އެމްޑީޕީގެ އެތެރޭގެ އިންތިހާބެއްގައި އިންސާފުވެރިކަމާ މެދު ސުވާލު އުފެދޭ ހާލަތެއްގައި އެ ޕާޓީގެ ޗެއާޕާސަން ހިމެނޭ ގޮތަށް ސެކެޓްރިއޭޓްގެ މުވައްޒަފުން މަސްއޫލިއްޔަތުން ވަގުތީ ގޮތުން އެކަހެރިކުރުމުގެ ބާރު އެ އިންތިހާބެއް ރާވާ ކޮމިޓީއަށް ދިނުމަށް އެ ޕާޓީގެ އަސާސީ ގަވާއިދަށް އިސްލާހު ހުށަހަޅައިފިއެވެ.
2022 ވަނަ އަހަރު ފާސްކުރި އަސާސީ ގަވައިދާ އެއްގޮތަށް އާ ގަވައިދުގައިވާ ގޮތުން ވެސް ޗެއާޕާސަން ހިމެނޭ ގޮތަށް ސެކްރެޓޭރިއަޓްގެ މުވައްޒަފުން އެތެރޭގެ އިންތިހާބުތަކުގައި ވާދަކުރުމާއި ކެމްޕެއިންތަކުގައި އަމަލީ ގޮތުން ބައިވެރިވުމަކީ މަނާކަމެކެވެ. އެހެންނަމަވެސް، އާ ގަވައިދުގެ ޑްރާފްޓްގައި ވަނީ އެ އުސޫލުތައް އިތުރަށް ވަރުގަދަކުރަން ހުށަހަޅައިފައެވެ.
އެ ޑްރާފްޓުގައިވާ ގޮތުން ސެކްރެޓޭރިއަޓްގެ އެއްވެސް މުވައްޒަފަކު އެތެރޭގެ އިންތިހާބެއްގައި ވާދަކުރަން ބޭނުންވާ ނަމަ އެ އިންތިހާބެއް ބޭއްވުމުގެ މަދުވެގެން އެއް މަސް ދުވަހުގެ ކުރިން އެކަން ލިޔުމުން ޗެއާޕާސަނަށް އަންގަން ޖެހޭނެއެވެ. އެފަދަ އެންގުމެއް ސެކެޓްރިއޭޓްގެ މުވައްޒަފަކު އަންގައިފިނަމަ އެ އިންތިހާބެއް ނިމެންދެން އޭނާ މަސްއޫލިއްޔަތަކުން ދުރުކުރަންޖެހޭނެ ކަމަށާއި މަގާމަށް އިންތިހާބުވެއްޖެނަމަ އޭނާގެ ސެކްރެޓޭރިއަޓުން ވަކިވާނެ ކަމަށް ވެއެވެ.
ސެކްރެޓޭރިއަޓްގެ އެއްވެސް މުވައްޒަފަކު އެތެރޭގެ އިންތިހާބެއްގެ ކެންޑިޑޭޓަކަށް ތާއީދުކޮށް އެކަން ހާމަކޮށް އަމަލީގޮތުން ކެމްޕެއިނުގައި މަސައްކަތްކޮށްގެން ނުވާނެ ކަމަށް ވެސް އެ ޑްރާފްޓުގައިވެއެވެ.
ސެކްރެޓޭރިއަޓްގެ މުވައްޒަފެއްގެ މަސްލަހަތު ފުށުއަރާ ފަދަ މީހެއް އިންތިހާބެއްގައި ވާދަކުރާނަމަ ނުވަތަ އިންތިހާބުގެ އިންސާފުވެރިކަމާ މެދު ސުވާލު އުފެދިދާނެ ފަދަ ހާލަތެއް އޮތް ނަމަ އެ މުވައްޒަފަކު ވަގުތީގޮތުން މަގާމުގެ މަސްއޫލިއްޔަތު އަދާކުރުން މަނާކުރުމުގެ ބާރު، އެ އިންތިހާބެއް ރާވާ ހިންގާ ކޮމިޓީއަށް ލިބިގެންވާ ކަމަށް ވެސް ޑްރާފްޓުގައިވެއެވެ.
އެމްޑީޕީގެ އަސާސީ ގަވައިދު އެގޮތަށް އިސްލާހުކުރަން ހުށަހަޅާފައިވާއިރު، ކުރިއަށް އޮތް ރިޔާސީ އިންތިހާބުގެ ޕްރައިމަރީގައި ޕާޓީގެ ޗެއާޕާސަން މުހައްމަދު ނަޝީދު ވަނީ ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލަށް ތާއީދުކުރައްވާކަން އިއުލާނުކުރައްވައިފައެވެ.
އަސާސީ ގަވައިދަށް ހުށަހަޅާ އިސްލާހުތަކާ މެދު ބަހުސްކޮށް ވޯޓަށް އަހަން ހަމަޖެހިފައިވަނީ ހޮނިހިރު ދުވަހުއެވެ.
