ނަޝީދު ޑިމޮކްރެސީގެ ވާހަކަދައްކަނީ ވެރިކަން ހޯދުމަށްކަން ސާފު: އިބްރާހިމް ޝަރީފް

އެމްޑީޕީގެ ރައީސް މުހައްމަދު ނަޝީދު، ވޭތުވެދިޔަ އަހަރުތަކުގެ ތެރޭގައި ޑިމޮކްރެސީގެ ވާހަކަތައް ދެއްކެވީ ވެރިކަން ހާސިލު ކުރެއްވުމަށްކަން ސާފުވެވަޑައިގެންފައިވާކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ރިޔާސީ އިންތިހާބާއި ގުޅުވައި ރައީސް ނަޝީދު އަދި ރައީސް އިބްރާހިމް މުހައްމަދު ސާލިހު އަދި ތާއީދު ކުރައްވާ ފަރާތްތަކުގެ ދެމެދު ބައިބައިވުންތައް އުފެދިފައިވާއިރު، ރައީސް ނަޝީދުގެ ފިކުރެއްގެ ދިރުމުން ދަނީ ޖުމްހޫރީ ޕާޓީ އާއިއެކު ހަރަކާތްތެރިވަމުންނެވެ. ޝަރީފް ވަނީ ރައީސް ނަޝީދުގެ ފަރާތުން ނޭދެވޭ އަމަލުތައް ފެނިގެންދާކަމަށް ފާހަގަކުރައްވާ، ނުރުހުން ފާޅުކުރައްވާފައެވެ.

އޭނާ ވިދާޅުވީ، ޕްރައިމަރީގައި ލިބިވަޑައިގެންފައިވާ ނާކާމިޔާބީ ގަބޫލުނުކުރެއްވުމުގެ އިތުރުން ރައީސް ނަޝީދު ދަނީ އިދިކޮޅުގެ ފަރާތްތަކާއި ގުޅިގެން އެމްޑީޕީ އާއި ދެކޮޅަށް މަސައްކަތްތަކެއް ކުރައްވަމުންކަމަށެވެ. އަދި އެ މަސައްކަތްތައް ކުރައްވަމުންދަނީ އެ ޕާޓީގެ މެމްބަރުންގެ ނިންމެވުމަށް ގޮންޖެއްސެވުމަށް ފަހު ކަމަށާއި، އެކަމުގެ ސަބަބުން ރައީސް ނަޝީދަކީ ޑިމޮކްރެސީގެ ހަމަތައް ގަބޫލު ކުރައްވާ ބޭފުޅެއް ނޫންކަން އެނގިގެންދާކަމަށް ޝަރީފް ވިދާޅުވިއެވެ.

@MohamedNasheed mihaaru amalu kuravvamun dhaagothun democracy ey kiyaigen dhakkavamun ai vaahaka thakakee hamaekani verikan hoadhevvumah beynun kuravvaa ulhulheh kan maabodah saafu vejje. Idhikolhu party thakaa gulhigen ekuravvanee e manikufaanah molheh libey kuravvaa masakkatheh

— Ibrahim Shareef (@AdduShareef) March 23, 2023

ޝަރީފް ވިދާޅުވީ، ރައީސް ނަޝީދު އަމަލު ކުރައްވަމުން ދާ ގޮތުން ދައްކަވަމުން އައިސްފައިވާ ޑިމޮކްރެސީގެ ވާހަކަތަކަކީ ވެރިކަން ހާސިލު ކުރެއްވުމަށް ބޭނުން ކުރެއްވި އުކުޅެއްކަން ސާފުވެވަޑައިގެންފައިވާކަމަށެވެ. އަދި އިދިކޮޅު ފަރާތްތަކާއި އެކު މަސައްކަތްކުރައްވަމުންދަނީ އެމަނިކުފާނުގެ ނަފްސަށް މޮޅެއް ހޯއްދެވުމުގެ މަގުސަދުގައިކަމަށް ޝަރީފް ވިދާޅުވިއެވެ.

އޭނާ ވިދާޅުވީ، ރައީސް ނަޝީދަށް މުހިންމީ އެމްޑީޕީއަށް ވެރިކަން ލިބިގެންދިއުން ނޫންކަމަށެވެ. އަދި އެމަނިކުފާނު ނޫން ބޭފުޅަކަށް ވެރިކަން ލިބިގެންދާ ނަމަ ޕާޓީ ފުނޑާލުމަށް އެމަނިކުފާނު ބޭނުންވެވަޑައިގަނަންވާކަމަށްވެސް އޭނާ ވިދާޅުވިއެވެ. އޭނާ ވިދާޅުވީ، ރައީސް ނަޝީދު އަމަލުކުރައްވަމުންދާ ގޮތާއިމެދު ޕާޓީ އަށް އިހުލާސްތެރި މެމްބަރުން ފުންކޮށް ވިސްނާ ވަޑައިގަންނަވަންޖެހޭކަމަށެވެ. ޝަރީފް ވިދާޅުވީ ރައީސް ނަޝީދާއިމެދު ލަސްނުކޮށް ފިޔަވަޅު އަޅަންޖެހޭކަމަށެވެ.