ސިޓީ ކައުންސިލުން ޔޫތު މިނިސްޓްރީގެ މުދަލަށް އަރައިގެންފައިވާކަމަށް ތުހުމަތުކޮށްފި

މާލެ ސިޓީ ކައުންސިލުން ހުއްދަ ނެތި ޔޫތު މިނިސްޓްރީގެ މުދާތައް ނަގާފައިވާކަމަށް ފާހަގަކުރައްވާ މިނިސްޓަރު އަހުމަދު މަހްލޫފް ނުރުހުން ފާޅުކުރައްވައިފިއެވެ.

ޔޫތު މިނިސްޓްރީގެ ބިމެއްގެ ތެރޭގައި ހުރި ގުދަނަކަށް މާލެ ސިޓީ ކައުންސިލުގެ މުއައްޒަފުން ވަދެފައިވާ މައްސަލައިގައި މިނިސްޓަރު ކުރެއްވި ޓްވީޓެއްގައި އޭނާ ވިދާޅުވީ، ކައުންސިލުގެ މުއައްޒަފުންވަނީ ހުއްދައެއް ހޯދުމެއްނެތި، އެ މިނިސްޓްރީގެ ބެލުމުގެ ދަށުގައި ހުރި ގުދަނެއްގެ ތަޅު ހަލާކުކޮށްލާފައިކަމަށެވެ. އަދި އެއަށްފަހު އެތަނުގައި ގުދަންކޮށްފައިހުރި އަގުބޮޑެތި ސާމާނުތައް ކައުންސިލުން ގެންގޮސްފައިވާކަމަށް މަހްލޫފް ފާހަގަކުރެއްވިއެވެ.

އޭނާ ވިދާޅުވީ، ސިޓީ ކައުންސިލުން ހިންގަމުންދާ އަމަލުތައް ވަގުތުން ވަގުތަށް ހުއްޓާލުމަށް ގޮވާލައްވާކަމަށެވެ. މަހްލޫފް ވިދާޅުވީ، ކައުންސިލުން ގެންގޮސްފައިވާ އެ މިނިސްޓްރީގެ ތަކެތީގެ ތެރެއިން ގެއްލޭ އަދި ހަލާކުވާ ތަކެއްޗަށް ޒިންމާ ނަގަންޖެހޭނީ ސިޓީ ކައުންސިލުންކަމަށެވެ.

ޔޫތު މިނިސްޓްރީގެ ބިމެއްގެ ތެރެއަށްވަދެ އެތަނުގައިހުރި ގުދަނުގެ ތަޅުހަލާކުކޮށްލާ ގުދަންކޮށްފައި ހުރި އަގުބޮޑު ސާމާނުތައް ގެންދަނީ.

މިކަން ވަގުތުން ހުއްޓާލުމަށް ސިޓީ ކައުންސިލްއަށް ގޮވާލަން. އަދި ގެއްލޭ ތަކެއްޗާއި ގެއްލުންލިބޭ ތަކެއްޗަށް ޒިންމާ އުފުލަންވާނެ. pic.twitter.com/fJLLdB8Tzh

— Ahmed Mahloof (@AhmedMahloof) March 31, 2023

މިނިސްޓަރުގެ ވާހަކަތަކާއި ގުޅިގެން ސިޓީ ކައުންސިލުންވަނީ ކައުންސިލުގެ ރަސްމީ ޓްވީޓާރ މެދުވެރިކޮށް ރައްދު ދީފައެވެ. ކައުންސިލުން ބުނެފައިވާގޮތުން އެ ކައުންސިލަކުން ގާނޫނު އަދި ގަވައިދުތަކާއި ހިލާފު އެއްވެސް އަމަލެއް ހިންގާފައިނުވާނެއެވެ. އަދި ނުވެސް ހިންގާނެއެވެ. އެހެންނަމަވެސް މި މައްސަލަ ހިނގައިދިޔަ ގޮތް ބަލާނެކަމަށާއި އެ މައްސަަލައިގެ ތަފްސީލުތައް ހާމަކުރާނެކަމަށް ބުނެފައިވެއެވެ.