ހުޅުމާލެ ސަފާރީ ރޭޕް ކޭސް މައްސަލައިގައި، ޖިންސީ އަނިޔާ ލިބިފައިވާ ފަރާތުގެ ޤާނޫނީ ވަކީލުން މައްސަލައިގެ އިންވެސްޓިގޭޝަން އޮފިސަރުންނާއި މެދު ނޭޝަނަލް އިންޓެގްރިޓީ ކޮމިޝަނަށް ހުށަހަޅާފައިވާ މައްސަލަ އެ ކޮމިޝަނުން ބަލައިގަނެ، ވަކީލުންގެ ބަޔާން ނަގައިފިއެވެ.
ހުޅުމާލޭގެ ފަޅުތެރޭގައި އޮތް ސަފާރީއެއްގައި ބިދޭސީ އަންހެނެއް ރޭޕް ކުރި ކަމަށް ބުނާ މައްސަލައިގައި ކުށުގެ ވެށިން ހައްޔަރު ކުރި ދެ މީހުން ވަނީ އެ މީހުން ހައްޔަރުގައި ބަހައްޓަން ޖެހޭ އެއްވެސް ސަބަބެއް ނެތް ކަމަށް ބުނެ ދޫކޮށްލާފައެވެ. 39 އަހަރުގެ ދިވެހި ދެ ފިރިހެނުން އެ ކޭސްއާއި ގުޅިގެން ހައްޔަރު ކުރިއިރު އެ މީހުން ހައްޔަރު ކުރިތާ މާ ގިނަ އިރުތަކެއް ނުވެ ދޫކޮށްލި މައްސަލައިގައި ނޫސްވެރިންގެ ސުވާލުތައް ފުލުހުންނަށް އަމާޒުވެގެން ވެސް ދިޔައެވެ.
މިދިޔަ ޖޫން މަހުގެ 26 ވަނަ ދުވަހު ހިނގި އެ ހާދިސާ ތަހުގީގު ކުރުމުގައި ފުލުހުން ތަފާތުކުރުން ގެންގުޅޭކަމުގެ ތުހުމަތު ކުރެވެ އެވެ. އަދި އެ މައްސަލައިގައި ވަކި ގޮތަކަށް އަމަލު ކުރަމުންދާކަމާއި، ކޭސްގައި އޮޅުވާލުންތަކެއް ގެންގުޅޭކަމުގެ ތުހުމަތުތައް މީގެ ކުރިން ވެސް ކުރެވުނެވެ.
ކޭސްއާއި ގުޅޭ ވަހަކަތައް ނުދެކެވޭތާ ދުވަސްތަކަކަށްފަހު ސޯޝަލް މީޑިއާގައި ވިކްޓިމްގެ ގާނޫނީ ވަކީލުން އާއްމު ކުރި ވީޑިއޯއެއްގައި މައްސަލައިގެ އައިއޯ ވިކްޓިމްގެ ބަޔާން ބަދަލު ކުރުމަށް ވާހަކަ ދައްކާ މަންޒަރު ފެނެއެވެ. އަދި އެ ވީޑިއޯ އާއްމުކޮށް ގާނޫނީ ވަކީލް ޝަފީއާ ރިޒާ ކުރައްވާފައިވާ ޓްވީޓެއްގައި ވިދާޅުވީ ސަފާރީ ކޭސްގައި ޖިންސީ ޝިކާރައަކަށް ވީ މީހާގެ ސްޓޭޓްމެންޓު ބަދަލު ކުރުމަށް ފުލުހުން މަޝްވަރާ ކުރާތަން ފެނުމުން އޭގެއިން ވެސް މައްސަލައިގައި ފުލުހުންގެ ނިޔަތް ވަރަށް ސާފު ކަމަށެވެ. މައްސަލައިގެ އައިއޯގެ ފަރާތުން ފެނުނު މި އަމަލު ފުލުހުންނާއި، ޕްރޮސެކިއުޓާ ޖެނެރަލްގެ އޮފީސް އަދި، ނޭޝަނަލް އިންޓަގްރިޓީ ކޮމިޝަނަށް ވަކީލުން ހުށަހެޅީ މިދިޔަ އާދީއްތަ ދުވަހުއެވެ.
މައްސަލައިގައި “ސަންގު” އާއި ވާހަކަ ދައްކަވަމުން ވަކީލުން ވިދާޅުވީ ސަފާރީ ކޭސް މައްސަލައިގައި، ޖިންސީ އަނިޔާ ލިބިފައިވާ ފަރާތުގެ އަދުލުވެރިކަމާއި އަވަސް ކަމާއެކު މައްސަލަ ތަހުގީގުކޮށް ނިންމުމަށް ލިބިފައިވާ ހައްގަށް އުނިކަން ލިބޭގޮތަށް، އެ މައްސަލައިގެ ކުށުގެ ވެށިން އަނިޔާ ލިބޭ ފަރާތާ ބައްދަލުވި ހިނދުން ފެށިގެން މިއަދާ ހަމައަށް ވެސް ފުލުހުން އަމަލުކޮށްފައިވާ ކަމަށެވެ. އަދި އެކަން އެންއައިސީއަށް މިހާރު ހުށަހަޅާ، އެކަމުގެ ކަންބޮޑުވުން އެ އިދާރާއާއި ހިއްސާކޮށްފައިވާނެ ކަމަށް ވަކީލުން ވިދާޅުވިއެވެ.
