭ މަސައްކަތްތައް ނިމެންދެން ކޯޓުގެ މުވައްޒަފުންނާއި ހިދުމަތް ހޯދާ އެންމެހައި ފަރާތްތަކުގެ ސަލާމަތަށްޓަކައި  އަމަލުކުރާނެ ބައެއް ކަންކަން ޖޭއެސްސީން ވަނީ ކަނޑައަޅާފައެވެ.

އެގޮތުން:

– ކްރިމިނަލް ކޯޓު ހިންގަމުން ދާ ދެ އިމާރާތުގެ ތެރެއިން ހަތަރުބުރީގެ ބައު އިމާރާތް ބޭނުންކުރުން ވަގުތުން ހުއްޓާލުން.

– ކޯޓުން ބޭނުންކުރަމުންދާ އެކްސްޓެންޝަން އިމާރާތުގައި ކުރެވެން ހުރި މަސައްކަތްތައް އަލުން ތަރުތީބުކޮށް ހުއްޓާނުލައި ކުރިއަށްގެންދިއުން.

– ކޯޓުގެ މަސައްކަތްތައް މަސައްކަތައް ތަރުތީބުކޮށް, ޝަރީއަތްތަކާއި ކޯޓުގެ މަސައްކަތްތައް އޮންލައިންކޮށާއި, ވޯކް ފްރޮމް ހޯމްގެ އުސޫލުގެ ދަށުންނާއި, ޝިފްޓު ޑިއުޓީގެ އުސޫލުން މަސައްކަތްކުރެވޭނެ އިންތިޒާމު ހަމަޖައްސައި، ކޯޓުގެ ހިދުމަތް ވީހާވެސް ރަނގަޅަކަށް ދެވޭނޭ އިންތިޒާމްތައް ހަމަޖެއްސުން.

ކްރިމިނަލް ކޯޓުގެ އިމާރާތް ބާވެ އިމާރާތުގެ ބައެއް ބައިތައް ވަނީ ވެއްޓިފައެވެ. އަދި ވިއްސާރަ ދުވަސް ދުވަހު ބައެއް ކޯޓް ރޫމް ތަކަށް ފެންވަނުމުގެ ސަބަބުން މީގެ ކުރިން ބައެއް ޝަރީއަތްތައް ކުރިއަށް ނުގެންދެވިގެން ކެންސަލް ވެފައި ހުރިކަން ފާހަގަ ކޮށްލެވެއެވެ.