ހެލްތު މިނިސްޓަރު ކަމަށް އަހްމަދު ނަސީމް (ކެރެފާ ނަސީމް) އައްޔަނުކުރުމަކީ ސިއްހީ ދާއިރާއަށް ކުރި ބޮޑު މަލާމާތެއް ކަމަށް މާވަށު ދާއިރާގެ މެމްބަރު އަދި ޕިއެންސީގެ ނައިބް ރައީސް މުހައްމަދު ސައީދު ވިދާޅުވެއްޖެއެވެ.
ރައީސް އިބްރާހިމް މުހައްމަދު ސޯލިހުގެ މި ނިންމެވުމަށް ފާޑިވިދާޅުވެ ސައީދު ކުރެއްވި ޓްވީޓެއްގައި ވިދާޅުވީ ނަސީމް އައްޔަނު ކުރެއްވީ ޒުވާނުންނާއި ތައުލީމީ ދިވެހި ދަރީން ބާކީކޮށް އާއިލާގެ މެމްބަރުން ބާރުވެރިކުރަނީ ރައީސް މުހައްމަދު ނަޝީދު އާއި ރައީސް ސޯލިހުގެ “ބާރު” ޕާޓީތެރޭ ކަނޑައެޅުމަށް ހިންގާ ވާދަވެރިކަމުގެ ތެރެއިން ކަމަށެވެ.
Miee sihhee dhaairaa ah kuri bodu malaamaatheh. Zuvaanunnaai thauleemee dhivehi dhareen baakeekoh aailaage memberun baaruverikuranee RN aai RS ge “baaru” party therey kanda elhumah hingaa vaadhaverikamuge therein https://t.co/NFit4ZrrLU
— Mohamed Saeed (@em_saeed) October 23, 2020
ހެލްތު މިނިސްޓަރުގެ މަގާމު ހުސްވީ، އެ މަގާމުން އަބްދުﷲ އަމީން އިސްތިއުފާ ދެއްވުމާ ގުޅިގެންނެވެ. އޭނާ އިސްތިއުފާ ދެއްވާފައި ވަނީ ކޮވިޑް 19 އާ ގުޅިގެން، ރާއްޖެ ގެންނަން އުޅުނު ވެންޓިލޭޓަރުތަކުގެ ތެރެއިން ދުބާއީ ކުންފުންޏަކާ ހަވާލު ކުރި 75 ވެންޓިލޭޓަރުގައި ކޮރަޕްޝަންގެ ތުހުމަތުތަކެއް ހިމެނި، އެ މައްސަލަ ބަލަމުން ދަނިކޮށެވެ.
ހެލްތު މިނިސްޓަރުގެ މަގާމާ ހަވާލުވެވަޑައިގެންނެވުމުގެ ކުރިން ނަސީމް ހުންނެވީ ރައީސް އޮފީހުގެ މިނިސްޓަރުގެ މަގާމުގަ އެވެ. އޭނާ ވަނީ ރައީސް މުހަންމަދު ނަޝީދުގެ ސަރުކާރުގައި މާޗް 21، 2011 އިން ފެބްރުއަރީ 7، 2012ގެ ނިޔަލަށް ފޮރިން މިނިސްޓަރު ކަމުގެ މަގާމު ވެސް ފުރުއްވައިފަ އެވެ.