އެންޓި ކޮރަޕްޝަން ކޮމިޝަން (އޭސީސީ) ހިނގަނީ ތިނަދޫ އުތުރު ދާއިރާގެ ޕީއެންސީ މެމްބަރު ސައުދުﷲ ހިލްމީގެ ކޮޓަރިކޮޅުގެ ތެރޭގައި ކަމަށް ތިނަދޫ ސިޓީގެ މޭޔަރު ތިނަދޫ ސިޓީގެ މޭޔަރ ސައުދު އަލީ ވިދާޅުވެއްޖެއެވެ.
ސައުދު މިހެން ވިދާޅުވެފައިވަނީ ތިނަދޫ ސިޓީގެ މޭޔަރު ސައުދު އަލީ އާއި ތިނަދޫ ކައުންސިލުގެ ކުރީގެ މެމްބަރުންތަކެއްގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އުފުލުމަށް އެންޓި ކޮރަޕްޝަން ކޮމިޝަން (އޭސީސީ)އިން ޕްރޮސެކިއުޓާ ޖެނެރަލްގެ އޮފީހުގައި އެދިފައިވާ ދަނޑިވަޅެއްގައެވެ.
މިކަމާއި ގުޅިގެން އޭސީސީން ނެރުނު ބަޔާނެއްގައި ބުނެފައިވާ ގޮތުގައި، އެ މައްސަލައިގައި ސައުދު އާއި ކުރީގެ ކައުންސިލަރުންތަކެއްގެ މައްޗަށް ދައުވާކޮށްދޭން އެދިފައިވަނީ ކައްކާ ގޭހުގެ ވިޔަފާރި ކުރުމަށް ގދ. ތިނަދޫއިން ބިމެއް ހޯދުމަށް އަމިއްލަ ކުންފުންޏަކުން އެދުމުން، އާންމުކޮށް ބީލަމަށް ހުޅުވާލުމަކާ ނުލައި އެ ކުންފުންޏަށް ބިން ދިން މައްސަލައިގައެވެ.
މި މައްސަލައާއި ގުޅިގެން ”ސަންގުން“ ސައުދުއާ ސުވާޅުކުރުމުން ވިދާޅުވީ، މިއީ ކަނޑައެޅިގެން ސިޔާސީ ގޮތުން އޭނާއާއި ޖައްސާލުމުގެ ގޮތުން ކުރަމުންދާ ކަމެއް ކަމަށެވެ. އަދި އޭސީސީ ހިނގަނީ މެމްބަރުގެ ކޮޓަރިކޮޅުގައިކަމަށް އޭނާ ވަނީ ތުހުމަތުކުރައްވާފައެވެ. ސައުދު ވަނީ އޭސީސީން އޭނާގެ މައްޗަށް ދައުވާ ކުރިޔަސް ތިނަދޫގެ ރައްޔިތުންނަށް ގޭހުގެ ޚިދުމަތް ފޯރުކޮށްދެއްވާނެކަމުގެ ފުރިހަމަ ޔަޤީންކަން ދެއްވާފައެވެ.
”އޭސީސީ ހިންގަނީ މެމްބަރުގެ ކޮޓަރިކޮޅުގެ ތެރޭގައި ކަމަށް ބޮޑަށް ޔަޤީންކުރެވެނީ، އެހެންވީމަތާ އޭސީސީގެ ބަޔާންތަކާއި އެއްޗެހި މެމްބަރު އަތުގައި ހުންނަނީ،“ ސައުދު
އާންމު އަސާސީ ޚިދުމަތްތަކަކީ ސަރުކާރުން ފޯރުކޮށްދެންޖެހޭ ޚިދުމަތެއްކަމަށާއި އަދި ރައީސް ޑރ. މުއިއްޒުވެސް ބާރުއަޅުއްވާފައިވަނީ ރައްކާތެރިނޫން އެއްވެސް އެއްޗެއް އާންމު ރައްޔިތުން ދިރިއުޅޭ ހިސާބުތަކާއި ދުރުގައި ބެހެއްޓުމަށް ކަމަށް ވީނަމަވެސް އޭސީސީގެ މިފަދަ އަމަލުތަކުން ހާމަވެގެންދަނީ އަސާސީ ޚިދުމަތްތައް ރައްޔިތުންނަށް ފޯރުކޮށްދޭން ނުޖެހޭކަމަށާއި ގޭސް ފަދަ ތަކެތި ރައްކާތެރި ތަންތަނުގައި ގުދަންކުރުން މުހިންމު ނޫންކަމުގައި ސައުދު ވިދާޅުވިއެވެ.
