ކައުންސިލުތަކަށް ބާރު ދިނުމާއި ގުޅޭގޮތުން އެމްޑިޕީން ދައްކާ ވާހަކަތަކަކީ އެ ޕާޓީން ކައުންސިލްތަކަށް ކުރާ މަލާމާތެއްކަމަށް ބާރަށު ދައިރާގެ މެމްބަރު ޝުޖާއު ވިދާޅުވެއްޖެއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ޝުޖާއު ވަނީ ދަރަންޏަށް ޒިންމާވާގޮތަށް ލޯނު ނެގުމާއި، ކުންފުނި ހެދުމާއި ފަޅުރަށް ދިނުން ފަދަ ބޮޑެތި ބާރުތަކެއް ކައުންސިލުތަކަށް ދެވިފައި އޮތްއިރު، އެމްޑީޕީ ވެރިކަމުގައި އޮތް އިރު ޕާޓީގެ ހައިސިއްޔަތުން ކައުންސިލްތަކަށް ހޯދައި ނުދެވުނު އިންވެސްމަންޓްގެ ފުރުސަތެއް މިހާރު ހޯދޭނެކަމާމެދު ސުވާލު އުފައްދަވާފައެވެ.
އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) ޓެގު ކުރައްވާ ޝުޖާއު ވަނީ ކައުންސިލުތަކަށް ބާރު ދިނުމާ ގުޅޭގޮތުން ދައްކަވާ ވާހަކަތަކަކީ އެ ޕާޓީން ކައުންސިލްތަކަށް ކުރާ މަލާމާތެއްގެ ގޮތުގައި ސިފަކުރައްވާފައެވެ.
ބޮޑެތި ބާރުތަކެއް ގާނޫނުން ކައުންސިލްތަކަށް ދިންއިރުވެސް މާލޭ ސިޓީ ކައުންސިލްގެ މައްޗަށް އެ ބާރުތައް ނުހިނގާ ކަމަށް އޭނާ ވިދާޅުވިއެވެ. އެގޮތުން، ކުންފުނި ހެދުމާއި ހައުސިންގ ޕްރޮޖެކްތަކާއި އަދި ރައްޔިތުން އެދޭ ބޮޑެތި މަޝްރޫއުތައް ހިންގުމަށް ދަރަންޏަށް ޒިންމާވާގޮތަށް ލޯނު ނެގުން ފަދަ ކަންކަން އެމްޑީޕީގެ ވެރިކަމުގައި ސިޓީ ކައުންސިލަށް އޭރުވެސް މަނާކޮށްފައިވާކަމަށް އޭނާ ވިދާޅުވިއެވެ.
”އަޅުގަނޑު މި ވާހަކަތައް މަނިކުފާނާ މި ހިއްސާކޮށްލީ މަނިކުފާނަކީ 19 ވަނަ މަޖިލީހުގައި ކައުންސިލްތަކަށް މާލީބާރުވެރިކަން ހޯދައިދެއްވުމަށް ޤަރާރު ހުށައަޅުއްވައި، 7/2010 ބަހުސްތަކުގައި ފުޅާކޮށް ވާހަކަދެއްކެވި ބޭފުޅަކަށްވެ، MDP އިއްޔެ ބޭއްވި ޕާޓީގެ އިންވެސް ފޯރަމުން އަޅުގަނޑު މަނިކުފާނު ހޯދާހޯދާ ނުފެނިގެން. މަނިކުފާނުމެން ތިއުޅޭ ގޮތެއް ވިސްނާ ވިސްނާ ހަމަ ނޭނގުނު އިނގޭތޯ؟“ ޝުޖާއު
ޝުޖާއު މިހެން ވިދާޅުވެފައިވާއިރު އެމްޑީޕީގެ އަމާޒަކީ ކައުންސިލުތަކަކީ އަމިއްލަ ރަށުގެ ނިންމުންތައް ނިންމާ ބަޔަކަށް ހަދައި، ހަގީގީ ލާމަރުކަޒީ ނިޒާމެއް ގެނައުންކަމަށް އެ ޕާޓީން ބުނެއެވެ. އަދި އެ ޕާޓީގެ އިންވެސްޓްމަންޓު ފޯރަމް ”ރަށްވެހި ތަރައްގީ“ގެ ތެރެއިން އެ ޕާޓީގެ އަމާޒަކީ ކައުންސިލުތަކަކީ އަމިއްލަ ރަށުގެ ނިންމުންތައް ނިންމާ އަމިއްލަ ރަށުގެ ތަރައްގީ ލީޑުކުރާ ބަޔަކަށްވެ، ހަގީގީ ލާމަރުކަޒީ ނިޒާމެއް ގެނެސްދޭނެ ބަޔަކަށް އެ ޕާޓީން ހާދާނެކަމަށް އެ ޕާޓިން ބުނެއެވެ.
