ކޮވިޑް-19ގެ މި ހާލަތުގައި ވެސް މުޅި ސަރުކާރުގައި މިވަނީ ކޮރަޕްޝަންގެ ޖަރާސީމް ފެތުރިފައި ކަމަށް ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޖަމީލް މިހެންމި ވިދާޅުވީ ކޮވިޑް-19އާ ގުޅޭ ހެލްތު މިނިސްޓްރީއާއި ޓޫރިޒަމް މިނިސްޓްރީއާއި އާސަންދައާއި އެންސްޕާގެ އިތުރުން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީގެ އޮޑިޓް ރިޕޯޓްތަކުން ކޮރަޕްޝަންގެ ގިނަ މައްސަލަތަކެއް ފެންމަތިވެފައިވާ ދަނޑިވަޅެއްގައެވެ.
ކޮވިޑްގެ ވަގުތު މުޅި ސަރުކާރުގައި މިވަނީ ކޮރަޕްޝަންގެ ޖަރާސީމް ފެތުރިފައި ކަމަށާއި މަޖިލީހުގެ ރައީސް މުހައްމަދު ނަޝީދުއާ މެދު އޮތް އުންމީދަކީ މަލަމަތި ރީތިކުރަން ހާޒިރުކޮށް ސުވާލުކުރުމެއް ނޫން ކަމަށެވެ.
“ގާތް ވަޒީރަކަސް ފިޔަވަޅު އަޅުއްވާ. ނޫނީ ރައްޔިތުން ދެކޭނީ ރަނުން ރަނަށް ވައްކަމަށް ޖާގަ ދެނީ ކަމަށް.” ޖަމީލް ވިދާޅުވިއެވެ.
ކޮވިޑްގެ ވަގުތު މުޅި ސަރުކާރުގައި މިވަނީ ކޮރަޕްޝަންގެ ޖަރާސީމް ފެތުރިފައި. @MohamedNasheed، މަނިކުފާނާ މެދު އޮތް އުންމީދަކީ މަލަމަތި ރީތިކުރަން ހާޒިރުކޮށް ސުވާލުކުރުމެއް ނޫން. ގާތް ވަޒީރަކަސް ފިޔަވަޅު އަޅުއްވާ. ނޫނީ ރައްޔިތުން ދެކޭނީ ރަނުން ރަނަށް ވައްކަމަށް ޖާގަ ދެނީ ކަމަށް pic.twitter.com/dVF4tW5b0I
— Mohamed Jameel Ahmed (@MJameelAhmed) September 20, 2020
އޮޑިޓަރ ޖެނެރަލްގެ އޮފީހުން މިހާތަނަށް ނެރުނު އޮޑިޓް ރިޕޯޓުތަކުގެ ތެރެއިން ޓޫރިޒަމްގެ އޮޑިޓް ރިޕޯޓުގެ މައްސަލަ އޭސީސީން ބަލަމުން އަންނައިރު، ހެލްތު މިނިސްޓްރީގެ އޮޑިޓް ރިޕޯޓުގެ މައްސަލަ އޭސީސީ އާއި ފުލުހުން އަންނަނީ ތަހުގީގު ކުރަމުންނެވެ.
މިހާތަނަށް ކޮވިޑާއި ގުޅިގެން ނެރުނު ގިނަ އޮޑިޓު ރިޕޯޓުތަކެއްގައި ވަނީ މާލިއްޔަތު ގަވާއިދާ ހިލާފު، ކޮރަޕްޝަން ކަމަށް ބެލެވޭ އެތައް ކަމެއް ފާހަގަކޮށްފައެވެ.