މީގެ އިތުރުން ސައުދު ވަނީ ގޭސް ގުދަން ނުކޮށް ވިއްކާކަމަށް ވަންޏާ ދެން ގޭސް ވިއްކަންވީ ކަނޑު އަޑީގައި ބަހައްޓައިގެން ނުވަތަ ބިމުގައި ނުޖެހި އެލުވާފައި ބަހައްޓައިގެންތޯ ސުވާލު އުފައްދަވާފައެވެ.
”ގުދަން ނުކޮށް ގޭސް ވިއްކާކަމަށް ވަންޏާ ދެން ގޭސް ވިއްކަންވީ ކަނޑު އަޑީގައި ބަހައްޓައިގެންތޯ؟ ނޫނީ ބިމުގައި ނުޖެހި އުޑުގައި ނުޖެހި އެލުވާލާފައި ބަހައްޓައިގެންތޯ ވިއްކަންވީ؟“ ސައުދު
ސަރުކާރުން ކޮންމެވެސް އެއްޗެކޭ ކިޔައިގެން ސައުދުގެ މައްޗަށް ދައުވާ ކޮށްދިނުމަށް އޭސީސީގައި އެދިފައިވާތީ އޭސީސީން ކަންކުރަމުން ގެންދަނީ އެމީހުނަށް ދީފައިވާ އިންސްޓްރަކްޝަނާއި އެއްގޮތަށް ކަމަށް ސައުދު ވިދާޅުވިއެވެ. މީގެ އިތުރުން ސައުދު ވިދާޅުވީ، ގޭހުގެ ޚިދުމަތަކީ މޯލްޑިވްސް ގޭސް ކޮމްޕެނީން ތިނަދޫއަށް ފޯރުކޮށްދޭންޖެހޭ ޚިދުމަތަކަށް ވީއިރު އެ ޚިދުމަތް ނުދީ އަމިއްލަ ފަރާތެއް ލައްވާ ޚިދުމަތް ފޯރުކޮށްދިނުމަކީ ބަޔަކަށް ކަނޑައެޅިގެން ނާޖާއިޒު ފައިދާ ހޯދާދިނުމަށް ކުރަމުންދާ ކަމެއް ކަމަށެވެ.
ތިނަދޫގައި މޯލްޑިވްސް ގޭސްއަށް އެއްލައްކަ އަކަފޫޓުގެ ބިމެއް ދީފައިވާއިރު އެ ޚިދުމަތް ފޯރުކޮށް ނުދީ އެހެން ބަޔަކާއި ހަވާލުކޮށްފައިވާއިރު އޭސީސީން ހަގީގަތުގައި ބަލަންވީ އެ މައްސަލަކަމަށް އޭނާ ވިދާޅުވިއެވެ.
