ރައްޔިތުންގެ މަޖިލީހަށް ފިނޭންސް މިނިސްޓްރީން ބަޖެޓު ހުށައަޅާނީ މިމަހު 9 ގައި ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލިސް ފައްޓަވައިދެއްވައި ދެއްކެވި ވާހަކަފުޅުގައި ރައީސް ނަޝީދު ވިދާޅުވީ މަޖިލީހަށް ބަޖެޓު ހުށައަޅާނީ މިމަހު 9 ގައި ކަމަށާއި އެދުވަހު ބަޖެޓު ހުށައަޅައިގެން ބަޖެޓުގެ މަސައްކަތް ކުރިއަށް ގެންދެވޭ މިންވަރު ލަސްނުވާނެ ކަމަށެވެ. އަދި އެއަށް ފަހު ކޮމިޓީ މަރުހަލާގައި ބަޖެޓާއި މެދު ވާހަކަދެކެވި އިސްލާހު ހުށައެޅިގެންދާނެ ކަމަށް އެމަނިކުފާނު ވިދާޅުވިއެވެ.
މަޖިލީހުގެ ތަޅުމުގައި މެމްބަރުން ބަޖެޓަށް ބަހުސް ކުރަން ފަށާނީ ނޮވެމްބަރު މަހުގެ 16 ގައި ކަމަށާއި އަދި ޑިސެމްބަރު މަހުގެ ކުރީކޮޅު ބަޖެޓުގެ މަސައްކަތް ނިންމާލެވޭނެކަމަށް ނަޝީދު ވިދާޅުވިއެވެ.
ބަޖެޓުގެ މަސައްކަތް ކުރުމަށް މަޖިލީހުން ތައްޔާރުވަމުން އަންނައިރު، މިއަހަރުގެ މިމަޖިލީހަކީ އެންމެ މަސައްކަތްތެރި މަޖިލީހުގެ ގޮތުގައި ރިޔާސަތުން ފާހަގަކުރެއެވެ. އެހެންނަމަވެސް، މިދިމާވި ކޮވިޑް-19ގެ ހާލަތާ ގުޅިގެން މިއަހަރުގެ ބަޖެޓް ރިވައިސް ކުރުމަށްފަހު ރިވައިސްޑް ބަޖެޓެއް މިހާތަނަށް ހުށައަޅާފައިނުވާތީ އިދިކޮޅު ފަރާތްތަކުން އަންނަނީ ފާޑުކިޔަމުންނެވެ.
advertisment