ބޯޑަރު ހުޅުވިތާ ދެ ވަނަ މަހު ޓޫރިސްޓުން އައި އަދަދު 61 ޕަސެންޓް އިތުރުވެއްޖެ

ކޮވިޑް-19 އާއި ގުޅިގެން ރާއްޖޭގެ ބޯޑަރު ބަންދުކުރީ މާޗް މަހުގެ 27 ވަނަ ދުވަހުއެވެ. އަލުން ބޯޑަރު ހުޅުވާލީ މިދިޔަ މަހުގެ 15 ދުވަހު އެވެ.

އިމިގްރޭޝަނުން އާންމުކުރި ތަފާސްހިސާބުތައް ދައްކާގޮތުން ބޯޑަރު ހުޅުވިތާ ދެ މަސް ވެފައިވާއިރު، އެ މުއްދަތުގެ ތެރޭގައި 13،516 ފަތުރުވެރިން ރާއްޖެ އައިސްފައިވެއެވެ. އަދި ދެވަނަ މަހުގައި ރާއްޖެ އައި ފަތުރުވެރިންގެ ނިސްބަތް 61 ޕަސެންޓަށް ވަނީ އިތުރުވެފައެވެ. އެގޮތުން ބޯޑަރު ހުޅުވިތާ ދެވަނަ މަހު ރާއްޖެ އަށް ވަނީ 4458 ފަތުރުވެރިން އައިސްފައެވެ.

މިދިޔަ އެއް މަސްދުވަހުގެ ތެރޭގައި ރާއްޖެ އަށް އެންމެ ގިނަ އަދަދަކަށް ފަތުރުވެރިން އައިސްފައިވަނީ ޔޫއޭއީއިންނެވެ. އެއީ 656 ޓޫރިސްޓުންނެވެ.

ދެ ވަނަ އަށް އެންމެ ގިނައިން ޓޫރިސްޓުން އައީ އެންމެ ފަހުން ރާއްޖެއަށް ދަތުރުތައް ފެށި ރަޝިއާއިންނެވެ. އެ ގައުމުން ރާއްޖެއަށް 539 ޓޫރިސްޓުން މިހާތަނަށް ވަނީ އައިސްފަ އެވެ.

އަދި އިނގިރޭސިވިލާތް އަދި އެމެރިކާ ފަދަ ގައުމުތަކުންވެސް ރާއްޖެއަށް ގިނަ ޓޫރިސްޓުންތަކެއް ވަނީ އައިސްފައެވެ.