ކުއްޖާގެ ފުރަތަމަ 1000 ދުވަހަށް އަމާޒުކޮށްގެން ތައްޔާރު ކުރެވިފައިވާ ”ތުއްތު ދަރިފުޅުގެ ”މިންހެޔޮ ކާނާ ފޮތް“ ލޯންޗް ކޮށްފިއެވެ.
މި ފޮތް ލޯންޗު ކުރުމުގެ ރަސްމިއްޔާތު އޮތީ މިއަދު ހެދުނު މިނިސްޓްރީ އޮފް ހެލްތުގެ މޫމިނާ ޙަލީމް މާލަމްގައެވެ. މި ރަސްމިއްޔާތުގެ މަޤުޞަދަކީ ކުޑަކުދިންގެ ނިއުޓްރިޝަން ޙާލަތު ރަނގަޅު ކުރުމަށް، ކުއްޖާގެ ފުރަތަމަ 1000 ދުވަހަށް އަމާޒު ކޮށްގެން ތައްޔާރު ކުރެވިފައިވާ ”ތުއްތު ދަރިފުޅުގެ މިންހެޔޮ ކާނާ ފޮތް“ ނެރުންކަމަށް މިނިސްޓްރީއިން ބުނިއެވެ.
މި ރަސްމިއްޔާތު ޝަރަފުވެރި ކޮށްދެއްވީ މިނިސްޓަރ އޮފް ހެލްތު ޑރ. ޢަބުދުﷲ ޚަލީލްއެވެ. އަދި މިބައްދަލުވުމުގައި ޔުނިސެފް އިން ރާއްޖެއަށް ކަނޑައަޅުއްވާފައިވާ ޑެޕިއުޓީ ރެޕްރެޒެންޓެޓިވް, އިސީ ފޭންގޯލްޑް ބައިވެރިވެ ވަޑައިގެންނެވިއެވެ. މީގެ އިތުރުން ކަމާގުޅުންހުރި ބައެއް ވުޒާރާތަކާއި ޞިއްޙީ ޚިދުމަތްތެރިންނާއި އަމިއްލަ ޖަމްޢިއްޔާތަކުގެ ބޭފުޅުންނާއި އަދިވެސް ގުޅުންހުރި އެހެނިހެން އިދާރާތަކުގެ ބޭފުޅުން މިރަސްމިއްޔާތުގައި ބައިވެރިވެ ވަޑައިގެންނެވިއެވެ.
ތުއްތު ދަރިފުޅުގެ މިންހެޔޮ ކާނާ ފޮތަކީ ކުޑަކުދިންގެ ނިއުޓްރިޝަންގެ ޙާލަތު ރަނގަޅުކޮށް، ދުޅަހެޔޮ ޞިއްޙަތަކަށް މަގުފަހިކޮށްދިނުމުގެ ގޮތުން ކުއްޖާގެ ފުރަތަމަ 1000 ދުވަހަށް އަމާޒު ކޮށްގެން ހެލްތު ޕްރޮޓެކްޝަން އެޖެންސީ އާއި ޔުނިސެފް ގުޅިގެން އެކުލަވާލެވިފައިވާ ”ސޯޝަލް އެންޑް ބިހޭވިއަރ ޗޭންޖް ކޮމިއުނިކޭޝަން ސްޓްރެޓަޖީ“ ގެ ދަށުން ކުރެވޭ މުހިއްމު މަސައްކަތެއްކަމަށް މިނިސްޓްރީއިން ބުނިއެވެ. އަދި މިފޮތް ”ތުއްތު ދަރިފުޅުގެ މިންހެޔޮ ކާނާ“ ތައްޔާރު ކުރެވިފައި މިވަނީ ހެލްތު ޕްރޮޓެކްޝަން އޭޖެންސީ އާއި ޔުނިސެފް އަދި އެޑްވަކޭޓިންގ ދަ ރައިޓްސް އޮފް ޗިލްޑްރެން (އާކް) ގުޅިގެން. މިފޮތު ގެ އީ-ބުކް ވާރޝަން މިއަދުން ފެށިގެން މިނިސްޓްރީ އޮފް ހެލްތުގެ ވެބްސައިޓުން ފެންނަން ހުންނާނެކަމަށް މައުލޫމާތު ދީފައިވެއެވެ.
މި ފޮތުގައި ހަމަސް ފުރުމުން ދަރިފުޅަށް ދޭނެ ފައިދާ ހުރި ކާނާ ފަށާނެ ގޮތާއި ފައިދާ ހުރި ތަފާތު ކާނާ އިޚުތިޔާރު ކުރާނެ ގޮތް އަދި ކެއިން ބުއިމުގެ އާދަކާދަތައް ބައްޓަން ކުރާނެ ގޮތުގެ މަޢުލޫމާތު ހިމެނެއެވެ.
ފޮތުގައި ހިމެނޭ ބައެއް މަޢުލޫމާތުތައް:
- އަލަށް ކާންދޭ ފަށާއިރު ބަލަންވީ ކަންކަން
- ތަފާތު ކާނާގެ ބާވަތްތަކާއި ލިބޭ ފައިދާ އަދި ކާންދިނުމުގައި އިތުރަށް ސަމާލުވާންވީ ކަންކަން.
- ކާނާ ރައްކާތެރި ކަމާއެކު ތައްޔާރުކޮށް ރައްކާ ކުރުން.
- ދަރިފުޅު ނުކާން އުޅުން ނުވަތަ ވަކި ކަހަލަ ކާނާ އެއް ނުކާން އުޅޭނަމަ ހަދާނެ ގޮތާއި ބަލިވެ އުޅޭ ދުވަސްވަރު ކާންދޭނެގޮތް.
މާބޮޑަށް ބަރުދަން ލުއިވެ ނުވަތަ މާ ބަރު ވަމުންދާނަމަ ކާންދިނުމުގައި ގެނެވިދާނެ ބަދަލުތައް.
މިންހެޔޮ ކާނާ ފޮތުގެ އިތުރުން ކުޑަކުދިންގެ ނިއުޓްރިޝަން ހާލަތު ރަނގަޅު ކުރުމަށް، ކުއްޖާގެ ފުރަތަމަ 1000 ދުވަހަށް އަމާޒު ކޮށްގެން މާބަނޑު ދުވަސްވަރު ސަމާލުކަން ދޭންވީ ކަންކަމާއި ކުއްޖާގެ ކެއިން ބުއިމާއި އިޖުތިމާޢީ ހުނަރުތައް ތަރައްޤީ ކުރާނެ ގޮތާއި އެހެނިހެން މުހިއްމު މަޢުލޫމާތުތަކުގެ މައްޗައް ތައްޔާރު ކުރެވިފައިވާ ވީޑިއޯތަކުގެ އިތުރުން ސޯޝަލް މީޑިއާ އިންފޯރގްރަފިކްސް ވެސް ޢާއްމު ކުރެވޭނެކަމަށް މިނިސްޓްރީއިން ބުނިއެވެ.
