ރާއްޖޭގެ ރައްޔިތުންގެ އުންމީދަކީ ހުރިހާ ރަށެއްގައި ވެސް ބާރު ސްޕީޑުގައި ތަރައްގީގެ ޕްރޮޖެކްޓުތައް ކުރިޔަށް ދިއުންކަމަށާއި، އެކަމުގައި ބޭނުން ވަނީ ރައްޔިތުންގެ އިތުބާރުކަމަށް އިދިކޮޅުގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެ އެވެ.
2023 ގެ ރިޔާސީ އިންތިހާބުގައި ވާދަ ކުރައްވާ ޑރ. މުއިއްޒުގެ ރިޔާސީ ކެމްޕެއިނުގައި ދަނީ ރަށްތަކަށް ބޭނުންވާ ތަރައްގީއާއި ސަރުކާރުގެ އިހުމާލުތައް ފާހަގަކުރައްވައި އެކަމުގެ ހައްލު މެނިފެސްޓޯގައި ހިމަނުއްވަމުންނެވެ. ރަށްރަށުގެ ބަނދަރާއި، ފެނާއި ނަރުދަމާ އެއީ މުއިއްޒު ގަބޫލު ކުރައްވާ ގޮތުން ސަރުކާރުގެ ޒިންމާއެއްކަމަށް ދެކި ފުރިހަމަ ކުރަން ޖެހޭ އަސާސީ ހައްގެކެވެ.
ރިޔާސީ ކެމްޕެއިނަށް މިއަދު މުއިއްޒު ފުވައްމުލަކަށް ވަޑައިގަތުމުން، ގިނަ އަދަދެއްގެ އާންމުން ނިކުމެ މަރުހަބާ ކީއިރު އެއީ ޕާޓީން އުންމީދު ކުރި ވަރަށް ވުރެ ވެސް ގިނަ އަދަދެއްކަމަށް ބެލެވެ އެވެ. އަދި މުއިއްޒު ވެސް ވިދާޅުވި މިއީ މިހާތަނަށް ފުވައްމުލަށްއިންކީ އެންމެ ހޫނު މަރުހަބާ ކަމަށެވެ.
އިދިކޮޅުގެ މަސައްކަތްތައް ބިނާވެފައި ވަނީ، ތަރައްގީގެ މައްޗަށްކަމަށްވާއިރު މުއިއްޒު ވިދާޅުވީ މީގެ ފަސް އަހަރު ކުރީން ދިވެހިން ދެކުނީ ދުވަހަކު ވެސް ފެނިފައި ނުވާ މިންވަރެއްގެ ބާރު ސްޕީޑެއްގެ ތަރައްގީ ކަމަށެވެ. އެހެންވެ ކޮންމެ ރަށެއްގެ ރައްޔިތުންގެ އުންމީދަކީ، ބާރު ސްޕީޑުގެ ތަރައްގީކަމަށްވުމާއި އެކު މުއިއްޒު އެދިވަޑައިގަތީ ރާއްޖޭގެ ތަރައްގީއަށް ކުރަން ޖެހޭ ގިނަ މަސައްކަތްތަކެއް ހުރުމާއި އެކު ރައްޔިތުން އިތުބާރުކޮށް ފުރުސަތު ދިނުމަށެވެ.
އަޅުގަނޑު ދޭ ޔަގީންކަމަކީ ރައްޔިތުން ބޭނުންވާ ގޮތަށް ތަރައްގީ ގެންނާނަމޭ.. ނަތީޖާ ނެރެދޭނެކަން، ރައްޔިތުންނަށް ހުސް ވައުދެއް ނުވާނެކަން.. ނުކުރެވޭނެކަމަކަށް ވައުދެއް ނުވާނެކަން.. އަޅުގަނޑެއް ނުކުރެވޭނެކަމެއް، ނުކުރާނެކަމެއްގެ ވާހަކައެއް ނުދައްކާނަން.. މިވެރިކަމެއް ކުރާނެކަމަށް ބުނެފިއްޔާމުން އެކަމެއްކޮށް ނަތީޖާ ދައްކާނަން.
ސިޓީއަށް ބޭނުންވާ ތަރައްގީ ފާހަގަ ކުރައްވައި މުއިއްޒު ވިދާޅުވީ، ވައިގެ ބަނދަރު ބޮޑުކޮށް ތަރައްގީ ކުރުން މުހިންމު ކަމަށެވެ. އަދި މިއީ ރަނގަޅު ޕްލޭނެއްގެ ތެރެއިން މިހާރު ވެސް ފެށޭނެ މަސައްކަތެއްކަން ފާހަގަކޮށް މުއިއްޒު ވިދާޅުވީ ކޮންމެ މަޝްރޫއުއެއް ވެސް ކުރިޔަށް ގެންދަން ޖެހޭނީ ރަނގަޅަށް ތަރުތީބު ވެގެން ކަމަށެވެ.
މީގެއިތުރުން ފުވައްމުލަކުގެ ހޮސްޕިޓަލަކީ އެއީ މާލެއަށް ދާން ނުޖެހިި ހިދުމަތް ލިބޭ ގޮތަށް ފަރުމާ ކުރެވިފައިވާ ނިޒާމަކަށް ބަދަލު ކުރައްވާނެކަމަށް މުއިއްޒު ވިދާޅުވި އެވެ. މުއިއްޒު ވިދާޅުވީ އެ ހޮސްޕިޓަލުން ހުރިހާ ބައްޔަކަށް ބޭސްފަރުވާ ކުރެވޭނެ ކަމަށެވެ. އަދި ހުންނާނީ އެންމެ ފަހުގެ ޒަމާނީ ވަސީލަތްތައްކަމަށް ވައުދުވެވަޑައިގެންނެވި އެވެ.
މީގެއިތުރުން މުއިއްޒު ވަނީ ކުޑަކުދިންނާއި، މާބަނޑު މީހުންނަށް ހާއްސަކޮށް ހޮސްޕިޓަލެއް ތަރައްގީ ކުރުމަށް ވައުދުވެވަޑައިގެންފަ އެވެ.
މުއިއްޒު ވިދާޅުވީ ވަގުފު ބިންތައް ކަނޑައަޅައި، އެ ބިމުގައި ސަރުކާރުގެ ހިދުމަތްދޭ އިމާރާތްތައް ގާއިމު ކުރުމަށް މެނިފެސްޓޯގައި ހިމަނާފައިވާނެ ކަމަށެވެ. އެއީ ސިޓީތަކަށް ހާއްސަކޮށް މެނިފެސްޓޯގައި ހިމަނާފައިވާ ސިޔާސަތަކެވެ. މިއާއި އެކު ކޮންމެ ސިޓީއެއްގައި ޒަމާނީ ލައިބްރަރީއެއް ގާއިމު ކުރުން ހިމެނޭއިރު، އޭގެ ތެރޭގައި ފުވައްމުލައް ހިމެނި އެ ހިދުމަތް ދޭނެކަމަށް މުއިއްޒު ވިދާޅުވި އެވެ.
މެނިފެސްޓޯގައި އެންމެ ބޮޑު ސަމާލުކަމެއް ދީފައި ވަނީ ގެދޮރުވެރިކަމަށްވުމާއި އެކު އެއްވެސް ތަފާތު ކުރުމެއް ނެތި، ފުވައްމުލަކުގެ ރައްޔިތުންނަށް ވެސް ބޯހިޔަވާހިކަން ކަށަވަރުކޮށްދެއްވާކަމަށް މުއިއްޒު ވިދާޅުވި އެވެ.