ވަކި ފިކުރަކަށް ނިސްބަތް ވުމަކީ ދައުވާ ނުކުރެވެންވީ ސަބަބެއް ނޫން: އިޔާޒް

ސިޔާސީ ވަކި ފިކުރަކަށް ނިސްބަތް ވުމަކީ ދައުވާ ނުކުރެވެންވީ ސަބަބެއް ނޫން ކަމަށް ދީނީ އިލްމުވެރިޔާ ޑރ. މުހައްމަދު އިޔާޒް ވިދާޅުވެއްޖެއެވެ.

އިޔާޒް މިހެން ވިދާޅުވީ ކުރީގެ ޗީފް އޮފް ޑިފެންސް ފޯސްގެ މޭޖާ ޖެނެރަލް އަޙްމަދު ޝިޔާމްގެ މައްޗަށް ދައުވާ ކުރަނީ ބަދަލު ހިފުމުގެ ގޮތުން ކަމަށް މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވި ވާހަކައާ ގުޅިގެންނެވެ.

އެގޮތުން އިޔާޒް ކުރެއްވި ޓްވީޓެއްގައި ވިދާޅުވީ ވަކި ސަރުކާރަކަށް ނުވަތަ ވަކި ފިކުރަކަށް ނިސްބަތްވުމަކީ އެ މީހަކު ގާނޫނާއި ގަވާއިދާ ހިލާފަށް ކޮށްފައިވާ ކަންތައްތަކުގެ މަތިއެޅި، ދައުވާ ނުކުރެވެންވީ ސަބަބެއް ނޫން ކަމަށެވެ.

“އެއްވެސް މީހަކަށް ގާނޫނަށްވުރެ މަތީގައި ހުރެވިގެން ނުވާނެ.” އިޔާޒް ވިދާޅުވިއެވެ.

Vaki sarukaarakah nuvatha vaki fikurakah nisbaiy vun aee emeehaku Qaanoonaai Qavaidhaai khilaafah kohfaivaa kanthah thakuge mathi elhi, dhauvaa nukureven vee sababeh noon. Evves meehakah Qaanoonah vure matheegai hurevigen nuvaane.

— Dr.Mohamed Iyaz (@dr_iyaz) December 24, 2020

ޝިޔާމްގެ މައްޗަށް ދައުވާ ކުރަން އޭސީސީ އިން ޕީޖީ އަށް މައްސަލަ ފޮނުވީ ޝިޔާމްގެ ބައްޕަ އިބްރާހިމް ޝާކިރު (ޝާކިރުބެ) ގިނަ ދުވަސްތަކެއް ވަންދެން ވިލިނގިލީގެ ސިފައިންގެ މަރުކަޒުގައި ދިރިއުޅުނު ކަމަށް ބުނާ މައްސަލާގައެވެ.

ދައުވާ ކުރަން ފޮނުވުމުން އާދަމް ޝަރީފު ކުރެއްވި ޓުވީޓެއްގައި ވިދާޅުވީ މޭޖާ ޝިޔާމްގެ މައްޗަށް ދައުވާ ކުރަން ނިންމީ ބަޣާވާތް ނާކާމިޔާބު ކޮށްލުމުން ބަދަލުހިފަން ކަމަށާއި އެއީ އެ ސިލްސިލާއަށް އިތުރުވި ބޮޅެއް ކަމަށެވެ.