We welcome @NICgovmv’s decision to register our complaint against @PoliceMv and taking our statements today. Still awaiting a response from @M_Hameedh with regard to what @PoliceMv is doing about our complaint. @ShafeeaRiza
— Noorbaan Fahmy (@Noorbaan) October 13, 2020
މި މައްސަލައިގެ އިންވެސްޓިގޭޝަން އޮފިސަރުންނާމެދު ކުރާ ތުހުމަތުތަކުގެ ތެރޭގައި، ހުޅުމާލެ ސަފާރީ ރޭޕް މައްސަލައިގައި، ޖިންސީ އަނިޔާ ލިބިފައިވާ ފަރާތުގެ އަދުލުވެރިކަމާއި އަވަސް ކަމާއެކު މައްސަލަ ތަހުގީގުކޮށް ނިންމުމަށް ލިބިފައިވާ ހައްގަށް އުނިކަން ލިބޭ ގޮތަށް ތަކުރާރުކޮށް އަމަލުކޮށްފައިވުމާއި، މައްސަލައިގެ ހެކި ހޯދުމަށް ގަސްދުގައި އިހުމާލުވެފައިވުން ހިމެނެއެވެ.
ވަކީލުންގެ އެންމެ ބޮޑު އެއް ކަންބޮޑުވުމަކީ ރައްކާތެރިކަން ކަށަވަރުކޮށްދޭންޖެހޭ ފަރާތް ކަމަށްވާ މޯލްޑިވްސް ޕޮލިސް ސާވިސްއިން ކުށްވެރިން ފަދައިން މައްސަލައިގެ ގާނޫނީ ވަކީލުންނާމެދު ދެކި، އެފަރާތްތަކަށް ފުރައްސާރަ ކުރަމުން ދާތީ އެވެ.
Having shared with @NICgovmv about the multiple misconduct of @PoliceMv during the investigation of the #SafariRapeCase by the IOs, we remain confident that NIC will take the necessary action. @Noorbaan https://t.co/DEpxG11jGC
— Shafeea Riza (@ShafeeaRiza) October 13, 2020
ސޯޝަލް މީޑިއާގައި އާއްމުކޮށްފައި ވަނީ ދެ މިނެޓުގެ ވީޑިއޯއެކެވެ. އަދި އެ ވީޑިއޯގައި މައްސަލައިގެ އައިއޯ ވިކްޓިމްގެ ސްޓޭޓްމެންޓުގައި ހިމެނޭ ބައެއް ނުކުތާތައް ފާހަގަކޮށް އޭގެއިން އުނި ކުރަންވީ ބައިތަކަކީ ކޮބައިތޯ ސުވާލު ކުރެއެވެ. އެއާއި އެކު އޭނާއި އެކު ހުންނަ އިތުރު މީހަކު ހުރިހާ ވާހަކައެއް ހިމަނާފައިވާނެ ކަމަށް ބުނެއެވެ.
ސޯޝަލް މީޑިއާގައި އާއްމުވެފައިވާ އެ ވީޑިއޯގެ ސަބަބުން ފުލުހުންނަށް ދަނީ ވަރަށް ބޮޑެތި ފާޑުކިއުންތައް އަމާޒުވަމުންނެވެ. އެހެން ނަމަވެސް ވިކްޓިމްގެ ބަޔާނަށް އެއްވެސް އުނި އިތުރެއް ގެނައުމަށް މަސައްކަތް ނުކުރާކަމަށް ބުނެ އާއްމު ކުރި ބަޔާނެއްގައި ފުލުހުން ބުނެފައިވަނީ އެ ވީޑިއޯ ކްލިޕްއަކީ މައްސަލައާއި ގުޅިގެން ވިކްޓިމް އާއި، ސްކައިޕް މެދުވެރިކޮށް ކުރި އިންޓަވިއު ރެކޯޑިންއަކަށް ފަހު އޭނާ ދެއްކި ވާހަކަތަކުގެ މައްޗަށް ބަޔާން މަރުހަލާގައި ތަހުގީގު ކުރި ފަރާތްތަކުގެ މެދުގައި ދެކެވުނު ވާހަކަތަކެއް ކަމަށެވެ. އަދި އެއީ ވިކްޓިމްގެ ބަޔާނަށް ބަދަލު ގެނައުމުގެ ގޮތުން ދެއްކި ވާހަކައެއް ނޫން ކަމަށް ފުލުހުން ބުނެއެވެ.