2019 ވަނަ އަހަރު ނިއުޒިލޭންޑްގެ ދެ މިސްކިތަކަށް ޙަމަލާދީ ގަތުލު އާންމު ހިންގި އޮސްޓްރޭލިޔާ މީހާ ބްރެންޓޮން ޓަރެންޓް ގެ މައްޗަށް ކުށް ސާބިތުވުމުން އޭނާ އުމުރަށް ޖަލަށްލުމަށް ނިއުޒިލޭންޑްގެ ކޯޓަކުން ހުކުމް ކޮށްފިއެވެ.
މިދިޔަ އަހަރުގެ މާޗު މަހު ނިއުޒިލެންޑުގެ ކްރައިސްޓްޗާޗްގެ ދެ މިސްކިތަކަށް ވަދެ، ހުކުރު ނަމާދަށް ތިބި މީހުންގެ ގަޔަށް ބަޑި ޖަހައި އަދި އިތުރު ބަޔަކު ޒަހަމްކޮށްލި ބްރެންޓަން ޓަރަންޓްގެ މައްޗަށް ނިއުޒިލެންޑް ހައި ކޯޓުން މިއަދު ކުރި ހުކުމަކީ ޕެރޯލް ނުލިބޭ ގޮތަށް އުމުރަށް ޖަލަށްލާން އެ ގައުމުގައި ފުރަތަމަ ފަހަރަށް ކުރި ހުކުމެވެ. އަދި މިއީ ޓެރަރިޒަމްގެ ކުށެއް އެ ގައުމުގައި ސާބިތުވި ފުރަތަމަ ފަހަރު ވެސް މެ އެވެ.
މީހަކު މެރުމުގެ 51 ދައުވާ އާއި މަރާލަން އުޅުމުގެ 40 ދައުވާއެއްގެ އިތުރުން ޓެރަރިޒަމްގެ ދައުވާ އަށް ބްރެންޓަން ވަނީ އެއްބަސްވެފަ އެވެ. ހުކުމް އިއްވަމުން ފަނޑިޔާރު ކެމެރަން މެންޑާ ވިދާޅުވީ ޕެރޯލް ނުލިބޭ ގޮތަށް އުމުރަށް ޖަލަށްލުމަކީ މީހުން މެރުމުގެ އެންމެ އަނިޔާވެރި އަމަލުތަކަށް ދެވޭނެ އަދަބެއް ކަމަށާއި ބްރެންޓަންއަކީ އެ އަދަބު ލިބެން އެންމެ އެކަށީގެންވާ މީހާ ކަމަށެވެ.