ކުރިއަށް އޮތް ރަމަޟާން މަހަށް މާލޭގައި ދިރިއުޅޭ ފަރާތްތަކަށް ފައިދާ ކުރާނެހެން ވަގުތީ މާރުކޭޓެއް ހުޅުވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހު މިހެން ވިދާޅުވީ، މާލެ ސިޓީ ސްޓްރީޓްސްކޭޕިން މަޝްރޫއު އިފްތިތާހު ކުރެއްވުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ރައީސް ވިދާޅުވީ، ދަތުރުވެރިންގެ މާރުކޭޓުގެ މައްސަލައަކީ ހައްލު ނުކުރެވި އޮތް މައްސަލައެއް ކަމަށާއި އެކަން ހައްލުކުރުމުގެ ގޮތުން، އެތަނުގައި 178 ގޮޅި ހަމަޖައްސައި ލިސްޓް ފައިނަލް ކުރުމުގެ މަސައްކަތް މާލޭ ސިޓީ ކައުންސިލުން ކުރަމުން އަންނަ ކަމަށެވެ.
“ކުރިއަށް އޮތް ރޯދަމަހަށް ވަގުތީ ގޮތުން މާރުކޭޓެއް ތައްޔާރުކޮށް، މާޅޭގެ ރައްޔިތުންނަށާއި މާލެއަށް އަންނަ، އަތޮޅުތަކުގެ ދަތުރުވެރިން ގެންނަ ތަކެތި ވިއްކޭނެ އިންތިޒާމު އިރާދަކުރެއްވިއްޔާ އަޅުގަނޑުމެން ހަމަޖައްސާނަން” ރައީސް ޞާލިހު ވިދާޅުވިއެވެ.
ދަތުރުވެރިންގެ މާރުކޭޓް ވަނީ މިދިޔަ އަހަރުގެ އޮގަސްޓް މަހުގެ ތެރޭގައި ހުޅުވޭނެ ވަކި ތާރީޚެއް އިއުލާން ކުރުމެއް ނެތި ބަންދުކޮށްފައެވެ.