އަހަރު ނިމުނުއިރު ވެސް ސަރުކާރުން ވީ އެއްވެސް ވައުދެއް ނުފުއްދޭ ކަމަށާއި، އޭގެ ބަދަލުގައި ދެއްކީ ހުސް ވާހަކަތަކެއް ކަމަށް ކުރީގެ ނައިބު ރައީސް ޑރ.މުހައްމަދު ޖަމީލު ވިދާޅުވެއްޖެއެވެ.
ޖަމީލު މިއަދު ކުރެއްވި ޓްވީޓެއްގައި ވިދާޅުވީ އަހަރެއް ނިންމާލީ ސަރުކާރުން ހުސް ވާހަކަ ދެއްކުމުގައި ކަމަށާއި އެންމެން ހާލުގައި ޖެހިފައިވާ ކަމަށެވެ.
“މަސްވެރިންނަށްވީ ވަޢުދު ފުއްދަން ދެކޮޅު. ހުޅުމާލޭގައި އެންމެ ގާކޮޅެއްވެސް އަލަށް ނުބޭއްވޭ. މުޅި ސަރުކާރުގެ ކުންފުނިތައް ބަވަނަވީ ކޮރަޕްޝަނުން. 5 އަހަރުގެ ވެރިކަން ކުރެއްވި ވެރިއަކު ޖަލުގައި ބޮޑު ދެ މުޖްރިމުން ގޭގައި” ޖަމީލު ވިދާޅުވިއެވެ.
އަދި އެސެޓް ރިކަވަރީގެ ނަމުގައި ހެދި ކޮމިޝަނަށް އަދިވެސް އެއްވެސް އެސެޓެއް ރިކަވައެއް ނުކުރެވޭ ކަމަށާއި އެއްވެސް މަރަކަށް އިންޞާފެއް ވެސް ލިބިފައި ނުވާ ކަމަށް ޖަމީލު ވިދާޅުވިއެވެ. އެގޮތުން ރީތި ނަމުގެ ބަދަލުގައި ރައީސް އިބްރާހިމް މުހައްމަދު ސޯލިހަށް ނެންގެވެން އޮތީ ހުސް “ބްލޭމް” ކަމަށް ޖަމީލު ވިދާޅުވިއެވެ.