ރަޝިއާގެ އަސްކަރީ ހަރަކާތްތަކާއި ގުޅޭގޮތުން ދޮގު ވާކަަތައް ފަތުރާ އެ ގައުމުގެ ރައްޔިތުންގެ މުދާތައް އަތުލުމަށް މަޝްވަރާތައްކުރަމުންދާކަމަށް ބައިނަލްއަގުވާމީ މީޑިއާތަކުން ރިޕޯޓުކޮށްފިއެވެ.
މީޑިއާތަކުން ބުނާގޮތުން، ރަޝިއާގެ އަސްކަރިއްޔާގެ ނަން ހަޑިވެގެންދާ ގޮތަށް އެ މުއައްސަސާގެ މަސައްކަތްތަކާއި ގުޅޭގޮތުން ދޮގު ހަބަރު ފަތުރާ މީހުންގެ މުދަލާއި ފައިސާ އަތުލުމަށް ވިސްނަމުންދާކަން ހާމަކުރީ ރަޝިއާގެ ގާނޫނު ހަދާ މަޖިލީހުގެ އިސް މެމްބަރެކެވެ.
ރަޝިއާގެ މަޖިލީހުގެ ރިޔާސަތު ބަލަހައްޓަވާ ފަރާތެއް އެ ގައުމުގެ މީޑިއާތަކާއި ހިއްސާކޮށްފައިވާގޮތުން، މިހާރު އެ ގައުމުން ވިސްނަމުންދަނީ ހަރުކަށި ފިކުރު ފެތުރުމާއި ރަޝިއާއާއި ދެކޮޅަށް މަސައްކަތްކުރާ މީހުންގެ އިތުރުން އަގު ވައްޓާލުމަށް މަސައްކަތްކުރަމުންދާ މީހުންގެ އަމަލުތައް ޖިނާއީ ކުށަކަށް ހެދުމަށެވެ. މީޑިއާތަކުން ބުނާގޮތުން އެ މަސައްކަތްތައް ކުރެވެމުންދަނީ ޔޫކްރެއިނަށް ސިފައިން ފޮނުވުމާއި ދެކޮޅަށް މަސައްކަތްކުރާ މީހުންގެ އަމަލުތައް ހުއްޓުވުމަށެވެ.
ރަޝިއާގެ މަޖިލިސް މެމްބަރު ވޮލޮޑިން ބުނެފައިވާގޮތުން ރަޝިއާ ސުންނާފަތިކޮށްލުމަށާއި ހިޔާނާތްތެރިވުމަށް މަސައްކަތްކުރާ މީހުން އެކަމުގެ ބަދަލު ދޭންޖެހޭނެއެވެ. އަދި އެކަން ކުރާނީ އެ މީހުންގެ މުދަލުން އަގު ދައްކައިގެންކަމަށާއި އެ ފަދަ މީހުންނަށް ދީފައިވާ ލަގަބުތައްވެސް އަތުލާނެކަމަށް ހިއްސާކުރިއެވެ. އޭނާ ބުނެފައިވާގޮތުން ކުރިއަށް އޮތް ދުވަސްތަކުގެ ތެރޭގައި އެކަން ރަޝިއާގެ މަޖިލީހަށް ހުށައަޅާނެކަމަށްވެސް ބުނެފައިވެއެވެ.
advertisment