އެމްޑީޕީއިން ކެމްޕެއިން ކުރުމަށް ދައުލަތުގެ ވަސީލަތްތައް ބޭނުންކުރަމުންދާކަން ފާހަގަކުރައްވާ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ނުރުހުންފާޅުކުރައްވައިފިއެވެ.
ގުރައިދޫ ބައި އިލެކްޝަންގައި ވެރިކަން ކުރާ ޕާޓީގެ ކެމްޕެއިން ހަރަކާތްތަކަށް ސްޓެލްކޯގެ ދެ ލޯންޗެއް ހާއްސަކޮށްފައިވާކަމަށް ސައީދު ފާހަގަކުރެއްވިއެވެ. އޭނާ ވިދާޅުވީ، ރައީސް އިބްރާހިމް މުހައްމަދު ސާލިހުގެ ސަރުކާރުން ހިންގާ އަމަލުތައް މިހާރުވަނީ ދައުލަތުގެ މުއައްސަސާތަކުން ތެދުވެ ހުއްޓުވަންޖެހޭ ހާލަތުގައިކަމަށެވެ.
އޭނާ ވިދާޅުވީ، އެފަދަ ”ޖާހިލު“ އަދި ނުބައި އަމަލުތައް ހިންގަމުންދަނީ ސަރުކާރަށް ނިސްބަތްވާ މަދު ބައެއްކަމަށެވެ. އަދި އެ ފަރާތްތަކުން ދެކޭ ގޮތުގައި ސަރުކާރު ނުދެހެއްޓިއްޖެ ހާލަތެއްގައި އެ ފަރާތްތަކުގެ ދިރިއުޅުން ދެކޮޅު ޖެއްސުމުގައިވެސް ދަތިތައް ކުރިމަތިވެގެންދާނެކަމަށާއި އެއީ ކުށް ހީއެއްކަމަށްވެސް ސައީދު ފާހަގަކުރެއްވިއެވެ.
ދައުލަތުގެ މުއައްސަސާތައް ތެދުވެ ހުއްޓުވަންޖެހޭ ޙާލަތައް ސަރުކާރުގެ މަދުބައެއްގެ ޖާހިލުކަމާއި ނުބައިކަން މިވަނީވެއްޓިފަ. އެފަރާތްތައް ދެކޭގޮތުގައި މިސަރުކާރު ދަމަހައްޓައިގެންމެނުވީ އެމީހުންގެ ދިރިއުޅުމާއި ކުރިމަގު ދެކޮޅުނުޖެއްސޭނެ! އެއީކުންހީއެއް. https://t.co/NsIIBhbPVC
— Mohamed Saeed (@em_saeed) March 26, 2023
ދައުލަތުގެ ވަސީލަތްތައް ކެމްޕެއިން ކުރުމުގައި ބޭނުންކުރަމުންދިއުމާއި އެކު، ސައީދު ކަންބޮޑުވުން ފާޅުކުރައްވާފައިވާއިރު، މީގެ ކުރިންވެސް އިދިކޮޅު ޕީޕީއެމްއިންވަނީ އެކި ފުރުސަތުތަކުގައި ރައީސް ސާލިހުގެ ސަރުކާރުން އެފަދަ އަމަލުތައް ހިންގަމުންދާކަން ފާހަގަކޮށްފައެވެ. އިދިކޮޅު ޕީޕީއެމްގެ އިތުރުން އެމްޑީޕީގެ ރައީސް ނަޝީދަށް ތާއީދު ކުރައްވާ މެމްބަރުންވެސް ވަނީ މި ތުހުމަތުތައް ކޮށްފައެވެ. އެގޮތުން އެ ޕާޓީގެ ޗެއަރޕާސަން ހޮވުމަށް ބޭއްވި އިންތިހާބުގައި ސަރުކާރު ފެކްޝަނުން ވޯޓު ލާ މީހުން ގެނައުމަށްޓަކައިވެސް ދައުލަތުގެ ވަސީލަތްތައް ބޭނުންކޮށްފައިވާކަމަށް ބުނެފައިވާކަން ފާހަގަކޮށްލެވެއެވެ.
