ޕާޓީއަށް އެކަށީގެންވާ ހިދުމަތްތަކެއް ނުކުރާތީ އާއި، ޕްރައިމެރީގައި ވާދަކުރުމަށް ކަނޑައެޅި ބައެއް މުހިންމު ޝަރުތުތައް ފުރިހަމަ ނުވާތީ ބައެއް ކެންޑިޑޭޓުންގެ ފޯމުތައް ބަލައިނުގަތުމަށް ނިންމި ނިންމުން އަނބުރާ ގެންދަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފި އެވެ.
މާޗު މަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބަށް ކޮންގްރެސް ކޯލިޝަނުގެ ޕާޓީއަށް އެދި ގިނަ ބަޔަކު ފޯމު ހުށަހެޅި އެވެ. އެކަމަކު ބައެއް ޝަރުތުތަކެއްގެ ސަބަބުން، ކެންޑިޑޭޓުންގެ ފޯމުތައް ބަލައިގަނެވެން ނެތްކަމަށް ނިންމައި އެކަން ރަސްމީކޮށް ރޭގެ ވަގުތެއްގައި އެންގި އެވެ. އޭގެ ސަބަބުން ގިނަ ބަޔަކު ކަންބޮޑުވުން ފާޅުކުރަމުން ދަނިކޮށް ޕީއެންސީގެ ޗެއާޕާސަން އަބްދުއްރަހީމް ވިދާޅުވީ ޕާޓީގެ ޕްރައިމެރީގައި ވާދަކުރުމަށް ނަން ހުށަހެޅުއްވި ބައެއް ފަރާތްތަކަށް ވާދަ ނުކުރެވޭނެކަމަށް ނިންމުމުން ގިނަ ޝަކުވާތަކެއް ލިބުނުކަމަށެވެ. އަދި އެއަށް ރިއާޔަތް ކުރުމަށް ފަހު ޕްރައިމެރީގައި ވާދަކުރުމަށް ނަން ހުށެހެޅި ހުރިހާ ކެންޑިޑޭޓުންނަށް ވެސް ވާދަކުރެވޭ ގޮތަށް އުސޫލަށް ބަދަލު ގެނައުމަށް ޕާޓީގެ ރައީސްގެ ހައިސިއްޔަތުން ރައީސް މުއިއްޒު ނިންމަވާފައިވާކަމަށް އަބްދުއްރަހީމް ވިދާޅުވި އެވެ.
ޕީ.ޕީ.އެމް/ޕީ.އެން.ސީގެ ޕްރައިމަރީގައި ވާދަކުރައްވަން ނަން ހުށަހެޅުއްވި ބައެއް ބޭފުޅުންނަށް ކުރިމަތި ނުލެވޭގޮތަށް ނިންމުމާ ގުޅިގެން ހުށަހެޅުނު ޝަކުވާތަކަށް ރިޢާޔަތް ކުރެއްވުމަށްފަހު،ޕްރައިމަރީގައި ވާދަކުރަން ނަން ހުށަހެޅުއްވި ހުރިހައި ބޭފުޅުންނަށް ވާދަކުރެއްވޭގޮތަށް ޕްރައިމަރީ…
— Abdul Raheem Abdulla (@Banafsaa) January 22, 2024
ރައްޔިތުންގެ މަޖިލީހުގެ އިންތިހާބުގެ ތިންބައިކުޅަ، ދެބައި ގޮނޑިތައް ކާމިޔާބު ކުރެވޭނެކަމުގެ އުންމީދު އެބައޮތްކަމަށް ރައީސް ވިދާޅުވެފައި ވެއެވެ. އެމަނިކުފާނު ވިދާޅުވީ މަޖިލީހަށް އިންތިހާބުވުމަށް ބޭނުން ވަނީ ތައުލީމީ ގޮތުން ގާބިލު ޒުވާން މޫނުތަކެއް ކަމަށެވެ. އަދި ސަރުކާރުގެ ސިޔާސަތުތައް ތަންފީޒު ކުރުމަށް މަޖިލީހުގައި ސަރުކާރުގެ މެމްބަރުން ތިބުން މުހިންމުކަން ފާހަގަކުރައްވާފައި ވެއެވެ.
20 ވަނަ ރައްޔިތުންގެ މަޖިލީހަށް ގިނަ އަންހެނުން ކުރިމަތިލުމަށާއި، އެކަމަށް ހިތްވަރުދެއްވާނެކަމަށް ރައީސް މުއިއްޒު ވިދާޅުވެފައި ވެއެވެ. އެމަނިކުފާނު ވިދާޅުވީ މަޖިލިސް އިންތިހާބުގައި ވީހާވެސް ގިނަ އަންހެނުން ހޮވުމަށް އެދޭ ކަމަށެވެ. އަދި ޕީޕިއެމް/ޕީއެންސީން މަދުވެގެން 20 އިންސައްތަ ގޮނޑިއަށް ކުރިމަތިލައި އިންތިހާބުވުމަށް އެދޭކަމަށް ވެސް ވިދާޅުވި އެވެ.
