ހަލުވިކަމާ އެކު ފެތުރެމުން އަންނަ ކޮރޯނާ ވައިރަސްގެ ބިރު ރާއްޖެ އަށް ވެސް ބޮޑެވެ. މި ބައްޔަށް “ޕޮޒިޓިވް” މީހަކު އަދި ނުފެނުނު ނަމަވެސް، ރައްޔިތުން ތިބީ ނުތަނަވަސް ކަމެއްގައެވެ. މިފަދަ ހާލަތެއްގައި އެންމެ ބޮޑު ޒިންމާއެއް ބޮލުގައި އެޅޭނެ ބަޔަކީ ހެލްތް މިނިސްޓްރީއެވެ. އެއީ ޝައްކެތް ވެސް އޮތް ކަމެއް ނޫނެވެ.
މިހެން ތިއްބައި ރައްޔިތުންގެ މި ނުތަނަވަސް ކަމަށް ކިރިޔާ ވެސް ލުޔެއް ލިބުނީ ޒިންމާދާރު މިނިސްޓަރަކާއި މިނިސްޓްރީއެއްގެ ސަބަބުންނެވެ. ވަގުތުން ވަގުތައް ރައްޔިތުންނަށް މަޢުލޫމާތު ފޯރުކޮށްދިނުމުގައި މިނިސްޓްރީއާއި ކަމާބެހޭ އެހެން އިދާރާތައް ގުޅިގެން ދަނީ ގިނަ މަަސައްކަތްތަކެއް ކުރަމުންނެވެ. ސިލްސިލާކޮށް ކޮންމެ ދުވަހަކު ޕްރެސް ކޮންފަރެންސްތައް ބާއްވާ، ރައްޔިތުންނަށް ދޭންޖެހޭ މައުލޫމާތާއި އިރުޝާދު މިނިސްޓްރީން ދަނީ ދެމުންނެވެ.
އިރުއިރުކޮަޅުން ފޯނަށް އިރުޝާދުގެ މެސެޖުތައް ފޮނުވައެވެ. މީސްމީޑިއާގައި ހާލަތު ދަނީ އަދާހަމަކުރަމުންނެވެ. ވޭތުވެ ދިޔަ 24 ގަޑިއިރު 700 އަށް ވުރެ ގިނަ މީހުނަށް ފޯނުން ޖަވާބުދާރީ ވެފައި ވެއެވެ. ވައިރަސް އަށް ޝައްކުކުރޭ މީހުން ކަރަންޓީން ކުރާނެ ތަންތަނާއި ފަރުވާދޭނެ ހާލަތު ހޯދާ މިނިސްޓްރީން ވަނީ ދުރާލާ ފިޔަވަޅުތައް އަޅާފައެވެ. ގައުމަށް އެތެރެވާ އެންމެން މޮނިޓާރކޮށް ސްކްރީން ކުރެވޭނެ އިންތިޒާމް ވަނީ ހަމަޖައްސާފައެވެ. އާނއެކެވެ. މިނިސްޓްރީން މި ދައްކަނީ ނަމޫނާއެވެ.
މިނިސްޓްރީ އެކަންޏެއް ނޫނެވެ. ދިވެހި ޑޮކްޓަރުން ވެސް މެއެވެ. ދިވެހި ޑޮކްޓަރުންނާއިއެކު ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ކޮންސަލްޓެންޓް އިން ރެސްޕިރޭޓަރީ މެޑިސިން، ޑރ. މޫސާ ހުސެއިން ވިދާޅުވީ، ކޮރޯނާ ވައިރަސްގެ އަލާމާތްތަކުގެ ތެރޭގައި ރޯގާ، ހުން، ކެއްސުން އަދި ކިނބިހި އެޅުން ހިމެނޭ ކަމަށެވެ. އެހެންކަމުން، ޑޮކްޓަރުން ލަފާދެއްވަނީ، މިފަދަ އަލާމާތެއް ފެނިއްޖެ ނަމަ، ވީހާ ވެސް އަވަހަކަށް ސިއްޚީ އެހީތެރިއަކަށް ދެއްކުމަށެވެ. އަދި އަލާމާތްތަކުގެ ގޮތުގައި ފެންނަ ކަންކަން މުޅިން ރަނގަޅު ވަންދެން ބޭރަށް ނުނުކުމެ ގޭގައި މަޑުކޮށްލުމަށް ޑޮކްޓަރުން އިރުޝާދު ދެއްވައެވެ.