”އޭސީސީން އަސްލު ހަޤީގަތުގައި ބަލަންވީ މޯލްޑިވްސް ގޭސްއަށް ކައުންސިލުން އެއްލައްކަ އަކަފޫޓޫގެ ބިމެއް ދީފައި އޮތް އިރު އެތަނުގައި އެ ޚިދުމަތް ނުދީ އަމިއްލަ މީހަކަށް ނާޖާއިޒު ފައިދާ ހޯދައިދޭން ކުރާ މައްސަލަ،“ ސައުދު
ސައުދު ވަނީ އެ މައްސަލަ އޭސީސީއަށް ހުށައަޅާފައިވާނެކަމަށް ވިދާޅުވެފައެވެ. އަދި އޭސީސީން ތަހުޤީގު ކުރިއަށް ގެންދިއުމަށް ހުށައަޅާފައިވަނީ މާފަހުން ތައްޔާރުކޮށްފައިވާ އެގްރީމަންޓަކަށް ރިއާޔަތްކޮށްކަމަށާއި އެއީ ސީދާ އޭނާ ފްރޭމްކުރުމުގެ ނިޔަތުގައި ކުރާކަމެއްކަމަށް އޭނާ ވިދާޅުވިއެވެ. ސައުދު ވަނީ ވަކި ފަރާތަކުން އަންގާގޮތަކަށް މައްސަލަ ބަލަން އޭސީސީން އުޅޭކަމަށް ކުރާ ތުހުމަތު ތަކުރާރުކުރައްވާފައެވެ. އަދި އޭސީސިން ކުރަމުންއެގެންދަނީ ވަރަށް ލަދުވެތި ކަމެއް ކަމަށް އޭނާ ވިދާޅުވިއެވެ.
ޤާނޫނުގައި ވަރަށް ސަރީހަކޮށް އާންމު ޚިދުމަތްތަކަށް އިއުލާނުކުރުމަކާ ނުލާ ބިން ދެވޭނެކަން ކަނޑައެޅިގެން ބަޔާންކޮށްފައިވާއިރު ކައުންސިލުން އާންމު ރައްޔިތުންނަށް އަސާސީ ޚިދުމަތްތައް ފޯރުކޮށްދިނުމަށް މަގުފަހިކޮށްދިނުމުން ކައުންސިލުތައް ކުއްވެރިކުރުމަކީ ބަލައިގަނެވޭނެކަމެއް ނޫންކަމަށް ސައުދު ވިދާޅުވިއެވެ.
އޭސީސީން މިހެން ކަންކުރާކަމަށް ވަނީނަމަ، ތިނަދޫގެ ރައްޔިތުންނަށް ބޭނުންވާ ކާޑުގެ ބާވަތްތައް ފޯރުކޮށްދޭތީ އާއި ރަށުގައި ވެހިކަލް ދުއްވާތީ އެކަމާވެސް އޭނާގެ މައްޗަށް ދައުވާ ނުކުރަނީ ކީއްވެތޯ އޭނާ ސުވާލު އުފެއްދެވިއެވެ.
ސައުދު ވަނީ ތިނަދޫގެ ރައްޔިތުންގެ ދިފާއުގައި ރައްޔިތުންގެ ކުރިމަގަށް ފޯރުކޮށްދެންޖެހޭ އަސާސީ ޚިދުމަތްތަކަށް މަޑުޖެހޭގޮތަކަށް އެއްވެސް ކަމެއް ނުކުރާނެކަމުގެ ފުރިހަމަ ޔަޤީންކަން ދެއްވާފައެވެ. މީގެ އިތުރުން ތިނަދޫގެ ތަރައްޤީއަށްޓަކައި ކުރަންޖެހުނު ކޮންމެ ކަމެއް ވެސް ކުރައްވާނެކަމަށް އޭނާ ވިދާޅުވިއެވެ. އަދި އޭސީސީން ދައުވާ ކުރިއަސް ނުކުރިޔަސް ތިނަދޫގެ ރައްޔިތުންނަށް ކައްކާ ގޭސް މެދުނުކެނޑި ފޯރުކޮށްދޭނެކަމުގެ ފުރިހަމަ ޔަޤީންކަން އޭނާ ދެއްވިއެވެ.
އަދި އޭސީސީން އޭނާގެ މައްޗަށް ކުރަމުންދާ ތުހުމަތުތަކަކީ ސައްތައިން ސައްތަ ސިޔާސީ ތުހުމަތުތަކެއް ކަމަށް އޭނާ ތަކުރާރުކުރެއްވިއެވެ.
