ޛިކުރުކުރުމަކީ މަރުވެފައިވާ ހިތްތަކަށް ދިރުންދީ، ޣާފިލުކަމުގެ ނިދީން އިންސާނާ ހޭލައްވައިދޭ ކަމެއް ކަމަށް މިއަދުގެ ހުކުރު ޚުތުބާގައި ބުނެފިއެވެ.
މިއަދުގެ ހުކުރު ދުވަހުގެ ޚުތުބާގެ މައުޟޫއަކީ ”ގިނަގިނައިން ﷲ ހަނދުމަކުރުން“ މި މައުޟޫއެވެ. ޛިކުރުކުރުމުގެ މުހިންމުކަމުގެ މައްޗަށް އަލިއަޅުވާލައި މިއަދުގެ ހުކުރު ހުތުބާގައި ބުނެފައިވަނީ މާތް ﷲ ހަނދުމަކުރުމުގެ ގޮތުން އެންމެ ފަސޭހައިން ކުރެވިދާނެކަމަކީ ޛިކުރުކުރުން ކަމަށެވެ.
އެގޮތުން، މާތް ﷲ ހަނދުމަކުރުމަކީ ހިތްތަކުގެ ދިރުން ކަމަށްވީއިރު އެއީ އެކަލާނގެ މަތިވެރި ޙަޟްރަތާ ކުއްތަންވުމަށް އޮތް އެންމެ ފަސޭހަ އަދި އެންމެ ކުރު މަގުކަމަށް ވެސް ބުނެފައިވެއެވެ. އަދި ޛިކުރުކުރުމަކީ މަރުވެފައިވާ ހިތްތަކަށް ދިރުންދީ، ޣާފިލުކަމުގެ ނިދީން އިންސާނާ ހޭލައްވައިދޭ ކަމެއްކަމަށް ޚުތުބާގައި ވަނީ ފާހަގަކޮށްފައެވެ. އޭގެ އިތުރުން ޛިކުރުކުރުމުގެ ސަބަބުން އިންސާނާގެ ނަފުސަށް ހަމަޖެހުމާއި އުފާވެރިކަން ލިބޭއިރު ދިރިއުޅުމުގެ ހާސްކަމާއި ބުރަކަން ފިލުވައިދޭކަން ވެސް ފާހަގަކޮށްފައިވެއެވެ.
ގިނަގިނައިން ﷲ ހަނދުމަކުރުމުން އެކަލާނގެ މަތިވެރިކަމާއި، ހައިބަވަންތަކަމާއި، ކާއިނާތުގައިވާ އެންމެހައި ނިއުމަތްތަކަކީ އެކަލާނގެ ދެއްވި ތަކެތިކަން ގަބޫލުކޮށް، އެކަލާނގެ މަދަދާއި ނަޞްރު އަބަދުވެސް އެކުގައި ވާކަން އިހުސާސްކޮށްދޭކަމަށް ވެސް ބުނެފައިވެއެވެ.
އޭގެ އިތުރުން، ޛިކުރުކުރުމުގެ ސަބަބުން ހަށިގަނޑަށް ދިރުމާއި ބާރު ލިބި، މޫނުމަތީގެ އުޖާލާކަމާއި ހައިބަތު ފާޅުވާނެކަމަށާއި މާތް ﷲއަށް އޮންނަ ލޯތްބާއި، އެކަލާނގެ މަތިވެރިކަން ހިތުގައި ބިންވަޅުނެގި، އެކަލާނގެއަށް ކުއްތަންވުމުގެ މަގުފަހިވާނެކަމަށް ވެސް ޚުތުބާގައި ބުނެފައިވެއެވެ.
ހަމައެއާއެކު މާތް ﷲގެ މަތީން ހަނދުމަކުރުމަކީ ޝައިތާނާގެ ވަސްވާސްތަކާ ދުރުކޮށްދީ، ރަޙުމާނުވަންތަ ރަސްކަލާނގެ ރުހިވޮޑިގަތުން ހޯދައިދޭ، މަތިވެރި އަޅުކަމެއްކަމަށާއި އެއީ ހިތްތަކުން ހާސްކަމާއި މޮޅިވެރިކަން ފިލުވައިދީ، އުފާވެރިކަމާއި ހަމަޖެހުން ގެނެސްދޭ ކަމެއްކަމަށް މިއަދުގެ ޚުތުބާގައި ވަނީ ބުނެފައެވެ.
”ޛިކުރުކުރާ މީހާއާއި ޛިކުރުނުކުރާ މީހާގެ ތަފާތު ބަޔާންކޮށްދެއްވަމުން ކީރިތި ރަސޫލާ ޙަދީޘްކުރައްވައިފައި ބަސްފުޅެއްގެ މާނައިގައިވެއެވެ. އެ މީހެއްގެ ވެރިރަސްކަލާނގެ ހަނދުމަކުރާ މީހާއާއި، އެކަލާނގެ ހަނދުމަނުކުރާ މީހާގެ މިސާލަކީ، ދިރިހުރި މީހަކާއި މަރުވެފައިވާ މީހެއްގެ މިސާލެވެ.“
ޚުތުބާގައިި އިތުރަށް ބުނެފައިވަނީ ޛިކުރުކުރުމަކީ ހަމައެކަނި މިސްކިތުގައި އިނދެގެން ކުރާ ކަމެއް ނޫންކަމަށާއި ދިރިއުޅުމުގެ ކޮންމެ ހާލަތެއްގައި ވެސް ޛިކުރުކުރެވިދާނެ ކަމަށެވެ. އެގޮތުން މަގުމަތީގައި ހިނގާފައި ދާއިރުއާއި ސަވާރީއެއްގައި ދަތުރުކުރާއިރު، އޮށޯވެ އޮވެ އަދި މަސައްކަތުގެ މައިދާނުގައި އުޅޭއިރުވެސް ޛިކުރުކުރެވޭނެކަން ފާހަގަކޮށްފައިވެއެވެ.
މީގެ އިތުރުން، ފަރުޟު ފަސް ނަމާދު އަދާކުރުމާއި، ރޯދަ ހިފުމާއި، ޒަކާތް ދިނުމާއި، ޙައްޖާއި އުމްރާގެ އަޅުކަން ފުރިހަމަކުރުމަކީ މާތްﷲ ހަނދުމަކުރުމުގެ ތެރޭގައި ހިމެނޭ ކަންކަން ކަމުގައި ޚުތުބާގައި ވަނީ ބުނެފައެވެ. އަދި މައިންބަފައިންނަށް އޯގާތެރިވުމާއި، މީސްތަކުންނަށް އެހީތެރިވެ ހެޔޮ ފޯރުވުމަކީ ވެސް އަމަލުން މާތް ﷲ ހަނދުމަކުރުމުގެ މަތިވެރި ނަމޫނާތަކެއްކަމަށް ބުނެފައިވެއެވެ.
