އޯލެވެލް އިމްތިހާނު ކުރިޔަށް ދިޔަ ވަގުތު، އިސްލާމް ޕޭޕަރުގެ ބަދަލުގައި ދިވެހި ޕޭޕަރު ދޫކުރެވުނީ ދެ ކުއްޖަކަށްކަމަށް ޑިޕާޓްމަންޓް އޮފް ޕަބްލިކް އެގްޒޭމިނޭޝަންސް އިން ބުނެފި އެވެ.
އިސްލާމް ޕޭޕަރު-1 ގެ ބަދަލުގައި، ދަރިވަރުންނަށް ދިވެހި ޕޭޕަރު ދޫކުރެވުނީ ގާޒީ ސްކޫލުގަ އެވެ. އެކަން އާއްމުންގެ ސަމާލުކަމަށް ގެނައި، މާލޭގެ އިންތިހާބީ މޭޔަރު ޑރ. މުހައްމަދު މުއިއްޒު އެވެ. އޭނާ މިއަދު ކުރެއްވި ޓްވީޓެއްގައި ވިދާޅުވީ، ގާޒީ ސްކޫލުގައި އެސްއެސްސީ އިސްލާމް އިމްތިހާނުގެ ޕޭޕަރުކަމަށް ހީކޮށް ދިވެހި ޕޭޕަރު ދަރިވަރުންނަށް ބަހާފައިވާ ކަމަށެވެ. އަދި ޕޭޕަރު ބަދަލު ކުރުމެއް ނެތި މާދަމާ އެ އިމްތިހާނު ހަދަން ދޭން އުޅޭ ކަމަށް ވިދާޅުވިއެވެ.
މާދަމާ އޮންނަ އެސް.އެސް.ސީ ދިވެހި އިމްތިޙާނުގެ ޕޭޕަރު "އޮޅިގެން" ގާޒީ ސްކޫލުގައި ވަނީ އިސްލާމް ޕޭޕަރު ކަމަށް ހީކޮށް ބަހާފައި. ނަމަވެސް، ޕޭޕަރު ބަދަލުކުރުމެއްނެތި މާދަމާ އެ ޕޭޕަރު ދަރިވަރުންނަށް ދިވެހި 'އިމްތިޙާން' ހަދަން ދެނީ…(1/2)
— Dr Mohamed Muizzu (@MMuizzu) May 7, 2021
ޑރ. މުއިއްޒު ވިދާޅުވީ ސެކުއިރިޓީ ސީލް ކެނޑުމަށްފަހު އެ ކަރުދާސް ފަހުގެ ތާރީހެއްގައި އިމްތިހާނެއް ހަދަން ބޭނުން ކުރެވިގެން ނުވާނެ ކަމަށެވެ. ދިވެހި އިމްތިހާނު ފަސްކޮށް، ދަރިވަރުންނަށް އާ ޕޭޕަރެއް ދޫކުރަންޖެހޭކަމަށް ޑރ، މުއިއްޒުގެ އެ ޓްވީޓުގައި ވެއެވެ.
އެކަމާއި ގުޅޭގޮތުން، ސުވާލު ކުރުމުން އެޑިއުކޭޝަން މިނިސްޓްރީން ބުނީ، އިސްލާމް ޕޭޕަރު-1 ގެ އިމްތިހާނު އޮތް ދުވަހު އިންވިޖިލޭޓަރަށް އޮޅިގެން، ދިވެހި ޕޭޕަރު-1 ގާޒީ ސްކޫލުގެ ދެ ދަރިވަރެއްގެ މޭޒުމަތީގައި ބޭއްވުނު ކަމަށެވެ. ނަމަވެސް އެކަން އިންވިޖިލޭޓަރުންގެ ސަމާލުކަމަށް އައުމާއި އެކު ޕޭޕަރު އަތުލީ ދަރިވަރުން ޕޭޕަރު ކިއުމުގެ ކުރިންކަމަށް ޑީޕީއީން ބުންޏެވެ.
08 މެއި 2021 (ހޮނިހިރު) ދުވަހަށް ތާވަލުކުރެވިފައިވާ ދިވެހި ކަރުދާސް 1 ޣާޒީ ސްކޫލުގެ ބައެއް ދަރިވަރުންނަށް ފެނުނުކަމަށް ދެކެވޭ ވާހަކަޔާ ގުޅޭ pic.twitter.com/rWys4AmWrS
— Department of Public Examinations (@dpemv) May 7, 2021
ޑީޕީއީއިން ބުނެފައިވަނީ، އެ ދުވަހު ކަން ހިނގައިދިޔަ ގޮތް އެ އިދާރާއިން ބަލިއިރު، ދަރިވަރުންނާއި އިންވިޖިލޭޓަރުންނަށް ޕޭޕަރުގެ އެއްވެސް ސުވާލެއް ފެނިފައި ނުވާ ކަމަށެވެ. ތާވަލު ކުރެވިފައިވާ ގޮތަށް ދިވެހި އިމްތިހާނު ކުރިޔަށް ގެންދިއުމަށް ނިންމީ އެ ސަބަބާއި ހުރެކަމަށް ޑީޕީއީން ބުނެފައި ވެއެވެ.
