ބޭރުގެ ޓުއާ އޮޕަރޭޓަރުން އަތުން ނަގަން އުޅުނު ޖީއެސްޓީ ނުނަގާ ގޮތަށް ނިންމަން ސަރުކާރުން އުޅޭ ކަމަށާއި ނަމަވެސް، މިހާރު ގައުމަށް އިއާދަނުކުރެވޭ ގެއްލުމެއް ވެއްޖެ ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.
އެމްޑީޕީގެ ކޮންގްރެސްގައި ވާހަކަ ދައްކަވަމުން ފައްޔާޒް ވިދާޅުވީ، މި ސަރުކާރުން ގައުމުގެ އިގްތިސާދަށް އިއާދަނުކުރެވޭ ބޮޑެތި ގެއްލުންތަކެއް ދެމުންދާ ކަމަށެވެ. އެގޮތުން، ބޭރުގެ ޓުއާ އޮޕަރޭޓަރުން އަތުން ޖީއެސްޓީ ނަގަން އުޅުމަށްފަހު މިހާރު އަނެއްކާވެސް އެ ނުނަގަން ނިންމަން އުޅޭ ކަމަށް ފައްޔާޒު ވިދާޅުވިއެވެ.
ޖީއެސްޓީ ނުނަގަން ނިންމައިފިނަމަ އެކަން ރަނގަޅު ކަމަށާއި، މައްސަލައަކީ އެ ވާހަކަ ދެއްކުމުގެ ރާއްޖޭގެ ޓޫރިޒަމް ވިއްކަން ތިބި އެތައް ބަޔަކު ނުރުހި، ރާއްޖޭގެ ކްރެޑިބިލިޓީ ގެއްލިފައިވާތީ ކަމަށް އޭނާ ވިދާޅުވިއެވެ. ގާނޫނު ބަދަލުކުރިޔަކަސް ދެން އަނބުރާ އެއެއް ނުލިބޭނެ ކަމަށް އޭނާ ވިދާޅުވިއެވެ.
”ކުރަންނުޖެހޭ ކަމެއް ކޮށް، އަޅުގަނޑުމެންގެ އިންޑަސްޓްރީ ވިއްކަން ތިބި އެތައް ބައެއްގެ ނުރުހުމާއި، އަޅުގަނޑުމެންގެ ކްރެޑިބިލިޓީ އަޅުގަނޑުމެންގެ އިންޓެގްރިޓީ އެ ދިޔައީ ގެއްލިގެންނޭ. ދެނެއް އަނބުރާ އެއެއް ނުލިބޭނެ އެ ގާނޫނު ބަދަލުކުރިޔަކަސް. އެތައް ބިލިއަން ޑޮލަރެއްގެ ގެއްލުން އަޅުގަނޑުމެންނަށް ވެގެން އެ ދިޔައީ،“
މި ސަރުކާރުން ޓޫރިޒަމް އިންޑަސްޓްރީއަށް އެތައް ބިލިއަން ޑޮލަރެއްގެ ގެއްލުން ދީ އިގްތިސާދު ފަހަތަށް ވައްޓާލީ ތިރީހަކަށް އަހަރު ކަމަށް އޭނާ ވިދާޅުވިއެވެ. ޒުވާނުންތައް އުންމީދު ގެއްލި ރާއްޖެ ދޫކޮށް ދަމުންދާ ކަމަށާއި އަންހެނުންގެ އަޑު އިއްވޭނެ ގޮތެެއް ވެސް ނެތް ކަމަށް ވިދާޅުވިއެވެ. ޑޮލަރަށް ،ކާޑަށް އަދި ބޭހަށް ވެސް ގައުމު ޖެހިފައިވާ ކަމަށް އޭނާ ވިދާޅުވިއެވެ.
ފައްޔާޒް އިތުރަށް ވިދާޅުވީ، އެމްޑީޕީން އެތައް ބުރަ މަސައްކަތްތަކެއް ކޮށްގެން، ގެނައި ގާނޫނުއަސާސީއަކުން ތިން ބާރު ވަކިވެފައިވާ ނިޒާމެއް ގެނައި ނަމަވެސް، މިއަދު ކަން ވަނީ އެހެން ނޫން ކަމަށެވެ. ތިން ބާރު ވަތްކެއް ނުވި ކަމަށާއި ހައްގުތައް ގެއްލިފައިވާ ކަމަށާއި އުންމީދުތައް ދަނީ ފަނޑުވަމުން ކަމަށް ފައްޔާޒް ވިދާޅުވިއެވެ.
އުންމީދާއެކު ގާނޫނުއަސާސީއެއް ގެނައުމުން ވެސް އެހެން އެވަނީ ކީއްވެތޯ ސުވާލު އުފައްދަންޖެހޭ ކަމަށް އޭނާ ވިދާޅުވިއެވެ. އަދި އެމްޑީޕީގެ ވެރިކަން ބަދަލުވާއިރަށް ފެންނަނީ ގާނޫނުއަސާސީ އޮތް ގޮތަށް އޮއްވައި ހުރިހާ ބާރުތަކެއް އަތަަށް މަހާލައިގެން ބޭނުން އެއްޗެއް ހަދަމުންދާތަން ކަމަށެވެ.
