ދިވެހި ފިލްމީ ދާއިރާގެ ރަނީ ނިޢުމާ މުޙައްމަދުގެ ފީޗާ ފިލްމު، ”ކަޅަކި“ގެ ޝޫޓިން ސްރީ ލަންކާގައި ފަށައިގެން ކުރިއަށް އެބަދެއެވެ.
މި ފިލްމަކީ ނިއުމާގެ ޕްރޮޑަކްޝަން ހައުސް ނިއުޒޯއިން ގެނެސްދޭ ދެވަނަ ފިލްމެވެ. ފިލްމުކުޅުމުގައި ގިނަ ދުވަސްތަކެއް ހޭދަކުރުމަށްފަހު، އެކްޓިންގެ ދާއިރާއިން ރިޓަޔަރކޮށް އަމިއްލަ އަށް އުފައްދައިގެން ގެނެސްދޭ ދެވަނަ ފިލްމު ”ކަޅަކި“ އެއްކޮށް ޝޫޓްކުރުމަށް ހަމަޖެހިފައިވަނީ ލަންކާގައި ކަމަށް ނިޢުމާ ބުނެއެވެ.
”ކަޅަކި“ގެ ކާސްޓުގައި ހިމެނެނީ ޔޫސުފް ޝަފީޢު (ޔޫއްޕެ)، ޢަލީ ސީޒަން، މުޙައްމަދު މަނިކް، ރިޝްފާ، ލަހޫގެ އިތުރުން ޝިޔާ އެވެ.
”ކަޅަކި“ ފިލްމުގެ ސްކްރީންޕްލޭ އާއި ޑައިރެކްޝަން ހަދަނީ މިވަގުތު ރާއްޖޭގައި ހުރި އެންމެ ހުނަރުވެރި އެއް ސްކްރީންޕްލޭ ލިޔުންތެރިޔާ އަދި ޑައިރެކްޓަރ ޔޫއްޕެއެވެ. ސަސްޕެންސް ތްރިލާ ”ކަޅަކި“ ކެމެރާކުރަނީ ދަބަ އެވެ.