ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދަށް އަމާޒުކޮށް ދިން ޓެރެރިސްޓު ހަމަލާގެ ތަހުގީގާއި ގުޅޭ އެންމެ ފަހުގެ މައުލޫމާތު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އޮޅުންފިލުވައިފިއެވެ.
މުލިއާގޭގައި ކުރިއަށްގެންދިޔަ މި ބައްދަލުވުމުގައި ހޯމް މިނިސްޓަރު އިމްރާން އަބްދުﷲއާއި ކޮމިޝަނަރ އޮފް ޕޮލިސް މުހައްމަދު ހަމީދުގެ އިތުރުން އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު ބައިވެރިވެވަޑައިގެންފައިވެއެވެ.
މިހަމަލާއާއި ގުޅިގެން ރައީސް ޞާލިހު ޤައުމާއި މުޙާތަބު ކުރައްވައި ވިދާޅުވެފައިވަނީ މިހަމަލާއަކީ ރާއްޖޭގެ ޑިމޮކްރަސީ އަށާއި، ރާއްޖޭގެ އިޤްތިޞާދަށް ދިން ނުރައްކާތެރި ހަމަލާއެއްކަމަށެވެ. ރައީސުލްޖުމްހޫރިއްޔާގެ ވާހަކަފުޅުގައި، މި ޙަމަލާ ދިވެހި ފުލުހުންގެ ޚިދުމަތާއި، ޤައުމީ ދިފާޢީ ބާރުން ތަޙުޤީޤު ކުރަމުންދާ ކަމަށާއި މި ޙަމަލާގެ ފުރިހަމަ ތަޙުޤީޤެއް ހިންގުމަށްޓަކައި ބައިނަލްއަޤްވާމީ ތަޖުރިބާކާރުންގެ އެހީތެރިކަން ހޯއްދަވަމުން ގެންދަވާކަމުގައި ވިދާޅުވިއެވެ. އެގޮތުން އޮސްޓްރޭލިއަން ފެޑެރަލް ޕޮލިސްގެ ތަޙުޤީޤު ޓީމެއް އަންނަ ހޮނިހިރު ދުވަހު ރާއްޖެ އައުމަށް ހަމަޖެހިފައިވާ ކަމުގައި ވިދާޅުވިއެވެ.
ރައީސް ނަޝީދުގެ ހަށީކޮޅަށް އަމާޒުކޮށް އައިއީޑީއެއް ގޮށްވާލައިގެން ދީފައިވާ މި ޓެރަރިސްޓް ހަމަލާގައި ލިބުނު ޒަހަމްތަކަށް ރައީސް ނަޝީދަށް ވަނީ އޭޑީކޭގައި ފަރުވާދީ އޮޕަރޭޝަންތަކެއް ކޮށްފައެވެ. މި ހަމަލާގައި އިތުރު ފަސް މީހަކަށްވެސް ޒަހަމްތައް ވެފައިވާކަމަށް ފުލުހުން މައުލޫމާތުދެއެވެ.
ފުލުހުން ބުނެެފައިވަނީ މިހަމަލާއާއި ގުޅިގެން ހަތަރު މީހަކު ފާހަގަކުރެވިފައިވާ ކަމަށާއި، އެމީހުންނަށް ފާރަލަމުން އަންނަކަމަށެވެ.
advertisment