ހުޅުމާލޭ ފަޅުގައި އަޅާފައި އޮތް ސަފާރީއެއްގައި އަންހެނަކު ރޭޕް ކުރި ކަމަށް ވާހަކަ ދެކެވުނު ނަމަވެސް ސަފާރީގައި އަންހެނަކު ރޭޕް ކޮށްފައި ނުވާކަމަށާއި ސަފާރީގައި ހިނގީ ވަރަށް އާދައިގެ ކުޑަކަމެއް ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
“އަޅުގަނޑުވެސް އެ ވާހަކަ އަޑުއެހީމާ، އެ ވާހަކަ ފެތުރިގެން އައީމާ އަޅުގަނޑަށް ވެސް ތަސައްވަރު ކުރެވުނީ ހަމަ ވަރަށް ބޮޑު ރޭޕް ކޭސް އެކޭ މިއީ. އެހެންނަމަވެސް އެ މައްސަލަ ގާތުން ބަލާލީމާ[އެނގުނު އެހެން ނޫންކަންވީ]. އަޅުގަނޑަށް ދެން މިކަހަލަ ތަނެއްގައި އެހާ ފަސޭހައެއް ނޫން އެ ހިނގާފައި އޮތް ކަންތައް ނުވަތަ އެ އިބާރާތް ބޭނުން ކުރާކަކަށް،” އިމްރާން ވިދާޅުވިއެވެ.
އިމްރާން ވިދާޅުވީ އެ ހާދިސާގައި ކަންތައް ހިނގީ އާންމު ބަޔެއްގެ ތެރޭގައި ހުރެފައިވެސް މިީހަކަށް ކޮށްލެވިދާނެ ވަރުގެ ކުޑަ ކަމެއްގެ ވާހަކަ ކަމަށާއި އެއީ ކުރީމަ ކަމެއް ކުރިކަންވެސް ނެނގޭ ވަރުގެ ކަމެއް ކަމަށެވެ.
އިމްރާން ވިދާޅުވީ ސަފާރީގައި ކޭސް ރިޕޯޓު ކުރެވިގެން އައި އިރު އެ މައްސަލައިގެ ވިކްޓިމްގެ ބަޔާންވެސް އެކި ގޮތްގޮތަށް އެކި ފަހަރު މަތިން ބަދަލުވެފައިވާ ކަމަށާއި ޕްރޮސީޖަރަލް މައްސަލަ ދިމާވީ ބަޔާނަށް ގެނެސްފައިވާ ބަދަލުތަކުގެ ސަބަބުން ކަމަށެވެ.
advertisment