އިސްލާހީ މަސައްކަތުގެ ޒިންމާ އޮތީ ވަކި މީހެއްގެ މައްޗަކަށް ނޫން: އިމްރާން

އެންމެހާ މީސްތަކުން އިސްލާހު ކުރުމުގެ މަސައްކަތަކީ ވަކި އެކަކުގެ މައްޗަށް އެޅިފައިވާ ޒިންމާއެއް ނޫންކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

ރައީސް އިބްރާހިމް މުހައްމަދު ސާލިހުގެ ކޯލިޝަން ދައުވަތު ގަބޫލު ކުރި އެންމެ ފުރަތަމަ ޕާޓީއަށް އަދާލަތުވުމާއިއެކު ގިނަ ފާޑުކިޔުންތައް އަމާޒުވެފައިވާ އިމްރާން ގެންދަވަނީ ވަކި ފަރާތަކަށް ސީދާ ނިސްބަތް ނުކުރައްވައި ސިޔާސީ މަސްރަހުގައި ހިނގަމުންދާ ކަންކަމަށް ފާޑުވިދާޅުވަމުންނެވެ. އަދި ދާދި ފަހުން ކުރެއްވި ޓްވީޓެއްގައި ސިންގާއެއް ގެންގޮސް ފައިނުޖެހޭ ހިސާބު މޫދަށް ބޭލުމުން އަޑިއަށް ހިނގައިދާކަމަށް ވިދާޅުވުމުން ވެސް އޭނާއަށް ގިނަ އަދަދެއްގެ އާންމުން ފާޑުކިޔާފައިވެއެވެ.

އެމްޑީޕީގެ ތެރޭގައި ކޮރަޕްޝަންގެ އަމަލުތައް ގިނަވެފައިވާކަމަށް އެމްޑީޕީގެ ރައީސް މުހައްމަދު ނަޝީދުގެ ފިކުރެއްގެ ދިރުމުންނާއި ހުދު އެމަނިކުފާނުވެސް ތަކުރާރު ކުރައްވަމުންދާއިރު، އިމްރާން ވަނީ އިސްލާހީ މަސައްކަތްތަކުގެ މައްޗަށް އަލިއަޅުއްވައި އޭނާ ދެކިވަޑައިގަންނަވާ ގޮތް ހިއްސާ ކުރައްވާފައެވެ.

އިމްރާން ވިދާޅުވީ، ދުނިޔޭގެ އެންމެން އިސްލާހުކޮށް ހެޔޮލަފާ މީހުންނަށް ހެދުމުގެ މަސައްކަތަކީ ވަކި ފަރާތެއްގެ ޒިންމާއެއް ނޫންކަމަށެވެ. އޭނާ ވިދާޅުވީ، އެ މަސައްކަތުގެ މަސްއޫލިއްޔަތު އެޅިފައިވަނީ އެކަކުގެ މައްޗަށް ނޫންކަމަށެވެ.

Dhuniyeyge enmen islaah koh heyo meehunah hedhumee thibaage zinmaaeh, masuooliyyatheh nooneve.
Eheneh kamaku thibage zinmaa akee amilla nafusu islaahu kurumaa eku,aaila aa,anekun islaahukurumuge masahkathugai,ikhlaastherikamaa eku, foohikameh, maayoos kameh nethi dhemi hurumeve.

— Imran Abdulla (@ShimranAb) March 31, 2023

އިމްރާން ވިދާޅުވީ، އެ މީހެއްގެ މަސްއޫލިއްޔަތަކީ އަމިއްލަ ނަފްސު އިސްލާހުކުރުންކަމަށެވެ. އޭނާ ވިދާޅުވީ، ނަފްސާއިއެކު އާއިލާ އަދި އެހެނިހެން ފަރާތްތައްވެސް އިސްލާހު ކުރުމުގެ މަސައްކަތްތައްވެސް ކުރުމަކީ ކޮންމެ މީހެއްވެސް އިިހުލާސްތެރިކަމާއިއެކު ފޫހިވުމާއި މާޔޫސްކަމެއް ނެތި އަބަދުމެ އަދާ ކުރުމުގައި ދެމިހުންނަންޖެހޭ ޒިންމާއެއްކަމަށެވެ.