ރާއްޖެއަށް މިހާރު ކުރަމުންދާ ވިއްސާރާގައި ހއ. ހޯރަފުއްޓަށް އުދައަރައި ބޮޑެތި ގެއްލުންތަކެއް ވެއްޖެއެވެ.
ހޯރަފުށީ ދާއިރާގެ މެމްބަރު އަހުމަދު ސަލީމްވަނީ ހޯރަފުށީ އެއާޕޯޓަށް އުދައަރާ ވީޑިއޯއެއްވެސް ހިއްސާކޮށްފައެވެ. އެވީޑިއޯގައިވެސް ވަރަށް ބޮޑަށް ރަންވޭ މައްޗަށް އުދަ އަރައި، ވެއްޔާއި ގަލުން ރަންވޭ ފޮރުވިފައިވާތަން ފެނެއެވެ. މޫސުން ގޯސްވެ ގަދަވަޔާއިއެކު އެއާޕޯޓްގެ ޓާމިނަލްއަށްވެސް ވަނީ ބޮޑެތި ގެއްލުންތަކެއް ވެފައެވެ.
ހޯރަފުށީ އެއާޕޯޓް ގެއްލުންތައް ވުމާއިގުޅިގެން މިހާރުވަނީ ދަތުރުތައްވެސް މެދު ކަނޑާލާފައެވެ.
ރާއްޖެއަށް ކުރަމުންދާ ވިއްސާރާގައި ރާއްޖޭގެ އުތުރުން ހއ. އަތޮޅުން ފެށިގެން ޅ. އަތޮޅާއި ހަމައަށް އޮރެންޖް އެލާޓުވަނީ ނެރެފައެވެ.
ރާއްޖޭގެ ހުޅަނގު އުތުރުން، އިރުދެކުނު އަރަބިކަނޑުގައި އުފެދިފައިވާ ކޮޅިގަނޑު ބާރުގަދަ ކޮޅިގަނޑަކަށް ބަދަލުވެ، އޭގެފަހުން ތޫފާނަކަށްވެސް ބަދަލުވުމުގެ ފުރުޞަތު އޮތްކަމަށް މޫސުމާއި ބެހޭ ޤައުމީ އިދާރާއިން ވަނީ ހާމަކޮށްފައެވެ. މެޓް އޮފީހުން ވިދާޅުވީ މިކޮޅިގަނޑު ޖެހެމުން ދާނީ އުތުރު ހުޅަނގުއުތުރަށް ރާއްޖެ އާއި ދުރަށްކަމަށާއި، އެ ކޮޅިގަނޑާއި ގުޅިގެން ރާއްޖޭގެ އަތޮޅުތަކުގެ މަތީގައި ގިނައަދަދަކަށް ބޯ ވިއްސާރަވިލާ އުފެދެމުންދެމުންދާކަމަށެވެ.