އިސްލާމް ދީނަށް ފުރައްސާރަކުރި އިންޑިއާ މީހާ ޑީޕޯޓް ކޮށްލުމުން އިޔާޒްގެ ތައުރީފް ސަރުކާރަށް!

މަސްތުވެގެން މާލޭގެ މަގުމަތީގައި ހުރެ އިސްލާމްދީނަށް ފުރައްސާރަކުރި އިންޑީއާ މީހާ ރާއްޖެއިން ޑީޕޯޓުކޮށްލުމުން މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒު، ސަރުކާރަށް ތައުރީފް ކުރައްވައިފިއެވެ.

ފުލުހުންގެ މީޑިއާ އޮފިޝަލް އިއްޔެ ވިދާޅުވި ގޮތުގައި މަސްތުގެ ހާލަތުގައި ހުރެ ދީނަށް ފުރައްސާރަ ކުރި އިންޑިއާގެ ފިރިހެން މީހާ އެއްގޮތަކަށް ވެސް ރާއްޖެ ނާދެވޭ ގޮތަށް ރާއްޖެއިން ޑީޕޯޓުކޮށްލާފައިވާ ކަމަށެވެ. އެގޮތުން އޭނާ ރާއްޖެ އިން ފޮނުވާލީ މި މަހުގެ 13 ވަނަ ދުވަހު ކަމަށް ފުލުހުން ބުނެއެވެ.

މިކަމާ ގުޅިގެން އިޔާޒް ކުރެއްވި ޓްވީޓެއްގައި ވިދާޅުވީ އިންޑިއާ މީހާ ރާއްޖޭ ނާދެވޭ ގޮތަށް ފޮނުވާލި ފޮނުވާލުމަށް ސަރުކާރަށް މަރުހަބާ ދަންނަވާ ކަމަށާއި އެއީ ހިތްވަރުގަދަ ދީނީ އަދި ގައުމީ ނިންމުމެއް ކަމަށެވެ.

“މި ރާއްޖޭގައި އިސްލާމް ދީނަށް ފުރައްސާރަކުރުމަށް ޖާގަ ދެވިގެންނުވާނެ. ރައީސް އިބްރާހިމް މުހައްމަދު ސޯލިހުއަށް ސާބިތުކަން ދެއްވާށި.” އިޔާޒް ވިދާޅުވިއެވެ.

Islam Dheenah furassaara kuri meeha Raajje naadhevey gothah fonuvaali fonuvaalumah sarukaarah marhaba dhannavan. Thiyaee v hiyvaru gadha Dheeny adhi Gaumy nimmevumeh. Mi Raajje gai Islam Dheenah furassaara kurumah jaaga dhevigen nuvaane.
HEP @ibusolih ah saabith kan dhevvaashi.

— Dr Mohamed Iyaz (@dr_iyaz) October 19, 2020

ދީނަށް ފުރައްސާރަކުރި މައްސަލައާ ގުޅިގެން އޭނާ ފުލުހުންގެ ހައްޔަރަށް ވެސް ގެންގޮސްފައިވެއެވެ. ނަމަވެސް އޭނާގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ވަނީ ދޫކޮށްލާފައެވެ.

ބަންދުން ދޫކޮށްލި ނަމަވެސް އޭނާގެ މައްސަލަ ތަހުގީގު ކުރަމުންދާ ކަމަށް ފުލުހުން ކުރިން ބުނެފައިވެއެވެ. އެ މައްސަލަ ބޮޑުވުމުން އޭނާ ވަނީ ފަހުން މައާފަށް އެދި ވީޑިއޯއެއް ވެސް އާންމުކޮށްފައެވެ.