ޤިޞާޞް ހިފުމާއި ދެކޮޅު މީޙުން އަނިޔާވެރިގޮތުގައި މީހުން މެރުމަށް ތާއީދުކުރަނީތޯ ޑރ މުހައްމަދު އިޔާޒް ސުވާލުކުރައްވައިފިއެވެ.
މަރުގެ ހުކުމް ތަންފީޒް ކުރާ ވާހަކައާއި ތަންފީޒް ނުކުރުމުގެ ސަބަބުން ވާނެ ގެއްލުންތަކުގެ ވާހަކަތައް އަނެއްކާވެސް ފެންމަތިވެފައި މިވަނީ، މާލޭގައި ރަހުމު ކުޑަ ގޮތަކަށް 22 އަހަރުގެ ޒުވާނަކު މަރާލުމާއި ގުޅިގެންނެވެ.
ނަމަވެސް ހޯމް މިނިސްޓަރަކަށް ހުންނެވި އިމްރާން އަބްދުﷲ ވަނީ ވޭތުވެދިޔަ ބައި ގަރުނެއްހާ ދުވަހު ހުރިހާ ސަރުކާރުތަކުން ގެންގުޅެމުން އައީ މޮރިޓޯރިއަމް ދެމެހެއްޓުމުގެ ސިޔާސަތު ކަމަށާއި މި ސަރުކާރުން ވެސް ގެންގުޅެނީ އެ ސިޔާސަތު ކަމަށް ވިދާޅުވެފައެވެ.
މި ދަނޑިވަޅުގައި ޓްވީޓެއް ކުރައްވާ ޑރ އިޔާޒް ވަނީ ޤިޞާޞް އާއި ދެކޮޅަށް ނިކުންނަ ފަރާތްތަށް އަނިޔާވެރިގޮތުގައި މީހުން މެރުމަށް ތާއީދު ކުރަނީތޯ ސުވާލުކުރައްވާފައެވެ. އަދި މަރުގެ ހުކުމް ތަންފީޒް ކުރުމަށް ދެކޮޅު ހަދާ ފަރާތްތަކަށް ގޯސް ވަނީ އިސްލާމީ ޝަރީއަތުގެ ވާހަކަދެއްކީމައިކަމަށް ޓުވީޓުގައިވެއެވެ.
ޤިޞާޞް ހިފުމާއި ދެކޮޅު މީޙުން އަނިޔާވެރިގޮތުގައި މީހުން މެރުމަށް ތާއީދުކުރަނީބާ؟ އެބައިމީހުންނަށް ގޯސްމިވަނީ އިސްލާމީ ޝަރީޢަތުގައި އޮންނަ ޙުކުމެއް ތަންފީޛުކުރާ ވާހަކަ ދެއްކީމާ. އެޙުކުމް ތަންފީޛު ކުރަން ޖެހުނީ ކީއްވެގެން ކަމެއް އެމީހުންނަށް ނުވިސްނޭކަހަލަ!ﷲ ދެއްވާފައިވާ ސިކުނޑިން
— Dr.Mohamed Iyaz (@dr_iyaz) August 8, 2022
ކުރީގެ ރައީސް އަބްދުﷲ ޔާމީންގެ ވެރިކަމުގައި މަރުގެ ހުކުމް ތަންފީޒުކުރުމަށް ކަމަށްބުނެ މަސައްކަތްތަކެއް ކޮށްފައިވެއެވެ. އެެހެންނަމަވެސް އެކަން ތަންފީޒުކޮށްފައެއް ނުވެއެވެ.
މިކަމާއި ގުޅީގެން އޭރުގެ ހޯމް މިނިސްޓަަކަށް ހުންނެވި އުމަރު ނަސީރު ވިދާޅުވީ މި ޤައުމުގައި ހައްޤަކާ ނުލާ މީހުން މަރާ މީހުންގެ ފަރާތުން ޤިޞާޞް ހިފުމަށް ބޭނުންވާނެ ވަޞީލަތްތައް ހުރިކަމަށާއި ނެތީ އެކަން ކުރަން ކެރޭނެ ވެރިއެއްކަމަށެވެ.
މަރަށް މަރު ހިފުމަށް އުމަރުގެ ހޯމް މިނިސްޓަރުކަމުގައި މަސައްކަތްތަކެއް ކުރިއިރު އޭރު ރައީސް އަބްދުﷲ ޔާމީން އަބްދުލްގައްޔޫމްގެ ވިސްނުންފުޅަކީ ކޮބައިތޯ ސުވާލު ކުރުމުން އުމަރު ވިދާޅުވީ ރައީސް ޔާމީންގެ އެއްބާރުލުން ލިބުނު ކަމަށެވެ. އަދި ކެބިނެޓުގައި އެތައް ގަޑިއިރެއްގެ މަޝްވަރާތަކަށް ފަހު ވަޒީރުން ދެއްވި ލަފައަކީ ވެސް އެއީކަން ފާހަގަކުރެއްވި އެވެ.