ޑޮކްޓަރުން ބުނާ ގޮތުގައި، ރައްކާތެރިވުމުގެ ގޮތުން މާސްކު އަޅުމަކީ މައްސަލައެއް ނޫނެވެ. އެކަމަކު، މާސްކު އަޅަންޖެހެނީ ބަލީގެ އަލާމާތްތަށް ފެންނަ މީހުންނެވެ. ބަލި ނުޖެހި ނުވަތަ އެއްވެސް އަލާމާތެއް ނުފެންނަ މީހަކު މާސްކު އަޅާކަށް ނުޖެހޭނެއެވެ.
މިދުވަސްވަރު ސްކޫލްތައް ހުޅުވާފައި ބެހެއްޓުން ރައްކާތެރިތޯ ނޫސްވެރިއަކު ސުވާލުކުރުމުން ޑޮކްޓަރުން ބުނީ، އަދި މިހާތަނަށް ރާއްޖޭގައި މި ބަލި ޖެހިފައިވާ މީހަކު ހުރިކަން ކަށަވަރު ނުވާ ކަމަށެވެ. އަދި އެހެންވެ، ސްކޫލްތައް ބަންދުކުރަން ލަފާދެވެން ނެތް ކަމަށެވެ. ބަންދުކުރަން ލަފާދެއްވިޔަސް ދެއްވާނީ، ބަލި ފެތުރިއްޖެ ހާލަތެއްގައި ފެތުރޭ ސަރަހައްދަުގައި ހުރި ސްކޫލަކަށް އެކަނި ކަމަށާއި، ސްކޫލް ބަންދުކުރުމަކީ ކުދިންގެ ކިޔެވުމަށް އަސަރުކޮށްފާނެ ކަމަކަށް މަޖުބޫރީ ހާލަތެއްގައި ފިޔަވާ އެކަން ކުރަން ޑޮކްޓަރުން ލަފާނުދެއްވާނެ ކަމަށް ވެސް އެބޭފުޅުން ބުނެއެވެ.
ޑރ. މޫސާ ހުސައިން ވިދާޅުވީ، ކޮރޯނާ ވައިރަސްއަށް ވަކި ޚާއްސަ ފަރުވާ އެއް ނެތް ކަމަށެވެ. ނަމަވެސް ސަޕޯޓިވް ޓްރީޓްމަންޓް ދީގެން މީހުން ރަނގަޅުވާނެ ކަމަށާއި ރާއްޖޭގައިވެސް މި ބައްޔަށް ދޭ ފަރުވައަކީ ޗައިނާގައިވެސް އެހެން ޤައުމުތަކުގައިވެސް ބަލި ދެނެގަނެ ދޭ ފަރުވާ ކަމަށް ޑޮކްޓަރު ވިދާޅުވިއެވެ. ޑރ. ވިދާޅުވީ، ރާއްޖޭގައި ކޮރޯނާ ވައިރަސްގެ ކޮންފާރމްޑް ކޭސް އެއްވެސް އަދި ސީރިއަސް ކޭސް އެއްވެސް ނެތް ކަމަށެވެ. އަދި އެފަދަ ކޭސް އެއް އޮންނަމަ ފަސޭހައިން ފެތުރިގެން ހިނގައިދާނެ ކަމަށް މޫސާ ހުސައިންު ވިދާޅުވިއެވެ.
މިހާރު ހަލުވިކަމާއި އެކު ފެތުރެމުންދާ ނޮވެލް ކޮރޯނާ ވައިރަސް އަކީ ގައިންގަޔަށް އަރާ އެއްޗެކެވެ. އެގޮތުން، މި ވައިރަސް ދަތުރުކުރާނީ ބަލިމީހާގެ ވަށައިގެން ތިން ފޫޓުގެ ދުރުމިނަށެވެ. ބަލިމީހާ ގާތުގައި 15 މިނިޓު ހުރެއްޖެ ނަމަ މި ވައިރަސް ވާރުތަވުން ގާތެވެ.
advertisment