ލޯނާއި ސުކޫކުގެ ތަފްސީލްތައް މަޖިލީހާއި ހިއްސާކުރަން ޖެހޭ ގޮތަށް ބަޖެޓް ރިޕޯޓަށް އިސްލާހެއް ހުށަހަޅައިފިއެވެ.
2021 ވަނަ އަހަރުގެ ބަޖެޓް ދިރާސާކުރިގޮތުގެ ރިޕޯޓަށް ގަލޮޅު އުތުރު ދާއިރާގެ މެމްބަރު އީވާ އަބްދުﷲ ހުށަހެޅުއްވި އެ އިސްލާހާއި މެދު ވާހަކަދައްކަވަމުން އޭނާ ވިދާޅުވީ، ދައުލަތުން ނަގާ ލޯނާއި، ސޮވަރިން ބޮންޑުގެ މައުލޫމާތާއި، ދައުލަތުން ވިއްކާ ސުކޫކާއި ޓީބޮންޑް ފަދަ ކަންކަމުގެ މައުލޫމާތު ހާމަކުރެވެން ޖެހޭ ކަމަށެވެ.
ނަމަވެސް އެގޮތަށް ފިނޭންސް މިނިސްޓްރީން އެ މައުލޫމާތުތައް މަޖިލީހަށް ހުށަހަޅަމުން ނުދާތީ، ބަޖެޓަށް އެ އިސްލާހު ހުށަހަޅަން ޖެހުނީ ކަމަށްވެސް އީވާ ވިދާޅުވިއެވެ.
“ދައުލަތުގެ ފަރާތުން ނަގާ ލޯނާއި، ސޮވެރިން ގެރެންޓީ އާއި، އަދި ސުކޫކް ޓީ ބޮންޑް ވިއްކާ ނަމަ އޭގެ ފުރިހަމަ ހުރިހާ ތަފްސީލް ކާކަށްތޯ ވިއްކީ ކޮން ރޭޓެއްގައި ކޮން ކަމަކަށްތޯ، ފުރިހަމަ ތަފްސީލް ކުއަރޓަލީ ރިޕޯޓެއްގެ ގޮތުގައި މަނިކުފާނުގެ އަތްޕުޅަށް އަރުވަން ޖެހޭނެ. ވާހަކައަކީ ރައްޔިތުންގެ މަޖިލީހަށް ހުށަހަޅަން ވާނެއޭ.” އީވާ ވިދާޅުވިއެވެ.
އީވާ ވިދާޅުވީ، މިހާރު މިއަހަރަށް އޮތް ސުކޫކުގެ ކަންތައް ފިނޭންސް މިނިސްޓްރީން ކުރިއަށް އެބަ ގެންދާ ކަމަށެވެ.
މިއަދާ ހަމައަށްވެސް އެކަހަލަ މަސައްކަތެއް ހިންގާ ނަމަ މަޖިލީހަށް އެނގެން ޖެހޭނެ ކަމަށާއި، އެއީ ސިއްރުސިއްރުން ފިނޭންސް މިނިސްޓްރީއަށް އެކަނި ކުރެވޭނެކަމެއްނޫން ކަމަށް އީވާ ވިދާޅުވިއެވެ.
advertisment