މި ސަރުކާރުގެ ފަރާތުން ފެންނަނީ ކޮންމެ ކަމެއްގައި ސިލެކްޓިވް ޖަސްޓިސްގެ އުސޫލު ކަމަށާއި އެއީ ވެރިކަން ނިމިއްޖެ ކަމުގެ ދަލީލެއް ކަމަށް ކުރީގެ ނައިބް ރައީސް އަދި ޕީޕީއެމްގެ ހާއްސަ އެޑްވައިޒަރު ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
ޖަމީލު މިހެން ވިދާޅުވީ ކުރީގެ ރައީސް އަދި އިދިކޮޅު ދެ ޕާޓީގެ އެޑްވައިޒަރު ޑރ. މުހައްމަދު ވަހީދު ހަސަން މަނިކު އަނެއްކާވެސް ފުލުސް އޮފީހަށް ހާޒިރުވާން އެންގުމާ ގުޅިގެންނެވެ.
ޖަމީލު ކުރެއްވި ޓްވީޓެއްގައި ވިދާޅުވީ ޤާނޫނު ތަންފީޒްކުރުމުގައި ތަފާތު ނުކުރުމަކީ ރައްޔިތުން ގެނައި އެންމެ ބޮޑު އިޞްލާޙު ކަމަށާއި ޖުމުހޫރިއްޔަތު ގެނައީ ރަސްކަމުގެ އެ އުޞޫލް ކަމުނުދާތީ ކަމަށެވެ.
“މިފެންނަނީ ވަކި ބަޔަކު ފަހަތުން ސަރުކާރުގެ މެޝިނަރީ އުޅޭތަން. ކޮންމެ ކަމެއްގައި ސިލެކްޓިވް ޖަސްޓިސް. ތިއީ ވެރިކަން ނިމިއްޖެ ކަމުގެ ދަލީލެއް.” ޖަމީލު ވިދާޅުވިއެވެ.
ޤާނޫނު ތަންފީޒްކުރުމުގައި ތަފާތު ނުކުރުމަކީ ރައްޔިތުން ގެނައި އެންމެ ބޮޑު އިޞްލާޙް. ރަސްކަމުގެ އެ އުޞޫލް ކަމުނުދާތީ ޖުމްޙޫރިއްޔަތު ގެނައީ. މިފެންނަނީ ވަކި ބަޔަކު ފަހަތުން ސަރުކާރުގެ މެޝިނަރީ އުޅޭތަން. ކޮންމެ ކަމެއްގައި ސިލެކްޓިވް ޖަސްޓިސް. ތިއީ ވެރިކަން ނިމިއްޖެ ކަމުގެ ދަލީލެއް. pic.twitter.com/GfdigHB0CF
— Mohamed Jameel Ahmed (@MJameelAhmed) September 8, 2020
އެނގައިވާ ގޮތުގައި ޑރ. ވަހީދު ފުލުހަށް ހާޒިރު ކުރަނީ އިދިކޮޅު ފަރާތްތަކުން ބޭއްވި ސިޔާސީ ހަރަކާތަކަށްފަހު އެ ހަރަކާތުގެ ބައިވެރިންނާއި މުހާތަބުކޮށް ވާހަކަ ދެއްކެވިއިރު، އެމަނިކުފާނު އަޅުއްވައިގެން ހުންނެވި މާސްކު ތިރިކުރެއްވި މައްސަލައިގައެވެ.