މާލޭގައި ކޮވިޑުގެ ހާލަތު ގޯސްވެ އަޅަމުންދާ ފިޔަވަޅުތަކުގެ ދަށުން މިސްކިތްތަކުގައި ޖަމާއަތުގައި ނަމާދުކުރުން މަޑުޖައްސާލުމަށް އަންގައިފި އެވެ.
މާލޭގައި ކޮވިޑުގެ ހާލަތު ގޯސްވުމުގެ ސަބަބުން ފިޔަވަޅުތައް ދަނީ ވަރުގަދަ ކުރަމުންނެވެ. އޭގެ ތެރޭގައި މީގެ ކުރިން ރޭގަނޑުގެ 09:00 އިން ފެށިގެން ތަންފީޒު ކުރަމުން އައި ކާފިއު ހަވީރުގެ 04:00 އަށް ވަނީ ބަދަލުކޮށްފަ އެވެ.
ފާއިތުވި ދެ ދުވަހުގެ ތެރޭގައި ވެސް ރާއްޖެއިން ކޮވިޑު ޖެހުނު މީހުންގެ އަދަދު 1000 އިން މައްޗަށް އަރައެވެ. އަދި ގިނަ މީހުންނަށް ފަރުވާދެމުން ދަނީ ހޮސްޕިޓަލުގައި އެޑްމިޓުކޮށްގެންނެވެ.
ފިޔަވަޅުތައް ވަރުގަދަކޮށް އެޗްޕީއޭއިން ބުނީ، މާލޭގެ ސަރަހައްދުގެ މިސްކިތްތަކުގައި ޖަމާއަތުގައި ނަމާދު ކުރުން މަޑުޖައްސާލަން އަންގާ ކަމަށެވެ. އަދި މި ފިޔަވަޅު އަޅަނީ، ހަފްތާއެއްގެ މުއްދަތަކަށްކަމަށް ބުނެފައި ވެއެވެ.