ރަޝިއާ އާއި ރާއްޖެ އާ ދެމެދު ދަތުރުތައް ފަށަނީ

ރަޝިއާގެ ސަރުކާރުން ނެރުނު ބަޔާނެއްގައި ބުނީ ރާއްޖެ އާއި ރަޝިއާ އާއި ދެމެދު ހަފްތާއަކު ދެ ފްލައިޓު ބާއްވާނެ ކަމަށެވެ. ރާއްޖޭގެ އިތުރުން ޔޫއޭއީ އަދި މިސްރާ ދެމެދު ކުރާ ދަތުރުތައްވެސް ފަށަން ރަޝިއާ އިން ވަނީ ތައްޔާރުވެފައެވެ.

ރަޝިއާއިން ވަނީ މިދިޔަ މަހުން ފެށިގެން ބައެއް ގައުމުތަކަށް ދަތުރު ފަށައިފައެވެ. އެގޮތުން އޮގަސްތު އެކަކުން ފެށިގެން އިނގިރޭސިވިލާތައި ޓެންޒޭނިއާ އަދި ތުރުކީ އާއި ދެމެދު ދަތުރުތައް ފަށާފައިވާއިރު 15 އޮގަސްޓުން ފެށިގެން ސްވިޓްޒަލޭންޑަށް ވެސް ވަނީ ދަތުރު ފަށައިފައެވެ.

ކޮވިޑް19 އާއި ގުޅިގެން ރަޝިއާއިން ބައިނަލްއަގުވާމީ ވައިގެ ދަތުރުފަތުރު މެދުކަނޑާލީ މާޗު މަހުއެވެ.

ބޯޑަރު އަލުން ހުޅުވާލާ، ފަތުރުވެރިންނަށް ހިދުމަތް ދިނުމަށް ހުއްދަ ދީފައި ވަނީ ރިސޯޓުތަކާއި މީހުން ދިރިނޫޅޭ ރަށްރަށުގައި ހިންގާ ހޮޓާ އަދި ސަފާރީތަކަށެވެ.

އޮކްޓޫބަރު މަހުގެ 15 ވަނަ ދުވަހުންް ފެށިގެން މާލެ، ހުޅުމާލެ އަދި ވިލިމާލެ ފިޔަވައި ރާއްޖޭގެ އެހެން ސަރަހައްދުތަކުގައި ހިންގާ ގެސްޓްހައުސްތައް ހުޅުވާލަން މިހާރު ވަނީ ނިންމައިފައެވެ.