ވަކި ބައެއްގެ ފަސްބައި ސާފުކުރަން ނޫޅި ރައްޔިތުންގެ އަޑުހައި ގައުމިއްޔަތު އިސްކުރެއްވުމަށް ކުރީގެ ނައިބު ރައީސް ޑރ. މުހައްމަދު ޖަމީލު ސިފައިންނަށް އިލްތިމާސްކުރައްވައިފިއެވެ.
ޖަމީލު މިހެން ވިދާޅުވެފައިމިވަނީ ރާއްޖޭގައި އިންޑިއާގެ ހަތިޔާރު އެޅި 100 އަށް ވުރެ ގިނަ ސިފައިން އެބަތިބި ކަމަށާއި އެ ފަރާތްތައް ރާއްޖެއިން ބޭލުމަށް ގޮވާލާ އަޑު ގަދަވަމުންދާ ދުވަސްވަރެއްގައެވެ.
ޖަމީލު މިއަދު ކުރެއްވި ޓްވީޓެއްގައި ވިދާޅުވީ ދިވެހިންނަކީ ނަސީބުވެރި ބައެއް ކަމަށާއި އެމްއެންޑީއެފް އެހާ ހިސާބަށް އައީ އެތައް ޝަހީދުންގެ ލޭ ގުރުބާންކޮށްގެން ކަމަށެވެ. އަދި ދިވެހި ސިފައިންނަކީ ހުނަރުވެރި، ގާބިލު އަދި އިލްމީ ދަރީންތަކެއް ކަމަށާއި ރައްޔިތުންގެ އަޑު އެހުމަށް އެދޭ ކަމަށްވެސް ޖަމީލު ވިދާޅުވިއެވެ.
“ވަކި ބައެއްގެ ފަސްބައި ސާފުކުރަން ނޫޅުއްވާ، ހުވަޔާ އެއްގޮތަށް ފުރާނައިން ގުރުބާން ވެގެންވެސް ގައުމިއްޔަތު އިސްކުރައްވާ” ޖަމީލު ވިދާޅުވިއެވެ.
Dhivehinnakee naseebveri baeh. @MNDF_Official ehisaabah aee ethah shaheedhunge ley qurbaan koggen. Thiyaee hunaruveri,qaabil & ilmee dharinthakeh. Rayyithunge adu assava: Vaki baegge fasbai saafukuran noolhuvva huvaya ehgothah furaanain qurbaan vegenves Qawmiyyathu iskurahva. pic.twitter.com/4hhYh2EvzG
— Mohamed Jameel Ahmed (@MJameelAhmed) September 10, 2020
ރާއްޖޭގައި އިންޑިއާގެ އަސްކަރީ މަރުކަޒުތަކެއް އަޅަން އުޅޭ ކަމަށް ވެސް ބައެއް ފަރާތްތަކުން ދަނީ ތުހުމަތު ކުރަމުންނެވެ.
ނަމަވެސް މި ވާހަކަތަކާ ގުޅިގެން ދާދިފަހުން ބޭއްވި ނޫސްވެރިންގެ ބައްދަލުވުމެއްގައި ޗީފް އޮފް ޑިފެންސް ފޯސް، މޭޖަރު ޖެނެރަލް އަބްދުﷲ ޝަމާލް ވަނީ ރާއްޖޭގައި އެހެން ގައުމެއްގެ ހަތިޔާރު އެޅި ސިފައިންނެއް ނެތް ކަމަށާއި އިންޑިއާއިން ރާއްޖެ އަޅުވެތިކުރަން އުޅޭ ކަމަށް ބުނެ ދައްކަނީ ދޮގު ވާހަކަތަކެއް ކަމަށެވެ.
advertisment