އެންވާރަމެންޓް މިނިސްޓަރު އައިޝަތު ޝައުނާ އަދި ފިޝަރީޒް މިނިސްޓަރު ޑރ. ހުސައިން ރަޝީދު ހަސަންއަށް ރުހުން ހޯދުމުގެ މައްސަލަ ރައްޔިތުންގެ މަޖިލީހަށް ފޮނުވައިފިއެވެ.
އެ މައްސަލަ ރައްޔިތުންގެ މަޖިލީހަށް ފޮނުވުމުން ދިރާސާ ކުރުމަށްވަނީ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީއަށް ފޮނުވާފައެވެ.
އެންވާރަމެންޓް މިނިސްޓަރުގެ މަގާމަށް ޝައުނާ އަދި ފިޝަރީޒް މިނިސްޓަރު ކަމަށް ޑރ. ހުސައިން އައްޔަނު ކުރައްވާފައިވަނީ މޭ ފަސް ވަނަ ދުވަހުއެވެ.
ކުރިން ހުރި ސައިންސް އެންޑް ޓެކްނޮލޮޖީ މިނިސްޓްރީ އުވާލުމަށް ފަހު އެ މިނިސްޓްރީގެ މަސައްކަތްތައް އެންވަޔަރަންމަންޓް މިނިސްޓްރީގެ ދަށަށް ބަދަލު ކުރުމަށާއި އެންވަޔަރަންމަންޓް މިނިސްޓްރީގެ ނަން މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ ނަމަށް ބަދަލު ކުރުމަށްވެސް ރައީސް ވަނީ ނިންމަވާފަ އެވެ.
ސައިންސް އެންޑް ޓެކްނޮލޮޖީ މިނިސްޓްރީ އުވާލާފައި މިވަނީ އެ މިނިސްޓްރީގެ ވަޒީރަކަށް ހުންނެވި މުހައްމަދު މަލީހް ޖަމާލް މިދިޔަ މާޗް މަހުގެ އެއްވަނަ ދުވަހު އިތުބާރު ނެތް ކަމުގެ ވޯޓެއް ނަގާ މަގާމުން ވަކިކުރުމަށްފަހު އެ ވުޒާރާ ހުސްކޮށް އޮންނަތާ ދުވަސްތަކެއް ފަހުންނެވެ.
ހުސައިން ފިޝަރީޒް މިނިސްޓަރު ކަމަށް އައްޔަން ކުރައްވާފައި މިވަނީ ކުރިން އެ މަގާމުގައި ހުންނެވި ޒަހާ ވަހީދު މަގާމުން ވަކި ކުރެއްވުމަށް ފަހު އެވެ.
