އަންހެނުން ބާރުވެރި ކުރުވުމުގައި ގެނެވުނީ އިންގިލާބީ ބަދަލުތަކެއް: މިނިސްޓަރ

ތަފާތު އެކި ދާއިރާތަކުގައި މަސައްކަތްކޮށް، ކުރިއަރަމުން އަންނަ އަންހެނުންނަށް ހާއްސަކޮށް އެ މީހުންގެ އަގުވަޒަންކޮށް ދޭ “ރެހެންދި އެވޯޑު” ގެ ރަސްމިއްޔާތު ރޭ ވަނީ ބާއްވާފަ އެވެ.

ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވީ، މި ސަރުކާރުގެ އެންމެ ބޮޑު އެއް ވައުދަކަށް ވީ މިންތީގެ ހަމަހަކަން ގާއިމް ކުރުން ކަމަށެވެ. ސަރުކާރުގެ ސްޓްރެޓެޖިކް އެކްޝަން ޕްލޭން (އެސްއޭޕީ) ގައި އެ މަސައްކަތް ކުރިޔަށް ގެންދާނެ ގޮތް ތަފްސީލުކޮށް ލިޔެ ދާއިރާތަކުގައި “ޑިިޒިޝަން މޭކިލް ލެވެލް” ނުވަތަ ގޮތް ނިންމާ ފެންވަރުގައި އަންހެނުންނަށް ފުރުސަތުތައް ފަހި ކުރުން ހިމަނާފައި ވެއެވެ. އެކަމަށް އިޝާރާތްކޮށް މިނިސްޓަރު އައިޝަތު ވިދާޅުވީ، މިއަދު ކޮންމެ ދާއިރާއަކަށް ބެލިއަސް އަންހެނުންގެ ބައިވެރިވުން ފެންނަ ކަމަށެވެ. އޭގެ ތެރޭގައި ސިޔާސީ ދާއިރާއާއި، ގާނޫނީ އަދި ޝަރުއީ ދާއިރާ، ހާއްސަކޮށް ހާރިޖީ ސިޔާސަތުތެ ދާއިރާ ހިމެނޭ ކަމަށެވެ.

ފޮރިން ޑިޕްލޮމެޓް މިޝަންތަކުގައި މިއަދު ލީޑު ކުރަނީ އަންހެނުންކަން ފާހަގަކޮށް މިނިސްޓަރ ވިދާޅުވީ ގެންނަން ބޭނުންވާ ބަދަލަކީ އެއީ ކަމަށެވެ. މިނިސްޓަރ ވިދާޅުވި ގޮތުން ރާއްޖެއިން ބޭރުގައި ގާއިމްކޮށްގައިވާ 16 މިޝަނެއްގެ ތެރެއިން، 08 މިޝަން ލީޑު ކުރަނީ އަންހެނުންނެވެ.

އަންހެނަކަށް ވީތީ ސިޔާސީ ދައިރާއިން ކުރިމަތިލާ އެކި މަގާމުތަކާއި، އެކި އިންތިހާބުތަކުގައި ވޯޓު ނުދިނުމުގެ މައްސަލަތައް ފާހަގަވާތީ މި ސަރުކާރުން ލާމަރުކަޒީ ގާނޫނުގެ ދަށުން ކައުންސިލް އިންތިހާބުގެ 33 އިންސައްތަ ގޮނޑި އަންހެނުނަށް ހާއްސަކުރި އެވެ. ސަރުކާރުގެ އެ ސިޔާސަތު ވެސް ތަންފީޒު ކުރެވިފައިވާކަން ފާހަގަކޮށް މިނިސްޓަރ އާއިޝާ ވިދާޅުވީ މިއީ ދިވެހި ތާރީހުގައި ވެސް ކަންކަން ނިންމާ ފެންވަރުގައި، އަންހެނުންގެ ދައުރު އިތުރުކުރުމަށް އެޅުނު ވަރަށް މުހިއްމު ފިޔަވަޅެއް ކަމަށެވެ. އަދި މި ސިޔާސަތުގެ ދަށުން އެމީހަކު ދިރިއުޅޭ މުޖުތަމައެއްގެ ކަންކަން އިދާރީ ގޮތުން ރާވާ ހިންގުމުގައި، އަންހެން ކައުންސިލަރުންގެ އަމަލީ ބައިވެރިވުން ލިބޭނެކަން ކަށަވަރުވެގެން ދާތަން މިހާރު ވެސް ފެންނަމުންދާކަމަށް ވިދާޅުވި އެވެ.

މުޖްތަމައުގެ ތެރޭގައި ދެ ޖިންސުގެ ދެމެދު ގެންގުޅުނު ތަފާތު ކުރުންތައް ނައްތާލަން ކުރެވުނު އެކި މަސައްކަތްތަކުގެ ތެރެއިން ސަރުކާރުގެ ސިޔާސަތުތަކަށް އިޖާބަދީ ސަރުކާރުގެ އިދާރާތްތަކާއި އޮފީސްތައް އަދި ކުންފުނިތައް ވެސް އަންހެނުން ބާރުވެރި ކުރުވުމަށް މަސައްކަތް ކުރަމުން ދާ ކަމަށް މިނިސްޓަރ ވިދާޅުވި އެވެ. އަދި އެ މަސައްކަތް އެންމެ ރަނގަޅު ގޮތުގައި ކުރިޔަށް ގެންދާ ދެ ތަނެއްގެ ގޮތުގައި މޯލްޑިވްސް ކަސްޓަމްސް ސާވިސް އާއި، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ފާހަގަ ކުރެއްވި އެވެ.