ޖަމީލު މިގޮތަށް ވިދާޅުވީ، އެޗްޕީއޭ އިން ގައިޑްލައިންތަކަށް އަމަލު ކުރުމުގައި ރައްޔިތުންނާއި ސަރުކާރުގެ އިސްވެރިންނާ ދެމެދު ތަފާތުކުރުން ގެންގުޅޭ ކަމަށް ބުނެ ގިނަ ބަޔަކު ކަންބޮޑުވުން ފާޅުކޮށްފައިވަނިކޮށެވެ. އެގޮތުން މިނިސްޓަރު ޝާހިދު ވަނީ ދުބާއީއަށް ވަޑައިގެންނެވުމަށްފަހު ހޮނިހިރު ދުވަހު ރައްޖެ އައިސް އޭގެ އަނެއް ދުވަހު ސަރުކާރުން ބޭއްވި އިވެންޓެއްގައި ބައިވެރިވެވަޑައިގެންފައެވެ.
ކޮވިޑް-19 އާ ގުޅިގެން އަޅާ ފިޔަވަޅުތަކުގެ ތެރޭގައި ރާއްޖެއިން ބޭރަށް ދިއުމަށް ފަހު އެނބުރި ގައުމަށް އައުމުން 14 ދުވަހު ކަރަންޓީނުގައި ހުންނަން ޖެހެއެވެ.
މިކަމާ ގުޅިގެން ޖަމީލު ކުރެއްވި ޓްވީޓެއްގައި ވިދާޅުވީ ޝާހިދުގެ ގެ ޢަމަލުތަކުން ހުދު ސަރުކާރުން ކޮވިޑްގެ ފިޔަވަޅުތައް ޤަބޫލްނުކުރާކަން ސާބިތުވެއްޖެ ކަމަށާއި އެތައް ބައެއް ފުރާނައަށް ނުރައްކާވެއްޖެ ކަމަށެވެ.
“އެކަން ރަނގަޅުނަމަ، އެތަައް ޒުވާނުންނަކަށް ކުރި ޖޫރިމަނާ ބާތިލް. އެ ފައިސާ އަނބުރާ ދޭންޖެހޭ. ޤާނޫނުގެ ޙުކުމް ސަމާސާއެއް ކަމަށް ދެކެނީތޯ؟” ޖަމީލު ވިދާޅުވިއެވެ.
ހުދު ސަރުކާރުން ކޮވިޑްގެ ފިޔަވަޅުތައް ޤަބޫލްނުކުރާކަން @abdulla_shahid ގެ ޢަމަލުތަކުން ސާބިތުވެއްޖެ. އެތައް ބައެއް ފުރާނައަށް ނުރައްކާވެއްޖެ. އެކަން ރަނގަޅުނަމަ، އެތަައް ޒުވާނުންނަކަށް ކުރި ޖޫރިމަނާ ބާތިލް. އެ ފައިސާ އަނބުރާ ދޭންޖެހޭ. ޤާނޫނުގެ ޙުކުމް ސަމާސާއެއް ކަމަށް ދެކެނީތޯ؟ pic.twitter.com/XJadOU07Mk
— Mohamed Jameel Ahmed (@MJameelAhmed) September 23, 2020
މިކަމާ ގުޅިގެން އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ ފޮރިން މިނިސްޓަރު ޝާހިދު ކަރަންޓީނުގައި ހުރުމަށްފަހު، ސްޓޭޓް ބެންކް އޮފް އިންޑިއާގައި ބޭއްވި އިވެންޓަށް ދިޔުމަށް ހުއްދަ ދިނީ ދައުލަތުގެ ޒިންމާއެއް އަދާކުރަންޖެހެތީ ކަމަށެވެ.
ނަޒްލާ ވިދާޅުވީ، ވަކި ހާއްސަ ހާލަތްތަކުގައި އާންމު ފަރާތްތަކަށްވެސް ބައެއް ކަންކަމުގައި ކަރަންޓީންގައި ހުންނަ އިރުވެސް ވަކި އުސޫލުތަކެއްގެ މަތިން ވަކި ކަންކަމަށް ވަޑައިގަތުމަށް ހުއްދަ ދެމުންދާ ކަމަށެވެ.