ދައުލަތަށް ގެއްލުންވާގޮތަށް ހަވާލު ކުރިކަމަށް ބުނާ މަޝްރޫއު ހުއްޓުވުމުގެ ވަގުތީ އަމުރެއް ނެރެނުދިން!

ހައިކޯޓުން މިއަދު ނިންމި ނިންމުމުގައި ބުނީ ވަގުތީ އަމުރު ނުނެރުނަސް އަޒްރޯވާ މޯލްޑިވްސްއަށް އިޔާދަ ނުކުރެވޭ ވަރުގެ ގެއްލުމެއް ލިބޭނެކަމަށް ނުބެލެވޭ ކަމަށެވެ. އަދި ގާނޫނީ ގޮތުން ހިމާޔަތެއް ލިބެން ޖެހޭ މައުޟޫއީ ގޮތުން ހައްގެއް ނުވަތަ ގާނޫނީ މަރުކަޒެއް އޮތުމުގެ އިހުތިމާލު އޮތްކަމަށް ފެންނާން ނެތް ކަމަށެވެ.

ހުކުމުގައި ބުނީ ގާނޫނީ ގޮތުން ހިމާޔަތް ލިބެންޖެހޭ މައުޟޫއީ ހައްގެއް ނުވަތަ ގާނޫނީ މަރުކަޒެއް އޮތުމުގެ އިހްތިމާލު ފާޅުކަން ބޮޑު ގޮތެއްގައި އޮތްކަން ހާމަކޮށްދިނުމުގެ ގޮތުން، އަމުރަކަށް އެދޭ ފަރާތަކުން ދައްކުވައިދޭން ޖެހޭހާވެސް ކަމަކީ ދައުވާ ކާމިޔާބުވާނެކަމުގެ އަސާސީ އަދި ހަގީގީ އިހްތިމާލެއް އޮތްކަން ދައްކުވައިދިނުން ކަމަށެވެ. ނަމަވެސް އެ ކުންފުނީގެ ކާމިޔާބީގެ އިހްތިމާލު ކުޑަނަމަ އަސާސީ އަދި ހަގީގީ އިހްތިމާލެއް އޮތްކަން ބެލެވެން ނެތްކަމަށް ހުކުމުގައި ވެއެވެ.

“އެހެނީ އެ ހަލަތުގައި ގާނޫނީ ގޮތުން ހިމާޔަތް ލިބެންޖެހޭ މައުޟޫއީ ހައްގެއް ނުވަތަ ގާނޫނީ މަރުކަޒެއް އޮތުމުގެ އިހުތިމާލު “ފާޅުކަން ބޮޑު” ކަމަށް ބުނެވިދާނެފަދަ ހާލަތެއް އޮތުމަށްވުރެ ނެތުން ގާތްކަމަށް ފެންނާތީ އެވެ. އަދި އެ ހާލަތުގައި ކާމިޔާބުވުމުގެ އިހްތިމާލު ހަގީގަތުގައި އޮތްކަމަށް ބުނެވިދާނެ ކަމަށް ބެލެވެން ނެތަތީ އެވެ” ހުކުމް

މީގެ އިތުރުން ހުކުމުގައި ބުނީ ވަގުތީ އަމުރު ނެރެވެނީ ގެއްލުމުގެ ބަދަލު ދިނުން އެކަށީގެން ނުވާ ހާލަތްތަކުގައި ކަމަށެވެ.

ބިޑު ހުށަހެޅުމަށް ހަރަދެއް ކުރި ނަމަ އެ ހަރަދަކީ އޭގެ މިންވަރު ދެނެގަނެވޭނެ ހަރަދެއްކަން ފާހަގަކޮށް ހުކުމުގައި ބުނީ، ގާނޫނީ ގޮތުން ހިމާޔަތް ލިބެންޖެހޭ މައުޟޫއީ ހައްގެއް ނުވަތަ ގާނޫނީ މަރުކަޒެއް އޮތުމުގެ އިހުތިމާލު ފާޅުކަން ބޮދު ގޮތެއްގައި އޮތްކަމަށް ބެލި ނަމަވެސް ވަގުތީ އަމުރު އެދުނު ފަރާތަށް ލިބޭނެ ގެއްލުމަކީ މި ހާލަތުގައި އިޔާދަ ނުކުރެވެނެ ގެއްލުމެއްކަން އެނގޭކަށް ނެތް ކަމަށެވެ.

އެހެންވެ، ހައިކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ނިންމެވީ ފެނާއި ނަރުދަމާގެ މަޝްރޫއުތައް ހުއްޓުވަން ވަގުތީ އަމުރެއް ނެރެދޭނެ ހާލަތެއް ނެތް ކަމަށެވެ.

މައްސަލަ ކޯޓަށް ހުށަހެޅި ކުންފުނިން ބުނާ ގޮތުން، މަޝްރޫއު އެހެން ކުންފުންޏަކާއި ހަވާލު ކުރީ އެ ކުންފުނީގެ ހައްގު ގެއްލޭ ގޮތަށް، ދައުލަތުގެ މާލިއްޔަތު ގަވައިދާއި ހިލާފަށެވެ. އެހެންވެ އެ މަސައްކަތް އަޒްރޯވާ ކުންފުންޏަށް ވުރެ ދެ ގުނަ އަގު ބޮޑުކޮށް ހުށަހެޅި ކުންފުންޏަކަށް މަޝްރޫއު ހަވާލު ކުރީ މަސައްކަތުގެ ތަޖުރިބާ އާއި ހިންގި އެއްވެސް މަޝްރޫއުއެއް ވޭތޯ ބެލުމެއް ނެތިމަަށް ބުނެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅި އެވެ.