ރާދިކާ ރާއޯ އާއި ވިނޭ ސަޕްރޫ ޑައިރެކްޓްކުރި “ސަނަމް ތޭރީ ކަސަމް” ގެ ދެވަނަ ބައެއް ނިކުންނަން އުޅޭ ކަމުގެ އިޝާރާތެއް އެ ފިލްމުގެ ތަރި ހަރްޝްވަރްދަންގެ ފަރާތުން ލިބިއްޖެއެވެ.
2016 ވަނަ އަހަރު ހަރްޝްވަރްދަން ރާނޭ އާއި ޕާކިސްތާނުގެ އެކްޓްރެސް މައުރާ ހޯކޭން ލީޑް ރޯލުން ފެނިގެންދިޔަ މި ފިލްމަކީ މިއަދުވެސް ގިނަ ބައެއްގެ ސަމާލުކަމާއި ލޯބި ހޯދަމުން އަންނަ ފިލްމެކެވެ. މި ފިލްމު ދިވެހީންގެ ތެރޭގައި ވެސް ވަރަށް ބޮޑަށް މަޤުބޫލުވެގެން ދިޔައެވެ.
މި ފިލްމުގެ ތަރި ހަރްޝްވަރްދަން ރާނޭ ދާދި ފަހުން ދިން އިންޓަރވިއުއެއްގައި ވަނީ މި ފިލްމުގެ ޕްރޮޑިއުސަރުން ކަމުގައިވާ ރާދިކާ ރާއޮ އާއި ވިނޭ ސަޕްރޫގެ ފިލްމަކަށް ސޮއި ކޮށްފައިވާ ކަމަށް ބުނެފައެވެ. މި ހަބަރު ލިބުމާއި އެކު ފޭނުން ވަނީ ސަނަމް ތޭރީ ކަސަމް ގެ ދެވަނަ ބައި ބެލުންތެރިންނަށް ފެންނާނެ ކަމުގެ އުއްމީދެއް އުފެދި ވަރަށް ބޮޑަށް ޝައުގުވެރިކަން ފާޅުކޮށްފައެވެ. އެކަމަކު ސޮއި ކުރީ މި ފިލްމަށް ކަމެއް ނުވަތަ އެހެން ފިލްމަކަށް ކަމެއް އަދި ޔަޤީންވެފައެއް ނުވެއެވެ.
“އަޅުގަނޑުގެ ޑައިރެކްޓަރުން ރާދިކާ ރާއޯ އަދި ވިނޭ ސަޕްރޫ އަޅުގަނޑަށް ގުޅާފައި އެ މީހުން ބުނީ އެ މީހުން ފިލްމަކަށް މަސައްކަތް ކުރާ ވާހަކަ. އަޅުގަނޑު އެމީހުންގެ އެއްބަސްވުމެއްގައި ސޮއި ކުރިން. އަހަރެން ބުނީ އެއްވެސް ކަމެއް އެނގެން އަދި އަހާކަށް ވެސް ބޭނުމެއް ނޫން ކަމަށް. ފުރަތަމަ ފިލްމުގައި ވެސް މަސައްކަތް ކުރި ގޮތަށް މި ފިލްމުގައިވެސް މަސައްކަތް ކުރާނެ ކަމަށް. އެމީހުންގެ ކޯލެއް އަންނަ ކޮންމެ ފަހަރަކު އަހަރެން ހުންނާނަން.”