ކުރީގެ ރައީސް މައުމޫން އަބްދުލްގައްޔޫމް، ރިޔާސީ ނިޒާމާ އެއްކޮޅަށް ރޭ ކުރެއްވި ޓުވީޓާ އެކު، ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވަރަށް ބޮޑަށް ހިތްޕުޅު ހަމަޖެހިވަޑައިނުގެން ހޫނު ރައްދެއް ދެއްވައިފި އެވެ.
“2007 ގެ ނިޒާމީ ވޯޓްވެސް ކަނޑައެޅިން އޮޅުވާލެއްވި. މަނިކުފާނަށް އޮޅުވާނުލެއްވުނީ ހަމައެކަނި2008 ގެ ވޯޓް. އެއިންވީ ބަލި” ނަސީދުުގެ ވިދާޅުވިއެވެ.
ނަޝީދަކީ، ފެށުނީއްސުރެ ބަރުލަމާނީ ނިޒާމަށް ތާއީދު ކުރައްވާ އަދި ރާއްޖޭގެ ވެރިކަން އެ ނިޒާމަށް ބަދަލުކުރައްވަން ބޭނުންފުޅުވާ ބޭފުޅެކެވެ. ރައީސް އިބްރާހިމް މުހައްމަދު ސޯލިހުގެ މި ވެރިކަމުގެ މެދުތެރެއިން ވެސް ބަރުލަމާނީ ނިޒާމަށް ވެރިކަން ބަދަލުކުރަން ނަޝީދު ބޭނުންފުޅުވާ ކަމުގެ ތުހުމަތު ބައެއް މީހުން ކުރެ އެވެ. ބަރުލަމާނީ ނިޒާމަށް ވެރިކަން ބަދަލުކުރުމަށް ގާނޫނުއަސާސީ އަށް ޖާބިރު އިސްލާހު ހުށަހެޅުއްވުމުގެ ފަހަތުގައި ފޮރުވިފައިވާ ސިއްރަކީ އެއީ ކަމަށް ވެސް ސިޔާސީ ބައެއް ފަރާތްތަކުން ބުނެ އެވެ.
ރައީސް އިބްރާހިމް މުހައްމަދު ސޯލިހު އެންމެ ފަހުން ވިދާޅުވެފައި ވަނީ ވެރިކަން ހިންގުން ބަރުލަމާނީ ނިޒާމަކަށް ބަދަލު ކުރަން ވިސްނަވާކަށް އެ މަނިކުފާނަށް ވަގުތެއް ނެތް ކަމަށާއި ހުރިހާ ވަގުތެއް ހުސްކުރައްވަން ބޭނުންފުޅު ވަނީ ރައްޔިތުންނަށް ވެވަޑައިގަތް ވައުދުތައް ފުއްދަވަން ކަމަށެވެ.
މި އަހަރުގެ ޖޫން 23 ގައި ރައީސް އޮފީހުގައި އޮތް ނިއުސް ބްރީފިންއެއްގައި ރައީސް ވިދާޅުވެފައި ވަނީ، ވެރިކަމުގެ ނިޒާމް ބަދަލުކުރުމާ މެދު ވިސްނެވުމަށް ވުރެ މުހިއްމު ކަންކަން ކުރައްވަން ޖެހިވަޑައިގެންފައި އެބަހުރި ކަމަށެވެ. އިސްކަން ދެއްވަނީ ފަސް އަހަރަށް ވެވަޑައިގަތް ވައުދުތައް ފުއްދަވަން ކަމަށް ރައީސް ވިދާޅުވި އެވެ. އެ މަނިކުފާނު ވިދާޅުވެފައިވާ ގޮތުގައި ވެރިކަމުގެ ނިޒާމު ކަނޑައެޅުމުގައި ދެން ވެސް ގޮތް ނިންމާނީ ރައްޔިތުންނެވެ.