ކޮންމެ ގައުމަކުން އަންނަ ފުރަތަމަ ފަތުރުވެރިޔާއަށް ޚާއްސަ މަރުހަބާއެއް!

ކޮންމެ ގައުމަކުންވެސް ރާއްޖެ އަންނަ ފުރަތަމަ ފަތުރުވެރިޔާ އައުން ފާހަގަކުރަން ފަށައިފިއެެވެ.

ޓުއަރިޒްމް މިނިސްޓްރީއިން އަންނަނީ ރާއްޖޭގެ ފަތުރުވެރިކަމަށް ފަންސާސް އަހަރުފުރުން ފާހަގަކުރުމަށް ގިނަ ހަރަކާތްތަކެއް ކުރިއަށްގެންދަމުންނެވެ. އެގޮތުން 2022 ވަނަ އަހަރުގެ ތެރޭގައި ފަތުރުވެރިކަމުގެ ރަންޔޫބިލް ފާހަގަކުރުމަށް އެކި ހަރަކާތްތައް ހިންގުމަށް މިނިސްޓްރީއިން ވަނީ ރާވާފައެވެ.

މިއަހަރުގެ މިހާތަނަށް ކޮންމެ ގައުމަކުންވެސް އެންމެ ފުރަތަމަ އައި ފަތުރުވެރިޔާ އައުން ފާހަގަކުރުމަށްޓަކައި މިނިސްޓްރީއިން ވަނީ އެފަތުރުވެރިޔަކަށް ހޫނު މަރުހަބާއެއް ކިޔާފައެވެ. އެގޮތުން މިހާތަނަށް އައިއިރު 9 ގައުމަކުން ރާއްޖެއަށް ޒިޔާރަތްކުރި ފުރަތަމަ ފަތުރުވެރިންނަށް ވަނީ ހޫނު މަރުހަބާއެއް ކިޔާފައެވެ. އެގޮތުން އިޓަލީ، ސްޕެއިން، ޖަރމަނީ، އިންޑިޔާ، ފްރާންސް، ރަޝިޔާ، ސައުދީ އަރަބިއްޔާ، ޔޫކްރެއިން އަދި ޔުނައިޓެޑް ސްޓޭޓްސްއިން އެންމެ ފުރަތަމަ ފަތުރުވެރިންނަށް ވަނީ މަރުހަބާ ކިޔާފައެވެ.

We received the first #Spanish visitor of 2022 at @VelanaAirport today. #MaldivesGoldenYear @VisitMaldives@MvTourism50 pic.twitter.com/YmwDq9mLDD

— Ministry of Tourism (@MoTmv) January 1, 2022

ފަތުރުވެރިކަމުގެ ރަންޔޫބިލް ފާހަގަކުރުމަށް މިނިސްޓްރީއިން ވަނީ ޚާއްސަ ލޯގޯއެއްވެސް ތައާރަފްކޮށްފައެވެ. މިލޯގޯ ސަރުކާރުގެ ހުރިހާ އިދާރާތަކުން ފޮނުއްވާ ރަސްމީ ސިޓީ ތަކާއި، އީމެއިލް ފުޓަރތަކުގައި އެއް އަހަރުގެ މުއްދަތައް ބޭނުންކުރެއްވުމަށް ރައީސުލްޖުމްހޫރިއްޔާ ވަނީ ނިންމަވާފައެވެ. އަދި ، ރާއްޖޭގެ ފަތުރުވެރިކަން، ރާއްޖެއިން ބޭރުގެ ފަރާތްތަކަށް އިޝްތިހާރު ކުރެއްވުމުގައްޔާއި، ރާއްޖެއިން ބޭރުގައި އޮންނަ އެކިއެކި ފެއަރތަކާއި ބައްދަލުވުންތަކުގައި، ރާއްޖެ އިޝްތިހާރު ކުރެއްވުމަށް، އިނގިރޭސިބަހުން ޝިޢާރު ލިޔެފައިވާ ލޯގޯ އަންނަނީ ބޭނުންކުރަމުންނެވެ.