އައްޑޫ ސިޓީ ގަމުގައި ހިންގާ ފްލައިން ސްކޫލްގެ މައްސަލައިގައި ރައްޔިތުންގެ މަޖިލީހުން ހައްލެއް ހޯދައިދިނުމަށް މަސައްކަތް ކުރައްވާނެ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އަދި ޕީއެންސީގެ ނައިބް ރައީސް އާދަމް ޝަރީފް އުމަރު ވިދާޅުވެއްޖެއެވެ.
އާދަމް ޝަރީފް ކުރެއްވި ޓްވީޓެއްގައި ވިދާޅުވީ ފްލައިން ސްކޫލްގެ މައްސަލައަކީ ވަރަށް ސީރިއަސް މައްސަލައެއް ކަމަށާއި، މި މައްސަލައަކީ ކޮންމެހެެންވެސް ހައްލު ހޯދަން ޖެހިފައިވާ މައްސަލައެއް ކަމަށެވެ.
“ކިޔަވާ ދަރިވަރުން އުފުލަމުންދާ ތަކުލީފުތަކަށް ހައްލެއް ބޭނުންވޭ. މި މައްސަލައަށް މަޖިލިސް ތެރެއިން ދާއިމީ ފަރުވާއެއް ހޯދަން މަސައްކަތް ކުރާނަން.” އާދަމް ޝަރީފް ވިދާޅުވިއެވެ.
Miee varah serious massalaeh. Gina dhuvasvee, hama kommehenves hallu beynunvaa massalaeh. Kiyavaa dharivarun ufulamundhaa thakuleefuthakah halleh beynunvey. Mi massala ah majlis therein dhaaimee faruvaaeh hoadhan masakkaiy kuraanan, IA. @ifly229https://t.co/s8BWjndean
— Adam Shareef Umar (@Adamshareefz) December 7, 2020
ފްލައިން ސްކޫލްގައި ހުރި މައްސަލަތައް މީޑިއާ އިންނާއި ސޯޝަލް މީޑިއާގެ ޒަރިއްޔާ އިން ގިނަ ބައެއްގެ ސަމާލުކަމަށް އައިސްފައިވީ ނަމަވެސް އެ މައްސަލަތަކަށް އަދި މިހާތަނަށް އެއްވެސް ހައްލެއް އައިސްފައެއް ނުވެއެވެ. އޭގެ ބަދަލުގައި ދަރިވަރުންނަށް ކުރިމަތިކުރުވާ ފިއްތުންތައް އަންނަނީ ދުވަހަކަށް ދުވަހަކަށް ވުރެ ދުވަހެއް އިތުރުވަމުންނެވެ.
އެގޮތުން މިހާތަނަށް 20 އަށްވުރެ ގިނަ ދަރިވަރުން އެ ސްކޫލުން ވަކިކޮށްފައިވާއިރު، އެކި ދުވަސްމަތިން ދަރިވަރުންނަށް އަންނަނީ ވަކި މުއްދަތެއްގެ ތެރޭގައި ކޯސް ނިންމަންޖެހޭނެ ކަމަށް ބުނެ އިންޒާރުގެ މެއިލްތައް ވެސް ލިބެމުންނެވެ.
advertisment