ސަން އިންވެސްޓްމަންޓް ކުންފުނީގެ މައްޗަށް ކުރާ މަނީ ލޯންޑްރިންގެ ދައުވާގައި ދިފާއީ ހެއްކެއްގެ ގޮތުގައި ރައީސް އަބްދުﷲ ޔާމީންގެ ނަން އެ ކުންފުނީގެ ފަރާތުން މިއަދު ހުށަހަޅައިފިއެވެ.
ސަން ކުންފުނީގެ މައްޗަށް މަނީ ލޯންޑަަރިންގެ ދައުވާ ދައުލަތުން އުފުލާފައިވަނީ ރ.ފުއްގިރި ކުއްޔަށް ދޫކުރުމުގެ މުއާމަލާތާ ގުޅުންހުރި އެއް މިލިއަން ޑޮލަރު ލޯންޑާ ކުރުމުގައި ބައިވެރިވި ކަމަށް ތުހުމަތުކޮށެވެ.
ކްރިމިނަލް ކޯޓުގައި މިއަދު ބޭއްވި އެ ދައުވާގެ ޝަރީއަތުގެ އަޑުއެހުމުގައި ސަން ކުންފުނީގެ ދިފާއީ ހެކިންގެ ގޮތުގައި ހުށަހެޅީ ދެ ނަމެކެވެ.
އެއީ ރައީސް ޔާމީންގެ އިތުރުން ސަން ކުންފުނީގެ މުވައްޒަފެއް ކަމުގައިވާ މުހައްމަދު ޝާމިލްގެ ނަމެވެ.
އެ އަޑުއެހުމުގައި ސަން ކުންފުނީގެ ގާނޫނީ ވަކީލް އަލީ ޝާހް ވިދާޅުވީ އެ ކުންފުނީގެ ދިފާއީ ހެއްކެއްގެ ގޮތުގައި ރައީސް ޔާމީންގެ ނަން ހުށަހެޅުއްވީ އެއް މިލިއަން ޑޮލަރު ޖަމާ ކުރުމުން އެއަށްވާ ދިވެހި ރުފިޔާ އެމަނިކުފާނަށް އެ ކުންފުނިން ދޫކުރިކަން ސާބިތު ކުރަން ކަމަށެވެ.